ጥበበ ሲራክ 20

1ሀለወ ፡ ዘይጌሥጽ ፡ እንዘ ፡ ኢኮነ ፡ ለሠናይ ፤ ወሀለወ ፡ ዘያረምም ፡ እንዘ ፡ ጠቢብ ፡ ውእቱ ።

2ይኄይስ ፡ ትገሥጽ ፡ እምትሒስ ፤ ወቦ ፡ ዘይትጋነይ ፡ እስመ ፡ በኀጢኡ ፡ ተስእኖ ።

4ከመ ፡ ይፈቱ ፡ ኅጽው ፡ ወለተ ፡ ድንግለ ፤ ከማሁ ፡ ዘይፈቱ ፡ የዐምፅ ፡ ፍትሐ ።

5ወቦ ፡ እንዘ ፡ ያአምር ፡ ዘያረምም ፤ ወቦ ፡ ዘያጸልእ ፡ ርእሶ ፡ በብዝኀ ፡ ነቢቡ ።

6ወቦ ፡ ዘያረምም ፡ እስመ ፡ ኢያአምር ፡ ዘያወሥእ ፤ ወቦ ፡ ዘያረምም ፡ እስከ ፡ ይረክብ ፡ ጊዜሁ ።

7ወብእሲ ፡ ጠቢብ ፡ ያረምም ፡ እስከ ፡ ይረክብ ፡ ጊዜሁ ፤ ወአብድሰ ፡ ወዝሉፍ ፡ በከመ ፡ ረከበ ፡ ይነብብ ።

8ለዘያበዝኅ ፡ ነቢበ ፡ ይትቌጥዕዎ ፤ ወለዘሂ ፡ ያዐቢ ፡ ርእሶ ፡ ይጸልእዎ ።

9ቦ ፡ ሰብእ ፡ ዘምንዳቤሁ ፡ ያ[ሤ]ኅቶ ፤ ወቦ ፡ ዘእንዘ ፡ ይረክብ ፡ ኢይነብሮ ።

10ቦ ፡ ዘይሁበከ ፡ ዘኢይበቍዐከ ፤ ወቦ ፡ ዘይሁበከ ፡ ወካዕበቶ ፡ ይትፈደየከ ።

11ወቦ ፡ ዘእንዝ ፡ ይጼነስ ፡ ያዐቢ ፡ ርእሶ ፤ ወቦ ፡ ዘይከብር ፡ በአትሕቶ ፡ ርእሱ ።

12ወቦ ፡ ዘይሠይጥ ፡ ብዙኀ ፡ በኅዳጥ ፤ ወየኀሥሥ ፡ ይረስዮ ፡ ምስብዒቶ ።

13ዘጠቢብ ፡ በቃሉ ፡ ያስተቄርብ ፡ ርእሶ ፤ ጸጋሆሙ ፡ ለአብዳን ፡ አልባቲ ፡ ሞገስ ።

14ይሁብ ፡ አብድ ፡ ዘአልቦቱ ፡ በቍዐ ፤ ለእመኒ ፡ ኅዳጠ ፡ ወሀበ ፡ ብዙኀ ፡ ይመስሎ ፡ ለልቡ ፡ ዘጸገወከ ።

15ወእመኒ ፡ ኅዳጠ ፡ ወሀበከ ፡ ከመ ፡ ዘብዙኀ ፡ ወሀበከ ፡ ይዘረክየከ ፤ ወያዐቢ ፡ አፉሁ ፡ ላዕሌከ ፡ ወየዐውድ ፡ ይንግር ፡ ለከ ፡ ዘወሀበከ ። ዮም ፡ ለእመ ፡ ወሀበከ ፡ ጌሠመ ፡ ይትፈደየከ ፤ መጽልእ ፡ ዘከመዝ ፡ ሰብእ ።

16አብድሰ ፡ ይብል ፡ ኢይፈቅድ ፡ ዐርከ ፡ ምንተ ፡ ይበቍዐኒ ፤ እስመ ፡ ኢይረክብ ፡ ዕሴተ ፡ እንተ ፡ ገበርኩ ፡ ሠናይተ ፤ እለኒ ፡ ይሴሰዩ ፡ እክልየ ፡ ያሐሥሙ ፡ አፉሆሙ ፡ ላዕሌየ ፤

17ወዘልፈ ፡ ኵሎሙ ፡ የሐምዩኒ ፡ ወይሥሕቁ ፡ ዲቤየ ።

18ይኄይስ ፡ ትድኀፅ ፡ ወትደቅ ፡ ዲበ ፡ ምድር ፤ እምትድኀፅ ፡ (በአፉከ ፡) ወትደቅ ፡ በልሳንከ ፤ ከማሁ ፡ ድቀ[ተ ፡ እኩይ ፡] ፍጡነ ፡ ትመጽእ ።

19ወዘሰ ፡ ይነብብ ፡ በከመ ፡ ረከበ ፡ ያለስሕ ፡ ርእሶ ፡ ወአልቦ ፡ ሞገሰ ፡ ቃሉ ፤ ውስተ ፡ አፉሆሙ ፡ ለአብዳን ፡ ልሱሕ ፡ ነገር ።

20ወውስተ ፡ አፉሁ ፡ ለአብድ ፡ ይለስሕ ፡ አምሳል ፤ እስመ ፡ ኢይነግራ ፡ በጊዜሃ ።

21ወቦ ፡ ለእመ ፡ ከመ ፡ ተጸነሰ ፡ ዘይትመየጥ ፡ ውስተ ፡ ፍርሀተ ፡ እግዚአብሔር ፤ ወሎቱ ፡ በሠናይ ፡ ታዐርፍ ፡ ነፍሱ ።

22ወቦ ፡ ዘበኀፍረት ፡ ያሀጕል ፡ ነፍሶ ፤ ወበእበዲሁ ፡ ይገድፍ ፡ ነፍሶ ።

23ወቦ ፡ ዘበኀፍረት ፡ ያስተሴፍዎ ፡ ለማኅፈሩ ፡ (እንዘ ፡ ኢይሁቦ) ፤ ወእንበይነዝ ፡ ጸላኤ ፡ ይከውኖ ፡ በከንቱ ።

24እኪት ፤ ኀሳሩ ፡ ለብእሲ ፡ ሐሳዊ ፤ ልሱሕ ፡ ነገሮሙ ፡ ለአብዳን ።

25ይኄይስ ፡ ሰራቂ ፡ እምሐስዎ ፤ ወባሕቱ ፡ ለክልኤሆሙ ፡ ሞት ፡ ደኃሪቶሙ ፡ ወኀሳር ።

26እስመ ፡ ሐሳዊ ፡ ሰብእ ፡ የኀስር ፡ ወይትኀፈር ፡ ለዝሉፉ ።

27ዘጠቢብ ፡ ውእቱ ፡ በቃሉ ፡ ይሰማዕ ፡ ነገሩ ፤ ወብእሲ ፡ ጠቢብ ፡ ያሰልጥ ፡ ለመኳንንቲሁ ።

28ዘይትጌበራ ፡ ለምድር ፡ ያዐብያ ፡ ለክምረ ፡ እክሉ ፤ ወዘይፀመድ ፡ መኳንንቲሁ ፡ ይበቍዕ ፡ ለርእሱ ።

29አምኃ ፡ ወሕልያን ፡ ያዐውሮሙ ፡ አዕይንቲሆሙ ፡ ለጠቢበባን ፤ ወይፈፅም ፡ አፉሆሙ ፡ ወይመይጦሙ ፡ ቃሎሙ ።

30ጥበብ ፡ ዘኅቡእ ፡ ከመ ፡ መድፍን ፡ ክቡት ፤ ምንት ፡ እንከ ፡ ረባሖሙ ፡ ለክልኤሆሙ ።

31ይኄይስ ፡ አብድ ፡ ዘየኀብእ ፡ እበዲሁ ፤ እምጠቢብ ፡ ዘይከብት ፤ ጥበቢሁ ።