ጥበበ ሲራክ 17

1እግዚአብሔር ፡ ፈጠሮ ፡ ለእጓለ ፡ እመሕያው ፡ እምነ ፡ ምድር ፤ ወካዕበ ፡ ያገብኦ ፡ ውስቴታ ።

2ወወሀቦሙ ፡ ዓመተ ፡ መዋዕለ ፡ ኍልቍ ፤ ወአኰነኖሙ ፡ ኵሎ ፡ ዘውስቴታ ።

3ወአልበሶሙ ፡ ኀይለ ፡ ዘዘዚአሆሙ ፤ ወበአምሳለ ፡ ዚአሁ ፡ ገብሮሙ ።

4ወገብረ ፡ ሎሙ ፡ ይፍርህዎሙ ፡ ኵሉ ፡ ዘነፍስ ፤ ወይቅንይዎሙ ፡ ለአራዊት ፡ ወለአዕዋፍ ።

6ወወሀቦሙ ፡ ቃለ ፡ ወልሳነ ፡ ወዐይነ ፤ ወእዝነ ፡ ወልበ ፡ በዘ ፡ ይኄልዩ ።

7አእምሮ ፡ ጥበብ ፡ አጽገቦሙ ፤ ወአርአዮሙ ፡ እኪተኒ ፡ ወሠናይተኒ ።

8ወወደየ ፡ ውስተ ፡ ልቦሙ ፡ ፍርሀተ ፤ ከመ ፡ ያርእዮሙ ፡ ዕበየ ፡ ግብሩ ፤

10ከመ ፡ ይሰብሕዎ ፡ ለስሙ ፡ ቅዱስ ፤

9ከመ ፡ ይትናገሩ ፡ በዕበየ ፡ ግብሩ ።

11ወወሀቦሙ ፡ ጥበበ ፤ ወሕገ ፡ ዘያሐይዎሙ ፡ አውረሶሙ ።

12ኪዳነ ፡ ዘለዓለም ፡ ተካየዶሙ ፤ ወነገሮሙ ፡ ኵነኔሁ ።

13ወዕበየ ፡ ስብሐቲሁ ፡ ርእያ ፡ አዕይንቲሆሙ ፤

14ወይቤሎሙ ፡ ተዐቀቡ ፤ እምኵሉ ፡ ዐመፃ ፡

13ወቃለ ፡ ስብሐቲሁ ፡ ሰምዐት ፡ እዝኖሙ ፤

14ወአዘዞሙ ፡ ለኵሎሙ ፡ በእንተ ፡ ቢጾሙ ።

15ወቅድሜሁ ፡ ፍናዊሆሙ ፡ በኵሉ ፡ ጊዜ ፡ ወአልቦሙ ፡ ኀበ ፡ ይትኀብኡ ፡ እምነ ፡ አዕይንቲሁ ።

17ወለኵሎሙ ፡ አሕዛብ ፡ ሤመ ፡ ሎሙ ፡ ነገሥተ ፤ ወእስራኤል ፡ ኮነ ፡ ክፍለ ፡ እግዚአብሔር ።

19ወኵሉ ፡ ግብሮሙ ፡ ከመ ፡ ፀሓይ ፡ በቅድሜሁ ፤ ወአዕይንቲሁ ፡ ዘልፈ ፡ ይኔጽራ ፡ ፍናዊሆሙ ።

20ወኢይትኀባእ ፡ ኀጢአቶሙ ፡ እምኔሁ ፤ ወኵሉ ፡ ጌጋዮሙ ፡ ቅድመ ፡ እግዚአብሔር ።

22ምጽዋቱ ፡ ለሰብእ ፡ ከመ ፡ ማኅተም ፡ ምስሌሁ ፤ ዕሴቱ ፡ ለሰብእ ፡ ከመ ፡ ብንተ ፡ ዐይን ፡ ትትዐቀብ ፡ ሎቱ ።

23ወድኅረ ፡ ይትመየጦ ፡ ወየዐስዮ ፤ ወፍዳ ፡ ኀጢአቶሙ ፡ ያገብእ ፡ ላዕለ ፡ ርእሶሙ ።

24ወባሕቱ ፡ ወሀቦሙ ፡ ፍኖተ ፡ በዘ ፡ ይኔስሑ ፤ ወያስተፌሥሖሙ ፡ ለእለ ፡ ቀብጹ ፡ ተስፋሆሙ ።

25ተመየጥ ፡ ኀበ ፡ እግዚአብሔር ፤ ወ[ኅድጋ ፡ ለኀጢአት] ፤ ተጋነይ ፡ ቅድሜሁ ፡ ወነስሕ ፡ አበሳከ ።

26ወግባእ ፡ ኀበ ፡ ልዑል ፡ ወተመየጥ ፡ እምነ ፡ ዕመፃ ፤ ወጽላእ ፡ ኵሎ ፡ ርኩሰ ፡ [ፈድፋደ] ።

27መኑ ፡ ይሴብሖ ፡ ለልዑል ፡ በመቃብር ፤ ከመ ፡ ሕያዋን ፡ እለ ፡ ይትጋነዩ ፡ ሎቱ ።

28ወለዘ ፡ ሞተሰ ፡ ወኢከመ ፡ ምንትሂ ፡ ንስሓ ፡ ኀለፎ ፤ በሕይወትክ ፡ እንዘ ፡ ትትፌሣሕ ፡ ሰብሖ ፡ ለእግዚአብሔር ።

29እስመ ፡ ዐቢይ ፡ ምሕረቱ ፡ ለእግዚአብሔር ፤ ወይሣሀሎሙ ፡ ለእለ ፡ ይትጋነዩ ፡ ሎቱ ።

30እስመ ፡ ኢይክል ፡ ኵሎ ፡ ከዊነ ፡ እጓለ ፡ አመሕያው ፤ እስመ ፡ መዋቲ ፡ ውእቱ ፡ እጓለ ፡ እመሕያው ።

31ምን[ት] ፡ ይበርህ ፡ እምነ ፡ ፀሓይ ፤ ወውእቱሂ ፡ ይጠፍእ ፤ ወእኩየ ፡ ይኄሊ ፡ ዘሥጋ ፡ ወደም ።

32ወውእቱሰ ፡ (ኢ)ያአምር ፡ ኀይለ ፡ ልዕልና ፡ ሰማያት ፤ ወእጓለ ፡ እመሕያውሰ ፡ ኵሉ ፡ ሐመድ ፡ ወመሬት ፡ ውእቱ ።