ጥበበ ሲራክ 28

1ዘይትዔገሦ ፡ ለእግዚአብሔር ፡ ይትቤቀል ፡ ሉቱ ፤ ወኀጢአቶ ፡ የኀድግ ፡ ሎቱ ።

2ኅድግ ፡ ሎቱ ፡ ለቢጽከ ፡ ዘተሐይሶ ፤ ወይእተ ፡ ጊዜ ፡ እምከመ ፡ ተጋነይከ ፡ ይሰሪ ፡ ለከ ፡ ኀጢአተከ ።

3ሶበ ፡ አንተ ፡ እንዘ ፡ ሰብእ ፡ አንተ ፡ ትትቄየም ፡ ሰብአ ፡ (ዘከማከ) ፤ እፎ ፡ እንከ ፡ ተሣሀለኒ ፡ ትብሎ ፡ ለእግዚአብሔር ።

4እንዘ ፡ ኢታስተምሕር ፡ ሰብአ ፡ ከማከ ፤ አፎ ፡ ትስእሎ ፡ ይስረይ ፡ ለከ ፡ ኀጢአተከ ። 5 . . . . . 6 ተዘከር ፡ [ደኃሪተከ ፡] ወኅድጋ ፡ ለጽልእ ፤ ተዘከሮ ፡ ለሞት ፡ ወለሙስና ፡ ወዕቀብ ፡ ትእዛዞ ።

7ተዘከር ፡ ሕጎ ፡ ወኢትትቀየም ፡ ቢጸከ ፤ ተዘከር ፡ ኵነኔሁ ፡ ለልዑል ፡ ወአሰስላ ፡ ለመዐት ።

8ኅድጎ ፡ ለጋእዝ ፡ ወታውኅዶን ፡ ለኀጣውኢከ ፤ ብእሲ ፡ መዐትም ፡ ያፈልሖ ፡ ለላኳ ።

9ወብእሲ ፡ ኃጥእ ፡ ያሰርሕ ፡ ቢጾ ፤ ወያስተዳጕጽ ፡ ማእከለ ፡ አዕርክት ።

10በአምጣነ ፡ ዕፁ ፡ ለእሳት ፡ የዐቢ ፡ ነዱ ፤ ወበአምጣነ ፡ ዕበየ ፡ ጋእዙ ፡ ከማሁ ፡ ይፈልሕ ፡ ላኳሁ ፤ በአምጣነ ፡ ኀይሉ ፡ ለሰብእ ፡ [ቂ]ሙ ፤ ወበአምጣነ ፡ ብዕሉ ፡ ከማሁ ፡ ያዐብያ ፡ ለመዐቱ ።

11ዘያልሕሓ ፡ ለትዝኅርቱ ፡ ያነድዳ ፡ ለእሳት ፤ ወዘይጔጕእ ፡ ለጋእዝ ፡ ያፈጥን ፡ ክዒወ ፡ ደም ።

12እመ ፡ ነፋሕካ ፡ ለፍሕም ፡ ትነድድ ፤ ወእመ ፡ ወረቃ ፡ ትጠፍእ ፤ ወክልኤሆሙ ፡ እምውስተ ፡ አፍ ፡ ይወጽኡ ።

13ለሐማዪ ፡ ወለዘ ፡ ክልኤቱ ፡ ልሳኑ ፡ ይረግምዎ ፤ እስመ ፡ ብዙኃነ ፡ አዕርክተ ፡ አስተቃተለ ።

14ልሳን ፡ መስተዳጕጽ ፡ ሆኮሙ ፡ ለብዙኃን ፤ ወአስተፋለሶሙ ፡ እምሕዝብ ፡ ውስተ ፡ ሕዝብ ፤ ወአህጉረ ፡ ጽኑዓተ ፡ አመዝበረት ፤ ወአብያቲሆሙ ፡ ለዐበይት ፡ አውደቀት ።

15ልሳን ፡ ነባቢት ፡ ሰደደቶን ፡ ለአንስት ፡ እምአብያተ ፡ አምታቲሆን ፤ ወአህጐለቶን ፡ ጻማሆን ።

16ወዘሰ ፡ ኢተዐቀበ ፡ ኢያዐርፍ ፡ ለዝላፉ ፤ ወኢይነብር ፡ በሰላም ።

17ቍስለ ፡ መቅሠፍት ፡ ይገብር ፡ አምግልተ ፤ ወቍስለ ፡ ልሳን ፡ ይሰብር ፡ አዕፅምተ ።

18ብዙኃን ፡ እለ ፡ ወድቁ ፡ በኀጺን ፤ ወአኮ ፡ ከመ ፡ እለ ፡ ወድቁ ፡ በልሳን ።

19ብፁዕ ፡ ዘድኅነ ፡ እምኔሃ ፤ ወዘኢድኅፀ ፡ በመንሱታ ፤ ወዘኢሐረሰ ፡ በአርዑታ ፤ ወዘኢተሞቅሐ ፡ በማአሰራ ።

20አርዑታሂ ፡ አርዑተ ፡ ኀጺን ፤ ወመዋቅሕቲሃኒ ፡ ዘብርት ።

21እኩይ ፡ ሞት ፡ ሞታ ፤ ትቀልል ፡ ሲኦል ፡ እምኔሃ ።

22ለጻድቃንሰ ፡ ኢትበጽሖሙ ፤ ወኢይውዕዩ ፡ በእሳታ ።

23እለ ፡ ይረስዕዎ ፡ ለእግዚአብሔር ፡ ይወድቁ ፡ ባቲ ፤ ወታውዕዮሙ ፡ በዘኢይጠፍእ ፡ እሳት ፤ ወትሰርር ፡ ላዕሌሆሙ ፡ ከመ ፡ ዐንበሳ ፤ ወትእኅዞሙ ፡ ከመ ፡ ነምር ።

24እመኒ ፡ ሐጸርከ ፡ በሦክ ፡ ላዕለ ፡ ንዋይከ ፤ ወኀተምከ ፡ ወርቀከ ፡ ወብሩረከ ፤

25ወደለውከ ፡ በመዳልው ፡ ቃለከ ፤ ወወደይከ ፡ ማዕጾ ፡ ወመንሠገ ፡ ላዕለ ፡ አፉከ ፤

26ዓዲ ፡ ተዐቀባ ፡ ኢታድኅፅከ ፡ ልሳንከ ፤ ወኢታውድቀ ፡ ቅድመ ፡ ዘይንዕወከ ።