ጥበበ ሲራክ 30

1ዘያፈቅር ፡ ወልዶ ፡ ኢያጸብእ ፡ ተግሣጸ ፤ ከመ ፡ ይትፈሣሕ ፡ ቦቱ ፡ በደኃሪቱ ።

2ዘመሀሮ ፡ ለወልዱ ፡ ይንእድዎ ፡ ቦቱ ፤ ወይከውኖ ፡ ምክሑ ፡ በኀበ ፡ ማኅፈሩ ።

3ዘመሀሮ ፡ ለወልዱ ፡ ያቀንኦ ፡ ለጸላኢሁ ፤ ወይትፌሣሕ ፡ ቦቱ ፡ በኀበ ፡ አዕርክቲሁ ።

4እመሂ ፡ ሞተ ፡ አቡሁ ፡ ከመ ፡ ዘኢሞተ ፤ እስመ ፡ ኀደገ ፡ ድኅሬሁ ፡ ዘከማሁ ።

5ወእንዘ ፡ ሕያው ፡ ውእቱ ፡ ተፈሥሐ ፡ በወልዱ ፤ ወእመኒ ፡ ይመውት ፡ ኢያሐምሞ ፡ ልቦ ።

6እስመ ፡ ኀደገ ፡ ድኅሬሁ ፡ ዘይትቤቀሎሙ ፡ ለጸላእቱ ፤ ወዘየዐስዮሙ ፡ ለአዕርክቲሁ ።

7እንበይነ ፡ ነፍሰ ፡ ውሉድክ ፡ ፅምም ፡ ልበከ ፤ እስመ ፡ እምነ ፡ ብካዮሙ ፡ ይትመሰወከ ፡ አማዑቲክከ ።

8ፈረስ ፡ ዘኢተረየፀ ፡ ይወፅአ ፡ እኩየ ፤ ወልድ ፡ ዘኢተገሠጸ ፡ ይወፅእ ፡ ዝሉፈ ።

9እምከመ ፡ አስተማዛኅኮ ፡ ለወልድከ ፡ ይገብእ ፡ ይትኀየልከ ፤ እምከመ ፡ ተዋነይከ ፡ ምስሌሁ ፡ ይገብእ ፡ ያሕምምከ ።

10ኢትሥሐቅ ፡ ሎቱ ፡ ከመ ፡ ኢያሕዝንከ ፤ ወአመ ፡ ደኃሪትከ ፡ ያፀርሰከ ፡ አስናኒከ ።

11ኢ[ታ]ኰንኖ ፡ ለወልድከ ፡ በውርዙቱ ።

12እምንእሱ ፡ አጸንጵዎ ፡ አዕፅምተ ፡ ገበዋቲሁ ፤ ከመ ፡ እምከመ ፡ ጸንዐ ፡ ኢይዕሉከ ።

13መሀሮ ፡ ለወልድከ ፡ ወያሰልጠከ ፤ ከመ ፡ ኢትኅፈር ፡ በሙስና ፡ ዚአሁ ።

14ይኄይስ ፡ ነዳይ ፡ ጥዑይ ፡ ውእቱ ፡ ወፍቱሕ ፡ ነፍሱ ፤ እምነ ፡ ባዕል ፡ ዘድዉይ ፡ ሥጋሁ ፡ ወእሱር ፡ ነፍሱ ።

15ጥዑየ ፡ ይኩን ፡ ሥጋከ ፡ ወፍቱሐ ፡ ይኩን ፡ ነፍስከ ፤ ወዝእምኵሉ ፡ ብዕል ፡ ይኄይስ ፤ ወእምኵሉ ፡ ብዕል ፡ ወንዋይ ፡ ይኄይስ ፡ ጥዕዮ ፡ ነፍስ ።

16ኢይትበደር ፡ ብዕል ፡ እምነቢረ ፡ ጥዑይ ፤ አልቦ ፡ ትፍሥሕት ፡ ዘይኄይስ ፡ እምሐሤተ ፡ ልብ ።

17ይኄይስ ፡ መዊት ፡ እመራር ፡ ሕይወት ፤ ወእምነ ፡ ደዌ ፡ ሲሕ ።

18ከመ ፡ ሥሩዕ ፡ መብልዕ ፡ ውስተ ፡ አፍ ፡ ፍፁም ፤ ከማሁ ፡ ዘያወፍር ፡ እክለ ፡ ውስተ ፡ መቃብር ።

19ምንተ ፤ ይበቍዕ ፡ ሠዊዕ ፡ ለአማልክት ፤ ኢእሙንቱ ፡ ይበልዑ ፤ ወኢእሙንቱ ፡ ያጼንዉ ፤ ከማሁ ፡ ዘእግዚአብሔር ፡ ቀሠፎ ።

20ይሬኢ ፡ በአዕይንቲሁ ፡ ወያሐምም ፡ ልቦ ፤ ከመ ፡ ኅጽው ፡ ሶበ ፡ የሐቅፋ ፡ ለድንግል ፡ ወይቴክዝ ።

21ኢታሕዝን ፡ ነፍሰከ ፡ ወኢታጥቅ ፡ ልበከ ።

22ትፍሥሕቱ ፡ ለልብ ፡ ሕይወቱ ፡ ለሰብእ ፤ ወሐሤተ ፡ ነፍስ ፡ ያነውኅ ፡ መዋዕለ ።

23የውሃ ፡ ለነፍስከ ፡ ወናዝዛ ፡ ለልብከ ፤ ከመ ፡ ታውፅእ ፡ ሐዘነ ፡ እምላዕሌክ ። እስመ ፡ ለብዙኃን ፡ ቀተሎሙ ፡ ሐዘን ፤ ወአልባቲ ፡ ዘትበቍዕ ፡ ሐዘን ።

24ቅንአት ፡ ወመዐት ፡ ያውኅዱ ፡ መዋዕለ ፡ ሕይወት ፤ ወእንበለ ፡ ይብጻሕ ፡ ጊዜሁ ፡ ያረሥእ ፡ ትካዝ ።

25ከመ ፡ ዘየአሪ ፡ ድኅረ ፡ ዘይቀሥም ፤ በበረከቱ ፡ ለእግዚአብሔር ፡ በጻሕኩ ፤ ከመ ፡ ማእረረ ፡ ወይን ፡ መላእኩ ፡ ምክያድየ ።

26ናሁ ፡ ርእዩ ፡ ከመ ፡ አኮ ፡ ለባሕቲትየ ፡ ዘጻመውኩ ፡ ወከመ ፡ ለኵሉ ፡ እለ ፡ ይፈቅዱ ፡ ይጥበቡ ።

27ስምዑኒ ፡ መኳንንተ ፡ ሕዝብ ፤ ወአፅምኡኒ ፡ መላእክተ ፡ አሕዛብ ።

28ለወልድከ ፡ ወለብእሲትከ ፡ ወለእኁከ ፡ ወለዐርክከ ፤ ኢታኰንኖሙ ፡ ንዋየከ ፡ እንዘ ፡ ሕያው ፡ አንተ ፤ ወኢታመግብ ፡ ነኪረ ፡ ላዕለ ፡ ቤትከ ፤ ከመ ፡ ኢትነስሕ ፡ ድኅረ ፡ ወኢትግባእ ፡ ታስተበቍዖሙ ።

29አምጣነ ፡ ሕያው ፡ አንተ ፡ ወሀለወት ነፍስከ ፤ ኢትወልጥ ፡ ግዕዘከ ።

30ይኄይሰከ ፡ ውሉድከ ፡ ይስአሉክ ፤ እምትጽናሕ ፡ አንተ ፡ እምእዴሆሙ ፡ ለደቂቅከ ።

31ኩን ፡ ጠቢበ ፡ በኵሉ ፡ ዘገበርከ ፤ ወኢታሒስ ፡ ርእሰከ ፡ በኀበ ፡ ሤሙከ ።

32አመ ፡ የኀልቃ ፡ መዋዕለ ፡ ሕይወትከ ፤ ወአመ ፡ ትበጽሕ ፡ ደኃሪትከ ፤ ይእተ ፡ አሚረ ፡ አስተዋርስ ፡ ንዋየከ ።

33ለአድግሰ ፡ አቅምሖ ፡ ወጸዐኖ ፡ ወዝብጦ ፤ ወለገብርኒ ፡ ገሥጾ ፡ ወሴስዮ ፡ ወቅንዮ ።

34ወቅንዮሙ ፡ ለአግብርቲከ ፡ ወትረክብ ፡ ዕረፍተ ፤ ወለእመሰ ፡ አፅራዕኮሙ ፡ ይትገዐዙ ፡ (ይፈቅዱ ፡ ይፃኡ ፡ እምኔከ) ።

35ፀሚደ ፡ አርዑት ፡ ያደንኖ ፡ ለክሳድ ፤ ወለገብርሰ ፡ እኩይ ፡ ሰውጥ ፡ ወመቃይጽ ።

36ቅንዮ ፡ ለገብርከ ፡ ወኢታንብሮ ፡ ፅሩዐ ፤

37እስመ ፡ ብዙኃተ ፡ እኪተ ፡ ትሜህር ፡ አፅርዖት ።

38ወሀቦ ፡ ግብሮ ፡ በአምጣነ ፡ ኀይሉ ፤ ወእመሰ ፡ ኢገረረ ፡ አክብድ ፡ ገንዶራቲሁ ። ወኢትትአመኖ ፡ ለኵሉ ፡ ዘሥጋ ፤ አልቦ ፡ ዘትገብር ፡ ዘእንበለ ፡ ምክር ።

30ወእመ ፡ ብከ ፡ ነባሬ ፡ (ኄረ) ፡ ረስዮ ፡ ከመ ፡ እኁከ ፤ ወአፍቅሮ ፡ ከመ ፡ ነፍስከ ።

40ወእምከመ ፡ አሕሠምከ ፡ ዲቤሁ ፡ ወተኀጥአከ ፡ ያመሥጠከ ፤ በአይ ፡ ፍኖት ፡ እንክ ፡ ተኀሥሦ ።