ጥበበ ሲራክ 35

1ወእመኒ ፡ ሤሙከ ፡ መልአከ ፡ ኢታዕቢ ፡ ርእሰከ ፤ ኩን ፡ ከማሆሙ ፡ ከመ ፡ ፩ዱ ፡ እምኔሆሙ ፤ ወተክዝ ፡ ትካዞሙ ፡ ወንበር ፡

2ኰንኖሙ ፤ ከመ ፡ ትርከብ ፡ አክሊለ ፡ ክብር ፡ ፈጺመከ ፡ መልእክተከ ።

3ንብብ ፡ አረጋዊ ፡ ወይደልወከ ፤ ወኢትጸመም ፡ ለሠናይ ፡ ነገር ፡ ትምህርተ ፡ ጥበብከ ።

4ኢታይድዕ ፡ ቃለከ ፡ ለኵሉ ፡ ዘሐተተከ ፤ ወኢትጠበብ ፡ በከመ ፡ ረከብከ ።

5ከመ ፡ ዕንቍ ፡ ክቡር ፡ ውስተ ፡ ሰርጐ ፡ ወርቅ ፤ ከማሁ ፡ ማሕሌት ፡ በኀበ ፡ ይሰትዩ ፡ ወይነ ።

6ወከመ ፡ መረግድ ፡ ውስተ ፡ ባዝግና ፡ ወርቅ ፤ ከማሁ ፡ ሐዋዝ ፡ ማሕሌት ፡ ወመሰንቆ ፡ በቤተ ፡ ስታይ ።

7ንብብ ፡ ወሬዛ ፡ ለእመ ፡ አብሑከ ፤ አምዕጹብ ፡ ንግር ፡ ሶበ ፡ ዳግመ ፡ ተስእሉከ ።

8ምዕረ ፡ አውሢአከ ፡ ሶቤሃ ፡ ፈጽም ፡ ቃለከ ፤ ወእንዘ ፡ ታአምር ፡ አርምም ፡ አፉክ ።

9ወኢትንበር ፡ ማእከለ ፡ ዐበይት ፤ እንዘ ፡ ባዕድ ፡ ይነግር ፡ ኢታይድዕ ፡ ቃለከ ።

10ከመ ፡ ይረውጽ ፡ መብረቅ ፡ ቅድመ ፡ ነጐድጓድ ፤ ከማሁ ፡ ሞገሱ ፡ ቅድመ ፡ ገጹ ፡ ለዘየኀፍር ።

11ኵሎ ፡ በጊዜሁ ፡ ወበዐቅሙ ፡ ግበር ፤ አቲወከ ፤ ቤተከ ፡ ወበሀየ ፡ ተፈሣሕ ፡

12ወተዋነይ ፤ ወግበር ፡ ኵሎ ፡ ዘመፍትው ፡ ዘትፈቅድ ፤ ዑቅ ፡ ኢትንብብ ፡ ነገረ ፡ ትዕቢት ፡ ወኢተአብስ ፡ በቃልከ ።

13ምስለ ፡ ዝንቱ ፡ ኵሉ ፡ አእኵቶ ፡ ለፈጣሪከ ፤ ወውእቱ ፡ ያጸግበከ ፡ እምነ ፡ ኵሉ ፡ በረከቱ ።

14ዘይፈርሆ ፡ ለእግዚአብሔር ፡ ይገኒ ፡ ለተግሣጹ ፤ ወእለኒ ፡ ይገይሱ ፡ ኀቤሁ ፡ ይረክቡ ፡ ፍትወቶሙ ።

15ወዘየኀሥሦ ፡ ለሕጉ ፡ ይጸግብ ፡ እምውስቴቱ ፤ ወዘሰ ፡ ይናፍቅ ፡ ቦቱ ፡ ይወድቅ ፡ ወይጌጊ ።

19እለ ፡ ይፈርህዎ ፡ ለእግዚአብሔር ፡ ይፈትሕ ፡ ሎሙ ፤ ወቀትረ ፡ መዓልት ፡ ይትቤቀል ፡ በቀሎሙ ።

17ወብእሲሰ ፡ ኃጥእ ፡ ኢያፀምእ ፡ ዘይጌሥጽዎ ፤ ወኵሉ ፡ ከማሁ ፡ ይመስሎ ፡ ለልቡ ።

18ብእሲ ፡ ጠቢብ ፡ አልቦ ፡ ዘይገብር ፡ ዘእንበለ ፡ ምክር ፤ ፀራይ ፡ ወዕቡይ ፡ ዘኢይቴክዝ ፡ ፍርሀተ ፡ ይገብር ፡ እንበለ ፡ ምክር ።

19ወአንተሰ ፡ ወልድየ ፡ አልቦ ፡ ዘትገብር ፡ ዘእንበለ ፡ ምክር ፤ ወዘኒ ፡ ገበርከ ፡ ኢታማስን ።

20ወኢትሖር ፡ ፍኖተ ፡ በዳ ፤ ከመ ፡ ኢትትዐቀፍ ፡ በእብነ ፡ መንሱት ።

21ኢትትአመኖ ፡ ለጸላኢከ ፡ በሐቅል ፤

22ወኢትትአመን ፡ ወልደከሂ ፡ ዘኢየሐውር ፡ በግዕዝከ ።

23ወበኵሉ ፡ ዘገበርከ ፡ አስተፍሥሓ ፡ ለነፍስከ ፤ ወበኵሉ ፡ ዕቀብ ፡ ትአእዛዞ ።

24ዘይፈርህ ፡ ሕጎ ፡ ያፀምእ ፡ ትእዛዘ ፡ መጽሐፉ ፤ ወዘይትአመን ፡ በእግዚአብሔር ፡ አልቦ ፡ ዘየኀጥእ ።