ዘሚክያስ ነቢይ 5

1ወአንቲኒ
፡ ቤተ ፡ ልሔም ፡ ቤተ ፡
ኤፍራታ ፡ ውኅድ ፡ አንቲ
፡ ከመ ፡ ትኩኒ ፡ ውስተ
፡ አእለፈ ፡ ይሁዳ ፡ እምኔኪ
፡ ይወፅእ ፡ ንጉሠ ፡ እስራኤል
፡ ወፍናዊሁኒ ፡ ዘእምፍጥረተ
፡ ዓለም ።

2በእንተ
፡ ዝንቱ ፡ ትሁቦሙ ፡ እስከ
፡ ጊዜ ፡ ትወልድ ፡ ወእለ
፡ ተርፉ ፡ አኀዊሆሙ ፡
ይትመየጡ ፡ ኀበ ፡ ደቂቀ
፡ እስራኤል ።

3ወይቀውም
፡ ወይሬኢ ፡ (ወይሬዒ ፡)
መርዔቶ ፡ በኀይለ ፡ እግዚአብሔር
፡ ወበስብሐተ ፡ ስመ ፡
እግዚአብሔር ፡ አምላኮሙ
፡ ይሄልዉ ፡ እስመ ፡ ናሁ
፡ ይእዜ ፡ የዐብዩ ፡ አጽናፈ
፡ ምድር ።

4ወትከውን
፡ ዛቲ ፡ ሰላም ፡ አመ ፡
መጽኡ ፡ ፋርስ ፡ ውስተ
፡ ምድርክሙ ፡ ወአመ ፡
ዐርጉ ፡ ውስተ ፡ ብሔርክሙ
፡ ወይትነሥኡ ፡ ሰብዐቱ
፡ ኖሎት ፡ ላዕሌሁ ፡ ወሰመንቱ
፡ ሰራዊት ።

5ወይርዕይዎ
፡ ለእሱር ፡ በኲናት ፡
ለምድረ ፡ ኔብሮድ ፡ በውስተ
፡ ሕዝአቱ ፡ ወይድኅን
፡ እምእሱር ፡ አመ ፡ መጽአ
፡ ውስተ ፡ ብሔርክሙ ፡
ወአመ ፡ ዐርገ ፡ ውስተ
፡ አድባርክሙ ።

6ወይከውን
፡ ተረፈ ፡ ያዕቆብ ፡ ውስተ
፡ አሕዛብ ፡ በማእከለ
፡ ብዙኅ ፡ ሕዝብ ፡ ከመ
፡ ጠል ፡ ዘይወርድ ፡ እምኀበ
፡ እግዚአብሔር ፡ ወከመ
፡ አባግዕ ፡ ውስተ ፡ ተሐግ
፡ ከመ ፡ ኢይትጋባእ ፡
ወኢአሐዱ ፡ ወኢይቁም
፡ ውስተ ፡ ደቂቀ ፡ እጓለ
፡ እመሕያው ።

7ወይከውን
፡ ተረፈ ፡ ያዕቆብ ፡ ማእከለ
፡ ብዙኃን ፡ አሕዛብ ፡
ከመ ፡ አንበሳ ፡ ውስተ
፡ አንስሳ ፡ በገዳም ፡
ወከመ ፡ እጓለ ፡ አንበሳ
፡ ውስተ ፡ መርዔተ ፡ አባግዕ
፡ ከመ ፡ ሶበ ፡ ይመጽእ
፡ ወይሰርር ፡ ወይመሥጥ
፡ ወአልቦ ፡ ዘያነግፎ
።

8ከማሁ ፡ ትትሌዐል
፡ እዴከ ፡ ዲበ ፡ እለ ፡
ይሣቅዩከ ፡ ወይሤረው
፡ ኵሎ ፡ ፀርከ ።

9ወይከውን
፡ ይእተ ፡ አሚረ ፡ ይቤ
፡ እግዚአብሔር ፡ እሤርዎን
፡ ለአፍራሲከ ፡ በማእከሌከ
፡ ወአጠፍእ ፡ ሰረገላከ
፡

10ወእሤርዎን ፡ ለአህጉረ
፡ ብሔርከ ፡ ወአንኅል
፡ ኵሎ ፡ አጽዋኒከ ።

11ወእስዕር
፡ ኵሎ ፡ ሥራያቲከ ፡ እምእደዊከ
፡ ወአልቦ ፡ ዘይትዋሣእ
፡ ለከ ።

12ወእሤሩ ፡
ግልፎከ ፡ ወምሰሊከ ፡
እማእከሌከ ፡ ከመ ፡ ኢትስግድ
፡ እንከ ፡ ለግብረ ፡ እደዊከ
።

13ወእገዝም ፡ ምሕራማቲከ
፡ እማእከሌከ ፡ ወአጠፍኦን
፡ ለአህጉሪከ ።

14ወእገብር
፡ በቀለ ፡ ውስተ ፡ አሕዛብ
፡ በመዓትየ ፡ ወበመቅሠፍትየ
፡ እስመ ፡ ኢሰምዑኒ ።