ጥበበ ሲራክ 3

1ሊተ
፡ ለአቡክሙ ፡ ስምዑኒ ፡ ደቂቅየ ፤ ወከመዝ ፡ ግበሩ ፡ ከመ ፡ ትሕየዉ ።

2እስመ ፡ አክበረ ፡ እግዚአብሔር ፡ አበ ፡ ላዕለ ፡ ውሉድ ፤ ወአዕበየ ፡ ኵነኔሃ ፡ ለእም ፡ ላዕለ ፡ ደቂቃ ።

3ዘያከብር ፡ አባሁ ፡ ይትኀደግ ፡ ሎቱ ፡ ኀጢአቱ ፤

4ወከመ ፡ ዘይዘግብ ፡ መዝገበ ፡ ዘያከብራ ፡ ለእሙ ።

5ዝያከብር ፡ አባሁ ፡ ይትፌሣሕ ፡ በውሉዱ ፤ ወበዕለተ ፡ ጸሎቱ ፡ ይሰምዖ ።

6ዘያከብር ፡ አባሁ ፡ ይነወኅ ፡ መዋዕሊሁ ፤ ወዘይሰምዖ ፡ ለእግዚአብሔር ፡ ያዐርፋ ፡ ለእሙ ፡

7ወከመ ፤ አግብርቲሁ ፡ ይትቀነይ ፡ ለዘወለዶ ።

8በቃልከኒ ፡ ወበምግባርከኒ ፡ አክብሮ ፡ ለአቡከ ፤ ከመ ፡ ትብጻሕከ ፡ በረከቱ ።

9መድኅረ ፡ አብ ፡ ያጸንዕ ፡ አብያተ ፡ ውሉድ ፤ ወመርገመ ፡ እም ፡ ይሤሩ ፡ መሠረተ ።

10ኢትትመካሕ ፤ በአስተሐቅሮ ፡ አቡከ ፤ እስመ ፡ ኢይከውነክ ፡ ምክሐ ፡ አስተሐቅሮ ፡ አቡከ ።

11እስመ ፡ በክብረ ፡ አቡሁ ፡ ይከብር ፡ ሰብእ ፤ ወኀሳሩ ፡ ለሰብእ ፡ በአስተሐቅሮታ ፡ ለእሙ ።

12ወልድየ ፡ ጹር ፡ ርሥኣኒሁ ፡ ለአቡከ ፤ ወኢታሕዝኖ ፡ በሕይወቱ ።

13ወእመኒ ፡ ልህቀ ፡ ወኀጥአ ፡ ልበ ፡ ኦሆ ፡ በሎ ፤ ወአክብሮ ፡ በአምጣነ ፡ ትክል ፡ ወኢታስተኣክዮ ።

14እስመ ፡ ምጽዋቱ ፡ ለአቡከ ፡ (ዕስየተ ፡) ኢትትረሳዕ ፡ ለከ ፤ ወህየንተ ፡ ኀጢአት ፡ ትትሐነጽ ፡ ለከ ።

15ወበዕለተ ፡ ምንዳቤከ ፡ ይዜከራ ፡ ለከ ፤ ከመ ፡ ይመስዎ ፡ ፀሓይ ፡ ለበረድ ፡ ከማሁ ፡ ይትመሰዋ ፡ ኀጣውኢከ ።

16ፅሩፍ ፡ ውእቱ ፡ ዘይገድፎ ፡ ለአቡሁ ፤ ወርጉም ፡ ውእቱ ፡ በኀበ ፡ እግዚአብሔር ፡ ዘያምዕዓ ፡ ለእሙ ።

17ወልድየ ፡ በ[የዋሃ]ትክ ፡ ያስተርኢ ፡ ምግባሪከ ፤ ወያፈቅሩከ ፡ ዕደው ፡ ጻድቃን ።

18በአምጣነ ፡ ዕበይከ ፡ ከማሁ ፡ አትሕት ፡ ርእሰከ ፤ ወትረክብ ፡ ዕሴተ ፡ በኀበ ፡ እግዚአብሔር ።

20እስመ ፡ ዐቢይ ፡ ግብሩ ፡ ለእግዚአብሔር ፤ ወይሴባሕ ፡ በላዕለ ፡ (ቅዱሳን ፡ ወ)ትሑታን ።

21ኢትኅሥሥ ፡ ዘይጸንዐከ ፤ ወኢትሕትት ፡ ዘኢይትከሀለከ ።

22ኀሊ ፡ ዳእሙ ፡ ዘተአዘዝከ ፤ ወዘኅቡእሰ ፡ ኢያስተልሕፍከ ።

23ኢትትኀሠሥ ፡ በብዝኀ ፡ ምግባሪከ ፤ እስመ ፡ ፈድፋደ ፡ እምነ ፡ ሰብእ ፡ ዘአርአዩከ ፡ ለከ ፡

24ወለብዙኃን ፡ አስሐቶሙ ፡ ትዝኅርቶሙ ፤ ወለብዙኃን ፡ አውደቆሙ ፡ ትዕቢተ ፡ ልቦሙ ።

26ዘይፈትዋ ፡ ለመንሱት ፡ ባቲ ፡ ይመውት ፤ ልብ ፡ እኩይ ፡ ይደዊ ፡ በደኃሪቱ ።

27ልብ ፡ እኩይ ፡ ይትቀሠፍ ፡ በሕማም ፤ ወኃጥእሰ ፡ ይዌስክ ፡ ኀጢአተ ፡ በላዕለ ፡ ኀጣውኢሁ ።

28መንሱቶሙ ፡ ለዕቡያን ፡ አልባቲ ፡ ፈውሰ ፤ እስመ ፡ እኩይ ፡ ተክል ፡ ገብረ ፡ ሥርወ ፡ ላዕሌሆሙ ።

29ልበ ፡ ጠቢብ ፡ ይፌክር ፡ አምሳለ ፤ ወእዝነ ፡ ማእምር ፡ ትፈቱ ፡ ጥበበ ።

30ለእሳት ፡ እንተ ፡ ትነድድ ፡ ያጠፍኣ ፡ ማይ ፤ ወምጽዋት ፡ ታኀድግ ፡ ኀጢአተ ።

31ለዘይፈዲ ፡ ዕሴተ ፡ ይዜከር ፡ ሎቱ ፡ በደኃሪቱ ፤ ወእመ ፡ ዕለተ ፡ ይድኅፅ ፡ ይረክብ ፡ በዘያሰምክ ።