ጥበበ ሲራክ 10

1ንጉሥ ፡ ጠቢብ ፡ ይጌሥጽ ፡ አሕዛቢሁ ፤ ወመኰንን ፡ ለባዊ ፡ ይገብር ፡ ሥርዐተ ።2ከመ ፡ መልአከ ፤ አሕዛብ ፡ ከማሁ ፡ ወዓሊሁ ፤ ወከመ ፡ መኰንና ፡ ለሀገር ፡ ይገብሩ ፡ እለ ፡ ውስቴታ ።3ንጉሥ ፡ አብድ ፡ ያሀጕል ፡ አሕዛቢሁ ፤ ሀገርኒ ፡ ይጸንዕ ፡ በጥበቢሆሙ ፡ ለሊቃውንት ።4ውስተ ፤ እዴሁ ፡ ለእግዚአብሔር ፡ ኵነኔሃ ፡ ለምድር ፤ . . . ። 5 . . . ፤ ወእምገጹ ፡ ለጸሓፊ ፡ ይትዐወቅ ፡ ጥበቢሁ ።6ወኵሉ ፡ ዘስሕተ ፡ ለከ ፡ ቢጽከ ፡ ኢትሒሶ ፤ ወአልቦ ፡ ዘትገብር ፡ ሕሡመ ፡ ምንተኒ ፡ በሒስከ ።7ጽሉእ ፡ ትዕቢት ፡ በኀበ ፡ እግዚአብሔር ፡ ወበኀበ ፡ እጓለ ፡ እመሕያው ፤ ወእምኵሉ ፡ ተአኪ ፡ ዐምፆ ።8መንግሥትሰ ፡ ትትፋለስ ፡ እምሕዝብ ፡ ለሕዝብ ፤ እንበይነ ፡ ዐመፃ ፡ ወእንበይነ ፡ ጋእዝ ፡ ወእንበይነ ፡ ንዋይ ።9ወለምንት ፡ እንከ ፡ ይትዔበይ ፡ መሬት ፡ ወሐመድ ፤ ዘእንዘ ፡ ሕያው ፡ ውእቱ ፡ ይጸይእ ፡ ነፍስቱ ።10ለቍስልኒ ፡ ዐቢይ ፡ ይፌውሶ ፡ ዐቃቤ ፡ ሥራይ ፤ ወንጉሥሰ ፡ ለዮም ፡ ወጌሠመሰ ፡ ይመውት ።11ወእምከመ ፡ ሞተ ፡ ሰብእ ፡ ይከውን ፡ ክፍለ ፡ ዕፄ ።12ቀዳሚሃ ፡ ለትዕቢት ፡ ታወጽእ ፡ እምነ ፡ እግዚአብሔር ፤ ወታክሕዶ ፡ እምነ ፡ ፈጣሪሁ ።13ቀዳሚሃ ፡ ለትዕቢት ፡ ኀጢአት ፤ ወለዘአጽንዓ ፡ ታበዝኅ ፡ ላዕሌሁ ፡ ርኵሰ ። ወአእንበይነ ፡ ዝንቱ ፡ ያርኢ ፡ እግዚአብሔር ፡ ፍዳሆሙ ፤ ወይገፈትኦሙ ፡ ለዝሉፉ ።14ነሠተ ፡ እግዚአብሔር ፡ መናብርቲሆሙ ለመላእክት ፤ ወሜመ ፡ የውሓነ ፡ ህየንቴሆሙ ።15ሥርዎሙ ፡ ለአሕዛብ ፡ መልኀ ፡ እግዚአብሔር ፤ ወተከለ ፡ የውሃነ ፡ ህየንቴሆሙ ።16በሓውርተ ፡ አሕዛብ ፡ ደምሰሰ ፡ እግዚአብሔር ፤ ወሠረዎሙ ፡ እስከ ፡ መሠረተ ፡ ምድር ።17ወአሰሰሎሙ ፡ ወአጥፍኦሙ ፤ ወሰዐሮሙ ፡ እምነ ፡ ምድር ፡ ዝክሮሙ ።18አኮ ፡ ለእጓለ ፡ እመሕያው ፡ ዘተፈጥረ ፡ ትዕቢት ፤ ወአኮ ፡ ለዘይትወለድ ፡ እምአንስት ፡ መዐተ ፡ መንሱት ።19ዘርእ ፡ ክቡር ፡ ዘርአ ፡ እጓለ ፡ አመሕያው ፡ አይኑ ፡ ዘርእ ፡ ክቡር ፡ (ዘርኦሙ ፡ ለእጓለ ፡ እመሕያው ፡ ለ)ፈራህያነ ፡ እግዚአብሔር ። ዘርእ ፤ ኅሱር ፡ ዘ፡ርኦሙ ፡ ለእጓለ ፡ እመሕያው ፤ አይኑ ፡ ዘርእ ፡ ኅሱር ፡ እለ ፡ ኢየዐቅቡ ፡ ትእዛዞ ።20ክቡርውእቱ ፡ መኰንን ፡ እምነ ፡ ቢጹ ፤ ወእለኒ ፡ ይፈርህዎ ፡ ለእግዚአብሔር ፡ በቅድመ ፡ አዕይንቲሁ ።22ለባዕልኒ ፡ ወለነዳይሂ ፡ ወለክቡርኒ ፤ በፈሪሀ ፡ እግዚአብሔር ፡ ይኩኖሙ ፡ ምክሖሙ ።23አኮ ፡ ርቱዕ ፡ ያስተአክይዎ ፡ ለነዳይ ፡ ጠቢብ ፤ ወአኮ ፡ ርቱዕ ፡ ያክብርዎ ፡ ለብእሲ ፡ ኃጥእ ።24ይከብሩ ፡ ዐበይትኒ ፡ ወመላእክትኒ ፡ ወመኳንንትኒ ፤ ወአልቦ ፡ እምውስቴቶም ፡ ዘየዐብዮ ፡ ለፈራሄ ፡ እግዚአብሔር ።25ነባሬ ፡ ጠቢ[በ] ፡ ንጹ[ሕ] ፡ ይትለአክ ፤ ወብእሲኒ ፡ ማእምር ፡ ኢየሐይስ ።26ኢትጠበብ ፡ እንዘ ፡ ትገብር ፡ ግብረከ ፤ ወኢትትዕበይ ፡ በመዋዕለ ፡ ተጽናስክ ።27ይኄይስ ፡ ዘይትቀነይ ፡ ወይትጌበር ፤ እምነ ፡ ዘያንሶሱ ፡ ወይመክሕ ፡ ወኢይረክብ ፡ ሲሳዮ ።28ወልድየ ፡ በየውሀትከ ፡ አስተፍሥሓ ፡ ለነፍስከ ፤ ወአስተዳልዋ ፡ በአምጣነ ፡ ትክል ።29ዘላዕለ ፡ ነፍሱ ፡ ይኤብስ ፡ ለመኑ ፡ ኄረ ፡ ይከውን ፤ ወለዘ ፡ ኢያስተዳልዋ ፡ ለነፍሱ ፡ መኑ ፡ ያአኵቶ ።30ለነዳይሰ ፡ ይንእድዎ ፡ በጥበቢሁ ፤ ወለባዕልኒ ፡ እንበይነ ፡ ብዕሉ ።31ዘአመ ፡ ይጹነስ ፡ ኢየሐዝን ፤ አመ ፡ ይዴለው ፡ እፎ ፡ ያስተፌሥሕ ።