ጥበበ ሲራክ 16

1ወኢትፍቅድ ፡ ብዙኀ ፡ ውሉደ ፡ እለ ፡ አልቦሙ ፡ በቍዐ ፤ ወኢትትፈሣሕ ፡ በእኩይ ፡ ውሉድ ።2ወለእመኒ ፡ በዝኁ ፡ ኢትትፈሣሕ ፡ ቦሙ ፤ ለእመ ፡ አልቦሙ ፡ ፍርሀተ ፡ እግዚአብሔር ፡ ላዕሌሆሙ ።3ኢትትአመኖሙ ፡ በሕይወቶሙ ፤ ወኢያስተፍሥሕከ ፡ ብዝኆሙ ። ይኄይስ ፡ አሐዱ ፡ እምዐሠርቱ ፡ ምእት ፤ ወይኄይስ ፡ መዊት ፡ ዘእንበለ ፡ ውሉድ ፡ እምወሊደ ፡ እኩይ ።4እስመ ፡ በ፩ጠቢብ ፡ ትጸንዕ ፡ ሀገር ፤ ወሕዝቦሙሰ ፡ ለኃጥኣን ፡ ይጠፍኡ ።5ብዙኀ ፡ ዘከመዝ ፡ ርእየት ፡ ዐይንየ ፤ ወዘየዐቢ ፡ እምዝ ፡ ሰምዐት ፡ እዝንየ ።6ውስተ ፡ ማኅበሮሙ ፡ ለኃጥኣን ፡ ትነድድ ፡ እሳት ፤ ወላዕለ ፡ ሕዝብ ፡ ዐላዊያን ፡ ትነድድ ፡ መዐት ።7ወቀደምትኒ ፡ እለ ፡ ይርባሕ ፡ ኢያድኀኑ ፡ ነፍሶሙ ፤ እለ ፡ ተአመኑ ፡ በኀይሎሙ ።8ወኢመሐካ ፡ ለብሔር ፡ ኀበ ፡ ነበረ ፡ ሎጥ ፤ እለ ፡ አዕበዩ ፡ ርእሶሙ ፡ ወአስቆረርዎ ፡ ለሎጥ ።9ወኢተሣሀሎ ፡ ለሕዝብ ፡ ኃጥእ ፤ እለ ፡ ተሠርዉ ፡ በኀጢአቶሙ ፤10ስሳ ፡ እልፍ ፡ አጋር ፡ እሙንቱ ፤ እለ ፡ ተጋብኡ ፡ ወአእከዩ ፡ ልቦሙ ።11ወእመኒቦ ፡ አሐዱ ፡ ዘአግዘፈ ፡ ክሳዶ ፤ ወውእቱኒ ፡ ነኪር ፡ ለእመ ፡ ድኅነ ፤ እስመ ፡ ሣህልኒ ፡ ወመቅሠፍትኒ ፡ እምኀቤሁ ፤ ወይክል ፡ ተሣህሎ ፡ ወይክል ፡ አምጽኦ ፡ መቅሠፍት ።12በአምጣነ ፡ ብዝኀ ፡ ምሕረቱ ፡ ከማሁ ፡ ተግሣጹ ፤ ወይፈድዮ ፡ ለሰብእ ፡ በከመ ፡ ምግባሩ ።13ወኢያመሥጥ ፡ ኃጥእ ፡ እምነ ፡ ዳሕፍ ፤ ወኢየሀጕል ፡ ጸድቅ ፡ ዕሴተ ፡ ትዕግሥቱ ።14ኵሉ ፡ ምጽዋት ፡ ሣህለ ፡ ያመጽእ ፤ ወኵሉ ፡ ሰብእ ፡ ይረክብ ፡ ዘከመ ፡ ግዕዙ ።17ኢትበል ፡ ኣመሥጥ ፡ እምእግዚአብሔር ፤ ወአልቦ ፡ ዘይረክበኒ ፡ በሰማያት ፤ ወበውስተ ፡ ብዙኅ ፡ አሕዛብ ፡ አልቦ ፡ ዘያአምረኒ ፤ ወምንትኑ ፡ ኈልቋ ፡ ለነፍስየ ፡ በውስተ ፡ ኵሉ ፡ ዓለም ።18ናሁ ፡ ሰማይ ፡ ወሰማይኒ ፡ ዘመልዕልተ ፡ ሰማይ ፡ ወቀላይኒ ፡ ወምድርኒ ፤ ኵሉዝ ፡ ያድለቀልቅ ፡ እምከመ ፡ ሐወጾሙ ።19ወአድባርሂ ፡ ወመሠረተ ፡ ምድርኒ ፤ እምክመ ፡ ነጸሮሙ ፡ ይርዕዱ ፡ ወያድለቀልቁ ።20ወበዝኒ ፡ ኢይኈልዮ ፡ ልብ ፤ መኑ ፡ ይክል ፡ አእምሮ ፡ ፍናዊሁ ።21ወዐውሎሂ ፡ ዘኢይሬኢ ፡ እጓለ ፡ እመሕያው ፤ ወዘይበዝኅ ፡ ግብሩ ፡ ኅቡእ ፡ ውእቱ ።22ግብረ ፡ ጽድቅ ፡ መኑ ፡ ይሜህር ፤ ወመኑ ፡ ይጸንሕ ፡ ተስፋሃ ፡ ለምሕረቱ ።23ሕጹጸ ፡ ልብ ፡ ይኄሊ ፡ ከመዝ ፤ ብእሲ ፡ አብድ ፡ ወጊጉይ ፡ ይኄሊ ፡ እበደ ።24ስምዐኒ ፡ ወልድየ ፡ ወተመሀር ፡ ጥበበ ፤ ወአፅምእ ፡ እምልብከ ፡ ለነገርየ ።25አርእያ ፡ ለጥበብከ ፡ ደሊወከ ፡ በመዳልው ፤ ወጠይቅ ፡ ነገራ ፡ ለትምህርትክ ።26ግብሩ ፡ ለእግዚአብሔር ፡ ተፈጥረ ፡ በኵነኔሁ ፤ ወፈለጦሙ ፡ ሥርዐቶሙ ፡ በበ ፡ በሓውርቲሆሙ ።27ወሠርዐ ፡ ኵሎ ፡ ግብሮ ፡ በዘይቀውም ፡ ዓለም ፤ ወአሕዛቢሆሙ ፡ በበፍጥረቶሙ ፤ ዘኢይጸምእ ፡ ወዘኢይርኅብ ፡ ወዘኢየኀልቅ ፡ ግብሮሙ ፤28ወኢይጠወቅ ፡ አሐዱ ፡ ምስለ ፡ ካልኡ ፤ ወለዓለም ፡ ኢይትገሐሡ ፡ እምነ ፡ ቃሉ ።29ወእምዝ ፡ ነጸረ ፡ እግዚአብሔር ፡ ውስተ ፡ ምድር ፤ ወአጽገባ ፡ እምነ ፡ (ኵሉ ፡) በረከቱ ።30መንፈሰ ፡ ኵሉ ፡ ዘሕያው ፡ መልአ ፡ ላዕለ ፡ ምድር ፤ ወውስተ ፡ ምድር ፡ ምግባኢሆሙ ።