ጥበበ ሲራክ 4

1ወልድየ ፡ ኢትክልኦ ፡ ለነዳይ ፡ ሕይወቶ ፤ ወኢትሚጥ ፡ አዕይንቲከ ፡ እምዘ ፡ ይስእለከ ።2ወኢታሕምም ፡ ነፍሰ ፡ [ርኅብተ] ፤ ወኢታምዕዕ ፡ ብአሴ ፡ ሕዙነ ።3ወኢታደንግጽ ፡ ልበ ፡ ትኩዘ ፤ ወኢትትኀለፎ ፡ ለዘይስእለከ ።4ወኢትትቄጣዕ ፡ ነባሬከ ፡ ዘይትቀነይ ፡ ለከ ፤ ወኢትሚጥ ፡ ገጸከ ፡ እምነ ፡ ነዳይ ።5ወእምነ ፡ ዘይስእለከ ፡ ኢትሚጥ ፡ ዐይነከ ፤ ወኢተሀብ ፡ ለሰብእ ፡ ምክንያተ ፡ በዘይረግመከ ።6እስመ ፡ ለእመ ፡ ረገመከ ፡ በምረተ ፡ ነፍሱ ፤ ይሰምዖ ፡ ፈጣሪሁ ፡ ጸሎቶ ።7ተፋቀር ፡ በኀበ ፡ ብዙኃን ፤ ተፀመድ ፡ በኀበ ፡ መኳንንት ፡ ወኢታዕቢ ፡ ርእሰከ ።8ወለነዳይ ፡ አፅምኦ ፡ በእዝንከ ፤ ወአውሥኦ ፡ ሠናየ ፡ ቃለ ፡ በየውሀት ።9ወአድኅኖ ፡ ለግፉዕ ፡ እምእደ ፡ ገፋዒሁ ፤ ወኢትትሀከይ ፡ ኰንኖቶ ።10ኩኖ ፡ ለእጓለ ፡ ማውታ ፡ ከመ ፡ አቡሁ ፤ ወቁም ፡ ላቲ ፡ ለእሙ ፤ ከመ ፡ ምታ ። ወትከውን ፡ ከመ ፡ ውሉደ ፤ ልዑል ፤ ወያፈቅረከ ፡ ፈድፋደ ፡ አምነ ፡ እምከ ።11ጥበብሰ ፡ አዕበየቶሙ ፡ ለደቂቃ ፤ ወትትወከፎሙ ፡ ለእለ ፡ የኀሥሥዋ ።12ዘኪያሃ ፡ አፍቀረ ፡ አፍቀረ ፡ ሕይወቶ ፤ ወዘይገይስ ፡ ኀቤሃ ፡ ይጸግብ ፡ ትፍሥሕተ ።13ወዘያጸንዓ ፡ ይወርስ ፡ ክብረ ፤ ወኀበ ፡ ቦአት ፡ ይባርክ ፡ እግዚአብሔር ።14እለ ፡ ኪያሃ ፡ ተፀምዱ ፡ ተፀምድዎ ፡ ለቅዱስ ፤ ወእለ ፡ ያፈቅርዋ ፡ ያፈቅሮሙ ፡ እግዚአብሔር ፡15ወዘይሰምዓ ፡ ላቲ ፡ ይኴንን ፡ አሕዛበ ፤ ወዘ[ያፀምኣ] ፡ ላቲ ፡ ይነብር ፡ ተአሚኖ ።16ለእመ ፡ ትትአመና ፡ ትረክባ ፤ ወታዐብየከ ፡ በመዋዕሊከ ፡17ወትቀድም ፡ ተሐውር ፡ ምስሌሁ ፤ እንዘ ፡ ታፈርሆ ፡ ወትጌርሞ ፡ ወታደነግጾ ፤ ወትቀሥፎ ፡ ወትሜህሮ ፤ እስከ ፡ ታገርራ ፤ ለነፍሱ ፤ ወታሜክሮ ፡ በተግሣጽ ።18ወእምዝ ፡ ካዕበ ፡ ትትቄበሎ ፡ ወታስተፌሥሖ ፤ ወትከሥት ፡ ሎቱ ፡ ምክራ ።19ወእመሰ ፡ ስሕተ ፡ እምኔሃ ፡ ተኀድጎ ፤ ወታገብኦ ፡ ውስተ ፡ እደ ፡ ዘይዴድቆ ።20ተዐቀብ ፡ ጊዜሁ ፡ ወዑቅ ፡ ለእመሂ ፡ እኩይ ፤ ወኢታድሉ ፡ በኀፍረት ፡ በእንተ ፡ ነፍስከ ።21እስመቦ ፡ ዘበኀፍረት ፡ ይገብር ፡ ኀጢአተ ፤ ወቦ ፡ ዘበኀፍረት ፡ ይገብር ፡ ወይረክብ ፡ ሞገሰ ።22ኢታድሉ ፡ ለገጽ ፡ እንዘ ፡ ላዕለ ፡ ነፍስከ ፡ ይበጽሐከ ፤ ወኢትኅፈር ፡ ከመ ፡ ኢታውድቅ ፡ ነፍሰከ ።23ወኢትክልኦ ፡ ነቢበ ፡ ቃሉ ፡ ለዘይትናገር ።24እስመ ፡ እምቃሉ ፡ይትዐወቅ ፡ ጥበቢሁ ፤ ወትምህርቱ ፡ እምቃለ ፡ ልሳኑ ።25ኢትትካሐድ ፡ በእንተ ፡ ጽድቅ ፤ ወተጋነይ ፡ በእንተ ፡ ዘስሕትከ ።26ወኢትኅፈር ፡ ነጊረ ፡ ጌጋይከ ፤ ወኢትትኀየል ፡ ውሒዘ ፡ ፈለግ ።27ወኢታትሕት ፡ ርእሰከ ፡ ለብእሲ ፡ አብድ ፤ ወኢታድሉ ፡ ለገጸ ፡ ዐቢይ ።28እስከ ፡ ትበጽሕ ፡ ለሞት ፡ ተባአስ ፡ በእንተ ፡ ጽድቅ ፤ >ወእግዚአብሔር ፡ አምላክከ ፡ ይትባአስ ፡ በእንቲአከ ።29ወኢትኩን ፡ ዝሉፈ ፡ በአፉከ ፤ ወኢትጸመም ፡ ተግባረከ ።30ወኢትትአርወይ ፡ ከመ ፡ ዐንበሳ ፡ በውስተ ፡ ቤትከ ፤ ወኢታደንግጽ ፡ ነባሬከ ።31ወኢትስፋሕ ፡ ለነሢእ ፡ እዴከ ፡ ተለቂሐከ ፤ ወሶበ ፤ ለፈድይ ፡ ኢትግባእ ፡ ትኅባእ ፡ የማነከ ።