ጥበበ ሲራክ 36

1ለፈራሄ ፡ እግዚአብሔር ፡ ኢይረክቦ ፡ እኩይ ፤ እንበለ ፡ ከመ ፡ ያመክርዎ ፡ ወይድኅን ፡ እምኔሃ ።

2ብእሲሰ ፡ ጠቢብ ፡ ያፈቅር ፡ ሰሚዐ ፡ መጽሐፍ ፤ ወዘሰ ፡ ይናፍቅ ፡ ወኢይትአመን ፡ በመጽሐፉ ፤ ይከውን ፡ ከመ ፡ ሐመር ፡ እንተ ፡ ታንኮልል ፡ ማእከለ ፡ ዐውሎ ።

3ብእሲ ፡ ጠቢብ ፡ ይትአመን ፡ ወይገኒ ፡ በሕጉ ፡ ለእግዚአብሔር ፤ ወእግዚአብሔርኒ ፡ ይከውኖ ፡ ምእመኖ ፡ ወያስተፌሥሖ ።

4አስተዳሊወከ ፡ ዘትነብብ ፡ ቃለከ ፡ [አስምዕ] ፤ ወዬጺረከ ፡ ምክረ ፡ ዘትገብር ፡ አውሥእ ።

5ከመ ፡ መንኰራኵረ ፡ ሰረገላ ፡ ልቡ ፡ ለአብድ ፤ ወከመ ፡ መንኮኮት ፡ እንተ ፡ ተዐውድ ፡ ከማሁ ፡ ምክሩ ፡ ለፈራህ ።

6ፈረስ ፡ ገይድ ፡ ከመ ፡ ዐርክ ፡ ኄር ።

7በእፎ ፡ ዕለት ፡ እምዕለት ፡ ትነውኅ ፤ እንዘ ፡ ኵሉ ፡ መዋዕለ ፡ ዓመት ፡ በብርሃነ ፡ ፀሓይ ፡ የሐውር ።

8ወበትእዛዘ ፡ አእግዚአብሔር ፡ ይትፈለጥ ፡ ኵሉ ፡ መዋዕል ፤ ወጊዜ ፡ በዓላቲሁ ፡ በኍላቌሁ ፡ ይትዐወቅ ።

9እምውስተ ፡ መዋዕልኒ ፡ ቦ ፡ ዘቀደሰ ፡ ወአዕበየ ፤ ወፈለጠ ፡ እምውስቴቶሙ ፡ ክረምተ ፡ ወማእረረ ፡ ወሐጋየ ፤ በበ ፡ ኍላቌሆሙ ፡ ወበበ ፡ ጊዜሆሙ ።

10ወኵልነ ፡ እጓለ ፡ እመሕያው ፡ እምውስተ ፡ መሬት ፡ ንሕነ ፤ ወእምነ ፡ ምድር ፡ ተፈጥረ ፡ አዳም ።

11ወሌለዮ ፡ እግዚአብሔር ፡ በብዝኀ ፡ ጥበቢሁ ፤ ወሠርዖሙ ፡ ፍናዊሆሙ ።

12ወቦ ፡ እለ ፡ ባረከ ፡ እምውስቴቶሙ ፡ ወአዕበዮሙ ፤ ወቦ ፡ እለ ፡ ቀደሰ ፡ እምውስቴቶሙ ፡ ወአስተርአየ ፡ ሎሙ ፤ ወቦ ፡ እለ ፡ ረገመ ፡ እምውስቴቶሙ ፡ ወአኅሰሮሙ ፤ ወዐለዎሙ ፡ በከመ ፡ ምግባሮሙ ።

13ከመ ፡ ጽቡር ፡ ውስተ ፡ እዴሁ ፡ ለለብሓዊ ፤ ከማሁ ፡ ንሕነ ፡ በኀቤሁ ፤ ወኵሉ ፡ ግብሩ ፡ የሐውር ፡ በፍናዊሁ ፤ ወከማሁ ፡ ሰብእኒ ፡ ውስተ ፡ እደ ፡ ፈጣሪሁ ፤ ወይፈድዮ ፡ ለኵሉ ፡ በከመ ፡ ምግበሩ ።

14መናቅዕቲሃ ፡ ለእኪት ፡ ሠናይት ፤ ወመናቅዕቲሃ ፡ ለሞት ፡ ሕይወት ፤ ከማሁ ፡ መናቅዕቲሁ ፡ ለጻድቅ ፡ ኃጥእ ።

15ወምስለ ፡ ኵሉዝ ፡ ርኢ ፡ ግብሮ ፡ ለልዑል ፤ ወኵሉ ፡ በበክልኤቱ ፤ ፩፩በበዚአሁ ።

16አንሰ ፡ ድኅረ ፡ ኀለይክዎ ፡ ለዝንቱ ፡ ወኀሠሥክዎ ፡ እምጥንቱ ።

17ተሣሀለነ ፡ እግዚኦ ፡ አሕዛበከ ፡ እለ ፡ ተሰምዩ ፡ በስምከ ፤ ወለእስራኤልሂ ፡ እለ ፡ በበኵርከ ፡ አስተማሰልከ ።

18ተሣሀል ፡ ሀገረ ፡ ቅድሳቲከ ፤ ወኢየሩሳሌምሂ ፡ ሀገረ ፡ ማኅደረ ፡ ምዕራፊከ ።

19ወምልኣ ፡ ለጽዮን ፡ በረከተ ፡ ቃልከ ፤ ወእምነ ፡ ስብሐቲከ ፡ ላዕለ ፡ ሕዝብከ ።

20ወሀቦሙ ፡ ሕገ ፡ ለቀደምት ፡ [ፍጡራኒከ] ፤ ወአቅም ፡ ነቢያተ ፡ ለስምከ ።

21ወሀቦሙ ፡ ዕሴቶሙ ፡ ለእለ ፡ ተሰፈዉከ ፤ ከመ ፡ ይእመንዎሙ ፡ ለነቢያቲከ ።

22ስማዕ ፡ እግዚኦ ፡ ጸሎቶሙ ፡ (ለነቢያቲከ ፡ ወ)ለአግብርቲከ ፤ በረከተ ፡ አሮን ፡ ፈኑ ፡ ላዕለ ፡ ሕዝብከ ፤ ወያእምሩ ፡ ኵሎሙ ፡ እለ ፡ ሀለዉ ፡ ዲበ ፡ ምድር ፤ ከመ ፡ አንተ ፡ ውእቱ ፡ እግዚአብሔር ፡ አምላክ ፡ ዘለዓለም ።

23ኵሉ ፡ እክል ፡ ይትበላዕ ፡ ወይወርድ ፡ ውስተ ፡ ከርሥ ፤ ወባሕቱ ፡ ቦ ፡ እክል ፡ ዘይጥዕም ፡ እምእክል ።

24ወጕርዔ ፡ ይፈልጦ ፡ ለኵሉ ፡ ጣዕመ ፡ እክል ፤ ወከማሁ ፡ ልቡ ፡ ለጠቢብ ፡ ይፈልጥ ፡ ነገረ ፡ ሐሰት ።

25ልብ ፡ እኩይ ፡ ያመጽእ ፡ [ሐዘነ ፤] ወብእሲ ፡ ዘብዙኀ ፡ ሐመ ፡ ይለምዶ ፡ ትዕግሥቱ ።

26ኵሉ ፡ ተባዕት ፡ ይትወከፍ ፡ አንስተ ፤ ወቦ ፡ ብእሲት ፡ እንተ ፡ ትሤኒ ፡ እምብእሲት ።

27ላሕያ ፡ ለብእሲት ፡ ያበርሆ ፡ ለገ[ጽ] ፤ እምኵሉ ፡ ፍትወተ ፡ ብእሲ ፡ ይእቲ ፡ ተዐቢ ።

28ወእመሰ ፡ የዋህ ፡ ይእቲ ፡ ወሠናይ ፡ ቃላ ፤ ኢኮነ ፡ ከመ ፡ እጓለ ፡ እመሕያው ፡ ምታ ።

29ዘአውሰበ ፡ ብእሲተ ፡ ኄርተ ፡ ረከበ ፡ ተድላሁ ፤ እስመ ፡ ረዳኢቱ ፡ ወዐምደ ፡ ምስማኩ ፡ ይእቲ ።

30ከመ ፡ ዘአልቦ ፡ ጥቅመ ፡ ወይሰረቅ ፡ ንዋዩ ፤ ከማሁ ፡ ዘአልቦ ፡ ብእሲተ ፡ ምንዱበ ፡ ይነብር ።

31መኑ ፡ ዘይትሐበዮ ፡ ለሰራቂ ፡ ዘይትፋለስ ፡ ሀገረ ፡ እምሀገር ፤ ከማሁ ፡ ለብእሲኒ ፡ ዘአልቦ ፡ ውሉደ ፡ ወአልቦ ፡ ንብረተ ፤ ዘኀበ ፡ መስዮ ፡ ይበይት ፡