ጥበበ ሲራክ 21

1ወልድየ ፡ ለእመቦ ፡ ዘአበስከ ፡ (ወተስሕተከ ፡) ኢትድግም ፡ ዑቅ ፡ እንከ ፤ ወተጋነይ ፡ እንበይነ ፡ ዘቅድም ፡ ጌጋይከ ።

2ወከመ ፡ ዘይጐይይ ፡ እምአርዌ ፡ እኩይ ፤ ከማሁ ፡ ጕየይ ፡ እምኀጢአት ፤ ወእመሰ ፡ አድምዐተከ ፡ ኢታወጽአከ ፤ ከመ ፡ ስነነ ፡ ዐንበሳ ፡ ስነኒሃ ፤ ወታኀልቅ ፡ ነፍሰ ፡ እጓለ ፡ እመሕያው ።

3ከመ ፡ መላጼ ፡ በሊኅ ፡ ዘክልኤ ፡ አፉሁ ፡ ከማሁ ፡ ኵሉ ፡ ኀጢአት ፡ ወኀበኒ ፡ አቍሰለት ፡ አልባቲ ፡ ፈውሰ ፡ ቍስላ ።

4ትዝኅርት ፡ (ወምክሕ ፡) ወትዕቢት ፡ ያማስኖ ፡ ለባዕል ፤ ከማሁ ፡ ይማስን ፡ ቤቶሙ ፡ ለዕቡያን ።

5ሶበ ፡ ይስእል ፡ ነዳይ ፡ ያበቁ ፡ እስከ ፡ እዘኔሁ ፤ ወገዓሩኒ ፡ ፍጡነ ፡ ይበጽሕ ።

6ዘይጸልእ ፡ ተግሣጸ ፡ ተለዎሙ ፡ ለኃጥኣን ፤ ወዘሰ ፡ ይፈርህ ፡ እግዚአብሔር ፡ እምከመ ፡ ገሠጽዎ ፡ ይመይጥ ፡ ልቦ ።

7ይትዐወቅ ፡ እምርሑቅ ፡ ዘይክል ፡ ነቢበ ፤ ወለጠቢብሰ ፡ ይትዐወቆ ፡ ዘተስሕቶ ።

8ዘየሐንጽ ፡ ቤቶ ፡ በንዋየ ፡ ልቃሕ ፤ ከመ ፡ ንድቀ ፡ ክረምት ፡ ሕንጻሁ ።

9ከመ ፡ ከምረ ፡ ሐሠር ፡ ከማሁ ፡ ማኅበሮሙ ፡ ለኃጥኣን ፤ ወደኃሪቶሙ ፡ ለነደ ፡ እሳት ፡ ይከውኑ ።

10መብእስ ፡ እበኒሃ ፡ ለፍኖተ ፡ ኃጥኣን ፤ ወጸድፍ ፡ ሙፃእታ ።

11ዘአጽንዐ ፡ ልቦ ፡ የዐቅብ ፡ ሕገ ፡ እግዚአብሔር ፤ ወደኃሪሃ ፡ ለፍርሀተ ፡ እግዚአብሔር ፡ ጥበብ ።

12ወኢይጠብብ ፡ ዘኢተመ[የነ] ፤ ሀለወ ፡ ዘይትሜ[የን] ፡ ወይትዌሰኮ ፡ ኀሳሩ ።

13ኅሊናሁ ፡ ለጠቢብ ፡ ብዙኅ ፡ ከመ ፡ ማየ ፡ አይኅ ፤ ወምክሩኒ ፡ ይነቅዕ ፡ ከመ ፡ ማየ ፡ ሕይወት ።

14ልቡ ፡ ለአብድ ፡ ከመ ፡ ጻሕብ ፡ ስቁር ፤ ወኢይክል ፡ ዐቂበ ፡ ኵሎ ፡ ነገረ ፡ ዘሰምዐ ።

15ነገረ ፡ ጠቢብ ፡ እምከመ ፡ ሰምዐ ፡ ለባዊ ፡ ይንእዶ ፤ ወይዌስክ ፡ ዓዲ ፡ በዲቤሁ ፤ ወእኩይሰ ፡ ልብ ፡ እምከመ ፡ ሰምዖ ፡ ይቀይእ ፤ ወያገብኦ ፡ ድኅረ ፡ ዘባኑ ።

16ነገሩ ፡ ለአብድ ፡ ከመ ፡ ጾር ፡ (ክቡድ ፡) በውስተ ፡ ፍኖት ፡ (ርሑቅ) ፤ ወሠናይ ፡ ሞገሶን ፡ ለከናፍረ ፡ ጠቢብ ።

17ቃለ ፡ ጠቢብ ፡ ይሰማዕ ፡ በውስተ ፡ እንግልጋ ፤ ወነገሩሂ ፡ ይበውእ ፡ ውስተ ፡ ልብ ።

18ከመ ፡ ቤተ ፡ መዝብር ፡ ከማሁ ፡ ጥበብ ፡ በኀበ ፡ አብዳን ፤ ወምክሩሰ ፡ ለአብድ ፡ ዘኢይትፈቀድ ፡ ነገር ።

19ከመ ፡ እግር ፤ ሙቁሕ ፡ ከማሁ ፡ ት[ም]ህርቶሙ ፡ ለአብዳን ፤ ወከመ ፡ ዘእሱር ፡ እዴሁ ፡ ዘየማን ፡ (ከማሁ ፡ ፅቡስ ፡ ልቡ ፡ ለአብድ ።) 20 ለበ ፡ ይሥሕቅ ፡ አብድ ፡ ያዐቢ ፡ ቃሎ ፤ ወጠቢብሰ ፡ እምዕጹብ ፡ ያክሞስስ ፡ ከናፍሪሁ ።

21ከመ ፡ ሰርጐ ፡ ወርቅ ፡ ከማሁ ፡ ጥበብ ፡ በኀበ ፡ ለባዊ ፤ ወከመ ፤ ድጕልማ ፡ ውስተ ፡ እደ ፡ የማን ።

22እግሩ ፡ ለአብድ ፡ ፍጡነ ፡ ትገብእ ፡ ውስተ ፡ ቤት ፤ ወብእሲሰ ፡ ዘበኵሉ ፡ ተጐድአ ፡ የኀፍር ፡ ገጾ ።

23ወአብድሰ ፡ እምኆኅት ፡ ይሔውጽ ፡ ቤተ ፡ ባዕድ ፤ ወብእሲሰ ፡ ጠቢብ ፡ አፍአ ፡ ይቀውም ።

24እበዲሁ ፡ ለሰብእ ፡ እምአፍአ ፡ ትሰማዕ ፤ ወበኀበ ፡ ጠቢብሰ ፡ ዕጹብ ፡ አስተሐቅሮ ።

25ወበኀበ ፡ ነኪር ፡ ዕጹብ ፡ ዝነገር ፤ ቃሎሙ ፡ ለጠቢባን ፤ ድሉት ፡ በመዳልው ።

26ወለአብዳንሰ ፡ ውስተ ፡ አፉሆሙ ፡ ልቦሙ ፤ ወምክሮሙ ፡ ለጠቢባን ፡ ቃለ ፡ አፉሆሙ ።

27ሶበ ፡ ይረግሞ ፡ ኃጥእ ፡ ለጋኔን ፤ ለሊሁ ፡ ነፍሰ ፡ እንቲአሁ ፡ ይረግም ።

28ወዘየሐሚ ፡ ለሊሁ ፡ ነፍሶ ፡ ይጌምን ፤ ወያጸልእ ፡ ርእሶ ፡ በኀበ ፡ ኀደረ ።