ጥበበ ሲራክ 27

1ብዙኃን ፡ እለ ፡ በአድልዎ ፡ ይገብርዋ ፡ ለኀጢአት ፤ ወዘሰ ፡ ይፈቅድ ፡ ይትባዛኅ ፡ ይመይጥ ፡ ዐይኖ ።2ማእከለ ፡ ንድቀ ፡ አእባን ፡ ይተክሉ ፡ መትከለ ፤ ወማእከለ ፡ ሤጥ ፡ ወተግባር ፡ ትመጽእ ፡ ኀጢአት ።3ለእመ ፡ ኢያፍጠነ ፡ ተዐቅቦ ፡ በፍርሀተ ፡ እግዚአብሔር ፡ ኢይጐነዲ ፡ ተገፍትኦ ፡ ቤቱ ።4ውስተ ፡ መንጠፍት ፡ ይጥሕል ፡ ሐሠር ፤ ከማሁ ፡ ሰብእኒ ፡ እምኅሊናሁ ፡ ተረክበ ፡ ርስሐቱ ።5ለንዋየ ፡ ለብሓኒ ፡ እሳት ፡ ይፈትኖ ፤ ወለሰብእኒ ፡ ኅሊና ፡ ልቡ ፡ ያሜክሮ ።6ዐቃቢሁ ፡ ለቀምሕ ፡ ይሬኢ ፡ ፍሬሁ ፤ ከማሁ ፡ ቃሉ ፡ ለሰብእ ፡ ይከሥቶ ፡ ፍትወተ ፡ ልቡ ።7እንበለ ፡ ትጠይቆ ፡ ለሰብእ ፡ ኢትንአዶ ፡ እስመ ፡ እምነ ፡ ግዕዙ ፡ ያሜክርዎ ፡ ለሰብአ ።8ለእመ ፡ ዴገንካ ፡ ለጽድቅ ፡ ትረክባ ፤ ወትለብሳ ፡ ከመ ፡ ልብሰ ፡ ጶዴር ፡ ዘክቡር ።9አዕዋፍኒ ፡ ምስለ ፡ ዘመዱ ፡ የኀድር ፤ ወጽድቅኒ ፡ ኀበ ፡ እለ ፡ ይገብርዋ ፡ ተሐውር ።10ዐንበሳ ፡ ይንዑ ፡ ዘይበልዕ ፤ ከማሁ ፡ ኀጢአትኒ ፡ ትንዕዎሙ ፡ ለእለ ፡ ይገብርዋ ።11ጸድቅሰ ፡ ይሜህር ፡ ዘልፈ ፡ ጥበበ ፤ ወአብድሰ ፡ ባሕቱ ፡ እንተ ፡ ጸብሐት ፡ የሐጽጽ ፡ ልቡ ፡ ከመ ፡ ወርኅ ።12በኀበ ፡ አብዳን ፡ ተዐቀብ ፡ ጊዜሁ ፤ ወበኀበ ፡ ጠቢባን ፡ ተጠየቅ ፡ በኵሉ ፡ ጊዜ ።13ነገሮሙ ፡ ለአብዳን ፡ ያስተወጥዕ ፤ ወሠሐቆሙኒ ፡ ፍግዐ ፡ ኀጢአት ።14ነገሩ ፡ ለዘ ፡ ብዙኀ ፡ ይምሕል ፡ ያንሦጥጥ ፡ ሥዕርተ ፤ ወላኳሆሙኒ ፡ ያጸምም ፡ እዝነ ።15ያክዑ ፡ ደመ ፡ ላኳሆሙ ፡ ለዕቡያን ፤ ወጋእዞሙ ፡ ስራሕ ፡ ለዘይሰምዖሙ ።16ዘከሠተ ፡ ምክረ ፡ ቢጹ ፡ ሀጕለ ፡ ሃይማኖቶ ፤ ወኢይረክብ ፡ እንከ ፡ ዐርከ ፡ ዘከመ ፡ ልቡ ።17ዕቀብ ፡ ዐርከከ ፡ ወተአመን ፡ ምስሌሁ ፤ ወለእመሰ ፡ ከሠትከ ፡ ምክሮ ፡ ኢትዴግኖ ፡ (እንከ ፡ ወኢትትልዎ ፡) ድኅሬሁ ።18ከመ ፡ ሀጕለ ፡ ሰብእ ፡ ጸላኢሁ ፤ ከማሁ ፡ ሀጐልካሁ ፡ አንተኒ ፡ ታእኃሁ ፡ ለዐርክከ ።19ከመ ፡ ዖፍ ፡ እንተ ፡ ታመሥጠከ ፡ እምእዴከ ፤ ከማሁ ፡ ሰረረ ፡ እምኔከ ፡ ዐርክከ ።20ወኢትዴግኖ ፡ እንከ ፡ እስመ ፡ ነዋኅ ፡ ኀበ ፡ አምሠጠከ ፤ ከመ ፡ አምሠጠት ፡ ምዳቍ ፡ እምነ ፡ ማዕገት ።21ሶበሰ ፡ ቍስል ፡ ውእቱ ፡ እምፈወስዎ ፤ ወለዘኒ ፡ ተጽዕለ ፡ ያስተማውጽዎ ፤ ወለዘሰ ፡ ከሠተ ፡ ምክረ ፡ ቢጹ ፡ ይቀብጽዎ ።22ዘይቀጽብ ፡ በዐይኑ ፡ ኢይሤሂ ፡ ኅሊናሁ ፤ አልቦ ፡ ዘይክል ፡ አኅድጎተ ፡ እከዩ ።23ለዐይንከሰ ፡ ያጥዕም ፡ ለከ ፡ አፉሁ ፤ ወበኵሉ ፡ ዘነበብከ ፡ ይንእደከ ፤ ወድኅረ ፡ የዐልወከ ፡ ቃሎ ፤ ወያስሕተከ ፡ በቃልከ ፡ እንተ ፡ ነበብከ ።24ብዙኃን ፡ እለ ፡ ጸላእኩ ፡ ወአኮሰ ፡ ከማሁ ፤ ወእግዚአብሔርኒ ፡ ጸልአ ፡ ኪያሁ ።25ዘይወግር ፡ እብነ ፤ ላዕሌሁ ፡ ትወርድ ፡ ዲበ ፡ ርእሱ ፤ መቅሠፍተ ፡ ዐመፃሰ ፡ ይትዐወቅ ፡ ቍስሉ ።26ዘከረየ ፡ ግበ ፡ (ለቢጹ ፡) ለሊሁ ፡ ይወድቅ ፡ ውስቴቱ ፤ ወዘኒ ፡ ሠርዐ ፡ መሥገርተ ፡ ውእቱ ፡ ይሠገር ፡ ቦቱ ፤ 27 . . . . ፤ ወኢያአምር ፡ እንተ ፡ ኀበ ፡ ይመጽኦ ።28ኀጢአት ፡ ጸዐሎሙ ፡ ወሠሐቆሙ ፡ ለዕቡያን ፤ ከመ ፡ ዐንበሳ ፡ ትንዕዎሙ ፡ ወትትቤቀሎሙ ።29በመሥገርት ፡ ይሠገሩ ፡ እለ ፡ ይትፌሥሑ ፡ በድቀቱ ፡ ለጻድቅ ፤ መቅሠፍት ፡ ይመስዎሙ ፡ ዘእንበለ ፡ ይብጽሖሙ ፡ ጊዜ ፡ ሞቶሙ ።30መዐትኒ ፡ ወቍጥዓ ፡ ርኩሳን ፡ እሙንቱ ፤ ወበኀበ ፡ ብእሲ ፡ ኃጥእ ፡ ይሄልዉ ።