ጥበበ ሲራክ 31

1ብእሲሰ ፡ አብድ ፡ ከንቶ ፡ ይሴፈዋ ፡ ለሐሰት ፤ ወሕልምኒ ፡ ያደነግጾ ፡ ለአብድ ።2ከመ ፡ ዘይፀብጥ ፡ ጽላሎተ ፡ ወከመ ፡ ዘይዴግን ፡ ነፋሰ ፤ ከማሁ ፡ ዘይትአመን ፡ ሕልመ ።3እምዝንቱ ፡ ውስተ ፡ ዝንቱ ፡ ይትፋለስ ፡ ሕልም ፤ ወበበ ፡ አምሳለ ፡ ገጹ ፡ ያርእየከ ፡ ዘዘዚአሁ ።4እምውስተ ፡ ርኩስ ፡ ምንት ፡ ይወፅእ ፡ ንጹሕ ፤ ወበውስተ ፡ ሐሰት ፡ በአይቴ ፡ ይትረከብ ፡ ጽድቅ ።5ሕልም ፡ ወሰገል ፡ ወመቅሰም ፡ ከንቱ ፡ ኵሎሙ ፤ ወያደነግጹ ፡ ልበ ፡ ወይቀጽዑ ፡ ከመ ፡ ማሕምም ።6ለእመ ፡ ኢኮነ ፡ እምኀበ ፡ እግዚአብሔር ፡ ዘተፈነወ ፡ እመ ፡ ይሣሀል ፤ ኢትደዮ ፤ ውስተ ፡ ልብከ ።7እስመ ፡ ለብዙኃን ፡ አስሐቶሙ ፡ ሕልም ፤ ወወድቁ ፡ እንዘ ፡ ኪያሁ ፡ ይሴፈው ።8እሙነ ፡ ይበጽሕ ፡ ዘእምኀበ ፡ [እግዚአብሔር ፡] ዘእንበለ ፡ ሐሰት ፤ ወጥዩቀ ፡ ይከውን ፡ ቃለ ፡ ጽድቅ ።9ብእሲ ፡ ምሁር ፡ ተግሣጸ ፡ ብዙኀ ፡ ያአምር ፤ ወዘፈድፋደ ፡ ሐመመ ፡ ጥበበ ፡ ይነግር ።10ወዘሰ ፡ ኢተጐድአ ፡ አልቦ ፡ ዘያአምር ፤11ዘብዙኀ ፡ ተመንደበ ፡ ብዙኀ ፡ ይትሜ[የን] ።12ብዙኀ ፡ ርኢኩ ፡ አመ ፡ ተመንደብኩ ፤ ወበዝኀ ፡ ቃልየ ፡ እምነ ፡ ኅሊናየ ።13እስመ ፡ ዘልፈ ፡ እትመነደብ ፡ ወእበጽሕ ፡ ለሞት ፤ ወእንበይነዝ ፡ ያድኅነኒ ፡ እግዚአብሔር ።14ነፍስ ፡ እንተ ፡ ትፈርሆ ፡ ለእግዚአብሔር ፡ ተሐዩ ፤15ወይድኅኑ ፡ ኵሎሙ ፡ እለ ፡ ይሴፈዉ ፡ ኪያሁ ።16ለፈራሄ ፡ እግዚአብሔር ፡ አልቦ ፡ ዘይጌርሞ ፤ ወኢይደነግጽ ፡ እስመ ፡ ውእቱ ፡ ተስፋሁ ።17ብፅዕት ፡ ነፍስ ፡ እንተ ፡ ትፈርሆ ፡ ለእግዚአብሔር ፤18እስመ ፡ ላዕሴሁ ፡ ያሰምክ ፡ ወውእቱ ፡ ምእመኑ ።19አዕይንቲሁ ፡ ለአእግዚአብሔር ፡ ኀበ ፡ እለ ፡ ያፈቅርዎ ፤ ምእመን ፡ ኀይሉ ፡ ወጽኑዕ ፡ ምስማኩ ። ያቈርር ፡ ለከ ፡ መርቄ ፤ ወይጹልለከ ፡ እምፀሓየ ፡ ቀትር ፤ የዐቅበከ ፡ እምዕቅፍት ፡ ወይረድአከ ፡ እምድቀት ።20ያዐብያ ፡ ለነፍስከ ፡ ወያበርሆን ፡ ለአዕይንቲከ ፤ ወይፌውስኒ ፡ ወይሁብ ፡ ሕይወተ ፡ ወያጸግብ ፡ በረከተ ።21ርኩስ ፡ መሥዋዕቱ ፡ ለመባአ ፡ ዐመፃ ፤ ወግሙን ፡ ቍርባኖሙ ፡ ለኃጥኣን ።22ወኢይትወከፎሙ ፡ መባኦሙ ፡ ለረሲዓን ።23አኮ ፡ በብዝኀ ፡ መባእከ ፡ ዘይትኀደግ ፡ ለከ ፡ ኀጢአትከ ።24ከመ ፡ ዘይቀትሎ ፡ ለሕፃን ፡ በቅድመ ፡ አቡሁ ፤ ከማሁ ፡ ዘበንዋየ ፡ ዐመፃ ፡ ያበውእ ፡ መባአ ።25ሕይወቱ ፡ ለነዳይ ፡ ስኢለ ፡ ምጽዋት ፤ ወዘሰ ፡ አበዮ ፡ ቀታሌ ፡ ነፍስ ፡ ውእቱ ።26ከመ ፡ ዘቀተለ ፡ ቢጾ ፡ ዘፈለጠ ፡ ብእሴ ፡ አድብእሲቱ ።27ወዘሄደ ፡ ዐስቦ ፡ ለዐሳቡ ፡ ከዐወ ፡ ደሞ ።28ሶበ ፡ ፩ዱ ፡ የሐንጽ ፡ ወካልኡ ፡ ይነሥት ፤ ምንተ ፡ በቍዐ ፡ ጻማሆሙ ፡ ለክልኤሆሙ ።29ለበ ፤ ፩ዱ ፡ ይድኅር ፡ ወካልኡ ፡ ይረግም ፤ ለመኑ ፡ እምውስተ ፡ ክልኤሆሙ ፡ ይሰምዖሙ ፡ ቃሎሙ ።30ዘይትኀፀብ ፡ እምድኅር ፡ ገሲሶ ፡ በድነ ፤ ወካዕበ ፡ ይደግም ፡ ገሲሶ ፤ ምንተ ፡ በቍዖ ፡ ተኀፅቦ ፤31ከማሁ ፡ ሰብእ ፡ ዘይጸውም ፡ እንበይነ ፡ ኀጢአቱ ፤ ወካዕበ ፡ የሐውር ፡ ዳግመ ፡ የአብስ ። መኑ ፡ እንከ ፡ ይሰምዖ ፡ ጸሎቶ ፡ ሎቱ ፤ ወምንተ ፡ በቍዖ ፡ አሕምሞ ፡ ነፍሱ ።