ዘምልክያስ ነቢይ 4

1ወናሁ ፡ ይመጽኣ
፡ መዋዕለ ፡ እግዚአብሔር
፡ እንዘ ፡ ይነድዳ ፡ ከመ
፡ እሳት ፡ ወያውዕያሆሙ
፡ ወይከውኑ ፡ ባዕዳነ
፡ አሕዛበ ፡ ወኵሎሙ ፡
ገበርተ ፡ ዐመፃ ፡ ከመ
፡ ሐሠር ፡ ወታውዕዮሙ
፡ ዕለት ፡ እንተ ፡ ትመጽእ
፤ ይቤ ፡ እግዚአብሔር
፡ ዘኵሎ ፡ ይመልክ ፤ ወኢይተርፍ
፡ ሥርዎሙ ፡ ወኢዐጽቆሙ
።

2ወይሠርቅ ፡ ለክሙ
፡ ለእለ ፡ ትፈርሁ ፡ ስምየ
፡ ፀሐየ ፡ ጽድቅ ፡ ወሕይወት
፡ ውስተ ፡ ክነፊሁ ፤ ወትወፅኡ
፡ ወታንፈርዕፁ ፡ ከመ
፡ ጣዕዋ ፡ ዘተፈትሐ ፡
እማእሰሩ ።

3ወትከይድዎሙ ፡
ለኃጥኣን ፡ ወይከውኑ
፡ ሐመደ ፡ በታሕተ ፡ እገሪክሙ
፡ በዕለት ፡ እንተ ፡ እገብር
፡ አነ ፤ ይቤ ፡ እግዚአብሔር
፥ ዘኵሎ ፡ ይመልክ ።

4ወናሁ ፡ አነ ፡
እፌንዎ ፡ ለክሙ ፡ ኤልያስሃ
፡ ተስብያዊ ፡ ዘእንበለ
፡ ትምጻእ ፡ ዕለተ ፡ እግዚአብሔር
፡ ዐባይ ፡ እንተ ፡ ታስተርኢ
።

5ወይመይጥ ፡ ልበ
፡ አብ ፡ ኀበ ፡ ውሉድ ፡
ወልበ ፡ ብእሲ ፡ ኀበ ፡
ቢጹ ፡ አመ ፡ መጻእኩ ፡
ወቀሠፍክዋ ፡ ለምድር
።

6ተዘከሩ ፡ ሕገ ፡
ሞሴ ፡ ገብርየ ፡ ዘአዘዝክዎ
፡ በኮሬብ ፡ ሥርዐተ ፡
ወኵነኔ ፡ ለኵሉ ፡ እስራኤል
። = ።
ለይኩን ፡ ስብሐተ ፡
እግዚአብሔር ፡
ለዓለም ፡ ወለዓለመ
፡ ዓለም ፡
አሜን ፡ አሜን ።