መጽሐፈ ነገሥት ፫ 5

1ወሰሎሞን ፡
ንጉሥ ፡ ነግሠ ፡ ላዕለ ፡ እስራኤል ።

2ወእሉ ፡ እሙንቱ ፡ መላእክቲሁ ፡ አዛርያስ ፡ ወልደ ፡ ሳዶቅ ፤

3ወኤልያብ ፡
ወአኪያ ፡ ወልደ ፡ ሱባ ፡ ጸሓፊ ፡ ወኢዮሳፍጥ ፡ ወልደ ፡ አኪያድ ፡ መዘክር ።

4ወሰዶቅ ፡ ወአብያታር ፡
ካህናት ።

5ወአርያ ፡ ወልደ ፡ ናታን ፡ ላዕለ ፡ ሥዩማን ፡ ወዘባት ፡ ወልደ ፡ ናታን ፡ ዘእምታሕተ ፡ ንጉሥ ።

6ወአኪየል ፡
መጋቢ ፡ ወኤልያፍ ፡ ወልደ ፡ ሰፋን
፡ ላዕለ ፡ በሓውርት ፤ አዶኒረም ፡ ወልደ ፡ ኤድራ
፡ ላዕለ ፡ ጾር ።

7ወሤመ ፡ ሰሎሞን
፡ ፲ወ፪ላዕለ ፡ እሰራኤል ፡ እለ ፡ ይትሜጠዉ
፡ ግብሮሙ ፡ ለንጉሥ ፡
ወለቤቱ ፤ ለለ፩ወርኅ
፡ ለለ ፡ ዓመት ፡ ያዌፍዩ
፡ ምዕረ ።

8ወዝንቱ ፡ ውእቱ ፡ አስማቲሆሙ ፡ ቤዖር ፡ በደብረ ፡ ኤፍሬም ።

9ወልደ ፡ ራኬብ
፡ ፩በማኪማስ ፡ ወቤተ ፡ ላሚ ፡ ወቤተ ፡ ሰሚስ ፡ ወኤሎም ፡ እስከ
፡ ቤተ ፡ ላማኒስ ።

10ወልዶ ፡ ኤሳት ፡ በቤርኔማሉ ፡ ወሴሜንኮቄሬስ
፡ ወፈራኪሐናዳን ።

11ወሓናጡፊንጢ
፡ ብእሲ ፤ ጠብሌት ፡ ወለተ ፡ ሰሎሞን ፡ ብእሲቱ ።

12በቀክ ፡ ወልደ ፡ አኪማከ ፡ በጰላማሕ ፡ ወሜቄዶ ፡ ወኵሉ
፡ ቤተ ፡ ሳሐን ፡ ዘመንገለ ፡ ኤሳታን ፡ ዘመትሕተ ፡ ኤስድራኤ ፡ ወእምነ ፡ ቤሳፉዱ ፡ ወኤቤልሜሑላ ፡ እስከ ፡ ማእቤር ፡ ዘሉቃሜስ ።

13ወልደ ፡ ጋቤሃ
፡ በሬማት ፡
ገለአድ ፡ ውእቱ ፡ ወሰኖሙ
፡ ኤሬጠቦሔ ፡ በበሳን ፡ ፷አህጉር
፡ ዐበይት ፡
እለ ፡ ቦን ፡
ቅጽረ ፡ ወመናስግቲሆን ፡ ዘብርት ።

14ወኦኪናሖም ፡ ወልደ ፡ ኣኬልማሐን ፡ ዘኤኒ ፡ ኣኒስ ።

15ወአኬልማሴን
፡ ዘንፍታሌም ፡ ወውእቱኒ
፡ አውሰባ ፡ ለማሤማት ፡ ወለተ ፡ ሰሎሞን ።

16በሀማ ፡ ወልደ
፡ ኵሲ ፡ ዘእምነ ፡ ሬግቦሔል ፡ እስከ
፡ አሔል ፡ በምድረ ፡ መሐለይሶ ።

17ወልደ ፡ ኤላ
፡ በብንያም ፡ ፩ ።

18ወልደ ፡ ኣዴ
፡ በምድረ ፡ ጋድ ፡ ወበምድረ
፡ ሴዎን ፡ ንጉሠ ፡ ሐሴቦን ፡ ወአግ
፡ ንጉሠ ፡ ባሳን ፡ ወናሴፍ
፡ ፩በምድረ ፡ ይሁዳ ።

19ወዮሳፍጥ ፡ ወልደ ፡ ፋሐሱድ ፡ በይሳኮር ።

20ወእሉ ፡ ያገብኡ
፡ ለንጉሥ ፡ ሰሎሞን ፡ ግብሮሙ ፡ በኣምጣነ ፡ ኵሉ ፡ ዘአዘዞሙ ፡ ዘይሠርዑ ፡ ውስተ ፡ ማእደ ፡ ንጉሥ ፡ ፩፩በበወርኁ ፡ ወአልቦ ፡ ዘያሐጽጹ ፡ ወኢበምንትኒ ።

21ወሰገመኒ ፡
ወኀሠረ ፡ ለአፍራስ ፡ ወይጸውሩ ፡ ሰረገላቲሁ ፡ ለንጉሥ ፡ ኀበ
፡ ሀለወ ፡ ወኵሎሙ ፡ በበ ፡ ሥርዐቶሙ ።

22ወዝንቱ ፡ ዘይትገበር ፡ ለሰሎሞን ፡ በበ
፡ ዕለቱ ፡ ፴በመስፈርተ
፡ ቆሮስ ፡ ስንዳሌ ፡ ወ ፡ ፰በመስፈርተ
፡ ቆሮስ ፡ ሐሪፅ ፡ ልቱም ።

23ወ ፲አልህምት ፡ መጋዝእ
፡ ወ ፳አልህምተ
፡ አስዋር ፡
ወ፻አባግዕ ፡ ዘእንበለ ፡ ሀየል ፡ ወወይጠል ፡ ወመጋዝአ ፡ ደዋርህ ።

24እስመ ፡ ውእቱ ፡ መኰንን ፡ ላዕለ ፡ መላእክት ፡ እለ ፡ ማዕዶት ፡ ፈለግ ፡ ወኵሎሙ ፡ እለ ፡
በውዱ ፡ ስንእ ፡ ምስሌሁ
።

25ወወህቦ ፡ እግዚአብሔር
፡ አእምሮ ፡ ለሰሎሞን
፡ ብዙኀ ፡ ፈድፋደ ፡ ወሰፍሐ ፡ ልቡ ፡ ከመ ፡ ኆፃ ፡ ኀበ
፡ ሐይቀ ፡ ባሕር ።

26በዝኀ ፡ ጥበቡ ፡ ለሰሎሞን
፡ ፈድፋደ ፡ እምነ ፡ ጥበቦሙ
፡ ለኵሉ ፡ ሰብእ ፡ ቀደምት ፡ ወአምኵሉ ፡ ጥበቦሙ ፡ ለግብጽ ።

27ወጠበ ፡ እምነ
፡ ኵሉ ፡ ሰብእ ፡ ወጠበ ፡ እምነ ፡
ቤታን ፡ ዘርያዊ
፡ ወእምነ ፡ ኤናን ፡ ወእምነ
፡ ኮልቀድ ፡ ወደራል ፡ ደቂቀ ፡ ሰማድ ።

28ወነበበ ፡ ሰሎሞን
፡ ፴፻አምሳለ ፡ ወ፭፻ማሕሌቱ ።

29ወነበበ ፡ በእንተ
፡ ዕፀው ፡ ወበእንተ ፡ ዕፀወ ፡ አርዝ ፡ ዘውስተ ፡ ሊባኖስ ፡ ወበእንተ ፡ ሐምለ ፡ ህስጱ ፡ ዘይወፅአ ፡ ውስተ
፡ አረፍት ፡
ወነበበ ፡ በእንተ
፡ እንስሳሂ ፡ ወበእንተ ፡ አዕዋፍሂ ፡ ወበእንተ ፡ ዘይትሐወስ ፡ ውስተ ፡ ምድር ፡ ወበእንተ ፡ ዓሣት ።

30ወይመጽእ ፡
ኵሉ ፡ ሕዝብ ፡ ይስምዑ
፡ ጥበቦ ፡ ለሰሎሞን ፡ ወይነሥእ ፡ አምኃ ፡ እምኀበ ፡ ነገሥተ ፡ ምድር ፡ እምነ ፡ ኵሎሙ ፡ እለ ፡
ሰምዑ ፡ ጥበቦ ። 31 ወነሥአ
፡ ሰሎሞን ፡ ወለተ ፡ ፈርዖን ፡ ሎቱ ፡ ትኩኖ ፡ ብእሲቶ
፡ ወአእተዋ ፡ ውስተ ፡ ሀገረ ፡ ዳዊት ፡ እስከ ፡ የኀልቅ
፡ ቤተ ፡ እግዚአብሔር
፡ ወቤተ ፡ ዚአሁ ፡ ወአረፍተ ፡ ኢየሩሳሌም ። 32 ወይእተ ፡ አሚረ ፡ ዐርገ
፡ ፈርዖን ፡
ወአስተጋብኣ ፡ ለጋዜር ፡ ወአውዐያ ፡ በእሳት ፡ ወከናአንሂ ፡
እለ ፡ ይነብሩ ፡ ውስተ ፡ ሜርገብ ፡ ተቀትሉ ። 33 ወወሀባ
፡ ፈርዖን ፡ ለወለቱ ፡ ለብእሲተ ፡ ሰሎሞን ፡ ኪያሆን ፡ አህጉረ ፡ ወነደቃ ፡ ሰሎሞን
፡ ለጋዜር ።