ጥበበ ሲራክ 11

1ይከብር ፡ ነዳይ ፡ በጥበቢሁ ፤ ወይነብር ፡ ማእከለ ፡ መኳንንት ።2ኢታድሉ ፡ ለሰብእ ፡ እንበይነ ፡ ላሕዩ ፤ ወኢታስተአክዮ ፡ ለሰብእ ፡ እንበይነ ፡ ሕሥሚሁ ።3እምኵሉ ፡ አዕዋፍ ፡ ትንእስ ፡ ንህብ ፤ ወእምኵሉ ፡ ይጥዕም ፡ ፍሬሃ ።4ኢትዘኀር ፡ በሥነ ፡ አልባሲከ ፤ ወበመዋዕለ ፡ ክብርከሂ ፡ ኢታዕቢ ፡ ርእሰከ ፤ እስመ ፡ ነኪር ፡ ግብሩ ፡ ለአክግዚአብሔር ፤ ወኅቡእ ፡ እምእጓለ ፡ እመሕያው ፡ ኪኑ ።5ብዙኃን ፡ መኳንንት ፡ እለ ፡ ወድቁ ፡ ውስተ ፡ ምድር ፤ ወቦ ፡ ባሕታዊ ፡ ዘተቀጸለ ፡ አክሊለ ።6ብዙኃን ፡ ዐበይት ፡ እለ ፡ ኀስሩ ፡ ፈድፋደ ፤ ወብዙኃን ፡ ክቡራን ፡ እለ ፡ ገብኡ ፡ ታሕተ ፡ እደ ፡ ትሑት ።7ኢትሒስ ፡ ዘእንበለ ፡ ትሕትት ፤ ቅድም ፡ ጠይቅ ፡ ወድኅረ ፡ ትጌሥጽ ።8እንበለ ፡ ትስማዕ ፡ ኢታውሥእ ፤ ወውስተ ፡ ነገረ ፡ ባዕድ ፡ ኢትባእ ።9ወውስተ ፡ ዘኢኮነ ፡ ትካዝከ ፡ ኢትትለሐፍ ፤ ወኢትሰነን ፡ በቀሥተ ፡ ጊጉይ ።10ወልድየ ፡ ኢታብዝኅ ፡ ተግባረከ ፤ እስመ ፡ ለእመ ፡ አብዛኅከ ፡ ትጽደቅ ፡ ኢያበውሐከ ፤ ወኢታመሥጥ ፡ ለእመ ፡ ሮጽከ ፤ ወኢትረክብ ፡ ለእመ ፡ ዴገንከ ፡11እስመ ፡ ቦ ፡ ዘይኌጕእ ፡ ወይሰርሕ ፡ ወይጻሙ ፤ ወፈድፋደ ፡ ይጼነስ ።12ወቦ ፡ ዘእንዘ ፡ ድኩም ፡ ውእቱ ፡ ወ(ኢ)ይስእል ፡ ወኢይክል ፡ ምንተኒ ፤ ወለእመኒ ፡ ጸንዐ ፡ ወፈድፋደ ፡ ይጼነስ ፤ ወአመ ፡ ነጸሮ ፡ እግዚአብሔር ፡ በሠናይ ፤ ያነሥኦ ፡ እምተጽናሱ ፤13ወያዐብዮ ፡ ወያከብሮ ፡ ወያነክርዎ ፤ ብዙኃን ።14ሠናይትኒ ፡ ወእኪትኒ ፡ ሐይውሂ ፡ ወመዊትኒ ፡ ነዲይኒ ፡ ወብዒልኒ ፡ እምኀበ ፡ እግዚአብሔር ።17ጸጋሁ ፡ ለእግዚአብሔር ፡ ትዜውሮሙ ፡ ለጻድቃን ፤ ወፈቃዱ ፡ ያስተፌሥ[ሕ] ፡ ለዓለም ።18ሀለወ ፡ ዘይብዕል ፡ በብዝኀ ፡ ጠዊዕ ፡ ወእንዘ ፡ ይቄቂ ፤ ወባቲ ፡ ይሰልጥ ፡ ትፍሥሕቶ ።19ወአመ ፡ ተሰፈወ ፡ ያዕርፍ ፤ ወአመ ፡ ይብል ፡ እበልዕ ፡ ወእንከሰ ፡ እፈግዕ ፤ ወአእከልኩ ፤ ወኢያአምር ፡ ዕለተ ፡ እንተ ፡ ትበጽሖ ፤ ወየኀድግ ፡ ኵሎ ፡ ለባዕድ ፡ ወይመውት ፡ ውእቱ ።20ቁም ፡ በሥርዐትከ ፡ ወቦቱ ፡ ተመሀር ፤ ወርሣእ ፡ በተግባርከ ።21ወኢያፍቱከ ፡ ግብሮሙ ፡ ለኃጥኣን ፤ ተአመን ፡ በእግዚአብሔር ፡ ወተሰፈው ፡ ጻማከ ። እስመ ፡ ቀሊል ፡ በኀበ ፡ እግዚአብሔር ፡ (ኵሉ ፡) ለምዕር ፡> ወግብተ ፡ ያብዕሎ ፡ ለነዳይ ። < 22 በበረከተ ፡ እግዚአብሔር ፡ ዕሴቶሙ ፡ ለጻድቃን ፤ ወትትባዛኅ ፡ በረከቱ ፡ ለጻድቅ ።23ወኢትበል ፡ ኢይፈቅድ ፡ እንከ ፤ ወኢትበል ፡ አልብየ ፡ ዕስየተ ፡ እንከ ፤24እምይእዜሰ ፡ አከለኒ ፤ ወእምይእዜሰ ፤ ኢይጼነስ ፡ እንከ ፡25አመ ፡ ዕለተ ፡ ሠናይት ፡ ይረስዕዋ ፡ ለእኪት ፤ ወአመ ፡ ዕለተ ፡ እኪት ፡ ይረስዕዋ ፡ ለሠናይት ።26እስመ ፡ ቀሊል ፡ በኀበ ፡ እግዚአብሔር ፡ ዕለተ ፡ ሞት ፡ እስመ ፡ ይፈድዮ ፡ ለሰብእ ፡ በከመ ፡ ግዕዙ ።27በእኪት ፡ ዕለት ፡ ይከሪ ፡ ጽጋብ ፤ ወበደኃሪቱ ፡ ለሰብእ ፡ ይትዐወቅ ፡ ምግባሩ ።28ወኢትበሎ ፡ ብጹዕ ፡ ዘእንበለ ፡ ትርአይ ፡ ደኃሪቶ ፤ ወበላዕለ ፡ ውሉዱ ፡ ያስተርኢ ፡ ንብረቱ ፡ ለሰብእ ።29ኢታብእ ፡ ኵሎ ፡ ሰብአ ፡ ዘረከብከ ፡ ውስተ ፡ ቤትከ ፤ እስመ ፡ በብዙኅ ፡ ይጤበበከ ፡ ጕሕልያ ።30ቆቃሕ ፡ ተሠግረ ፡ በቈጽለ ፡ አሥርቆ ፤ ከማሁ ፡ ልቡ ፡ ለዕቡይ ፤ ወከመ ፡ ሰብአ ፡ ዐይን ፡ ይትሐዘባ ፡ ለድቀቱ ።31ወመጠነ ፡ ሠናይት ፡ እኪተ ፡ የዐስየከ ፡ ጕሕልያ ፤ ወይገብር ፡ ለከ ፡ ነውረ ፡ በዘአልብከ ።32በብዝኀ ፡ ትንታጉ ፡ ለ[ሐው] ፡ ይበዝኅ ፡ ፍሕሙ ፤ ወብእሲሰ ፡ ኃጥእ ፡ ይንዕዋ ፡ ለነፍስ ።33ተዐቀብ ፡ እምነ ፡ እኩይ ፡ እስመ ፡ እኩየ ፡ ይፈጥር ፤ ከመ ፡ ኢይግበር ፡ ለዝሉፉ ፡ ጽዕለተ ፡ ላዕሌከ ።34ለእመ ፡ አኅደርከ ፡ ነኪረ ፡ ምስሌከ ፡ የሀውከከ ፡ ወያዐልወከ ፤ ወያወፅአክ ፡ እምንዋይከ ።