ጥበበ ሲራክ 41

1ኦሞት ፡ እፎ ፡ ዝክርከ ፡ > መሪር ፡ < ሶበ ፡ ትመጽእ ፡ ላዕለ ፡ ብእሲ ፡ እንዘ ፡ ዳኅነ ፡ ይነብር ፤ ወይዴለው ፡ በኵሉ ፡ ወቦ ፡ ኀይለ ፡ ወፍቱሕ ፡ ነፍሱ ፡ ለበሊዕ ።

2ኦሞት ፡ ሠናይ ፡ ኵነኔከ ፤ ሶበ ፡ ትመጽእ ፡ ላዕለ ፡ ብእሲ ፡ ነዳይ ፡ ዘአልቦ ፡ ኀይለ ፤ ላዕለ ፡ ዘልህቀ ፡ ወረሥአ ፡ ወአልቦ ፡ ወኢምንተኒ ፡ ዘይክል ፡ ወአልቦ ፡ ዘ[የአምን] ።

3ኢትፍራህ ፡ ኵነኔሁ ፡ ለሞት ፤ ተዘከሮሙ ፡ ለእለ ፡ እምቅድሜክ ፡ ወለእለ ፡ እምድኅሬከ ።

4እስመ ፡ ኵነኔ ፡ እግዚአብሔር ፡ ውእቱ ፡ ላዕለ ፡ ኵሉ ፡ ዘነፍስ ፤ ወለምንት ፡ እንከ ፡ ትግእዝ ፡ ፈቃዶ ፡ ለእግዚአብሔር ፤ እመኒ ፡ ዐሠርተ ፡ ምእተ ፡ ዓመተ ፡ ሐዮከ ፡ አልብከ ፡ ምስለ ፡ ሞት ፡ ዘለፋ ፡ ሕይወትከ ።

5ውሉደ ፡ ሕርቱማ[ነ] ፡ ይከውኑ ፡ ውሉደ ፡ ኃጥኣን ፤ ወይትገፈታእ ፡ አብያቲሆሙ ፡ ለረሲዓን ።

6ውሉደ ፡ ኃጥኣን ፡ የሀጕሉ ፡ ርስቶሙ ፤ ወልህቀ ፡ ምስለ ፡ ፍሬሆሙ ፡ ኀሳሮሙ ።

7ለአብ ፡ ኃጥእ ፡ ያሐረትሙ ፡ ውሉዱ ፤ እስመ ፡ በእንቲአሁ ፡ የኀስሩ ።

8አሌ ፡ ለክሙ ፡ ለዕደው ፡ ኃጥኣን ፤ እለ ፡ ኅደግሙ ፡ ሕጎ ፡ ለልዑል ።

9ወእመኒ ፡ ተዋለሉ ፡ እምነ ፡ ምድር ፡ ተፈጥረ ፡ ወውስተ ፡ ምድር ፡ ምግባኢሁ ፤ ከማሁ ፡ ኃጥኣንሂ ፡ እመርገም ፡ ውስተ ፡ ሞት ። 11 [ላሑ] ፡ ለሰብእ ፡ በሥጋሁ ፤ ወስሞሙኒ ፡ ለኃጥኣን ፡ ይደመሰስ ።

12ኅሊ ፡ ስመ ፡ ትግበር ፡ ለከ ፤ ውእቱ ፡ ይተርፈከ ፡ እምነ ፡ እልፍ ፡ መዛግብተ ፡ ወርቅ ፡ ዐበይት ።

13ሠናይ ፡ ሐይው ፡ በኈልቈ ፡ መዋዕሊከ ፡ በትፍሥሕት ፤ ይኄይስ ፡ ስም ፡ ሠናይ ፡ እስመ ፡ ውእቱ ፡ ለዓለም ፡ ይቀውም ፡ ለከ ።

14ጥበብሰ ፡ በሰላም ፡ ትትመሐፀን ፡ ውሉዳ ፤ ጥበብሰ ፡ ክቡት ፡ ወመዝገብ ፡ ዘኢያስተርኢ ፡ ምንት ፡ ረባሖሙ ፡ ለክልኤሆሙ ።

15ይኄይስ ፡ ብእሲ ፡ ዘየኀብእ ፡ አእበዲሁ ፤ እምነ ፡ ብእሲ ፡ ዘይክብት ፡ ጥበቢሁ ።

16ኅፈሩ ፡ እንከ ፡ ቃልየ ፡ (ወጥበብየ) ፤ ኵሉ ፡ ዘየኀፍር ፡ ሠናየ ፡ ይትዐቀብ ፤ ወአኮ ፡ ኵሉ ፡ ዘእሙን ፡ በኵሉ ፡ ይትሜከር ።

17ኀፍረት ፡ ለአብ ፡ ወለእም ፡ እንበይነ ፡ ውሉድ ፡ በዝሙት ፤ ኀፍረት ፡ ለመልአክ ፡ ወለዐበይት ፡ ሐሰት ፤

18ኀፍረት ፡ ለመኰንን ፡ ወለመስፍን ፡ ወልጦ ፡ ቃል ፤ ኀፍረት ፡ ለሕዝብ ፡ ወለማኅበር ፡ ስሒት ፤ ኀፍረት ፡ ተዓምፆ ፡ ምስለ ፡ ዐርክከ ፡ ወምስለ ፡ መፅመርከ ፤

19ኀፍረት ፡ ለኀዳሪ ፡ ሰሪቀ ፡ ማኅደር ፤ . . . . ፤ ኀፍዊረት ፡ ተቃርቦ ፡ ለበሊዐ ፡ እክለ ፡ ባዕድ ፤ ኀፍረት ፡ ሰሪቅ ፡ እምንዋየ ፡ ማሕፀንትከ ፡ ወእምተግባረ ፡ ቢጽክ ፤

20ኀፍረት ፡ ተጸምሞቱ ፡ ለዘ ፡ ይበጽሐከ ፤ ኀፍረት ፡ አስተአድሞ ፡ ብእሲተ ፡ ባዕድ ፤

21ኀፍረት ፡ ተዐውሮቱ ፡ ለቢጽከ ፡ በምንዳቤሁ ፤ ኀፍረት ፡ ተሰቍቆ ፡ ንዋየ ፡ ባዕድ ፤ ኀፍረት ፡ ተናግሮ ፡ ብእሲተ ፡ ባዕድ ፡ ወኢትትጓሕለው ላቲ ፤

22ወኢትኂጣ ፡ ለወለታ ፡ ወኢትቅረብ ፡ ኀበ ፡ ምስካባ ፤ ኀፍረት ፡ ዘርክዮቱ ፡ ለዐርክከ ፡ እምድኅረ ፡ ጸገወከ ፤ ኀፍረት ፡ አውፅኦ ፡ ነገር ፡ ዘሰማዕከ ፤ ኀፍረት ፡ ከሢተ ፡ ምክረ ፡ ዐርክከ ።

23ወዘንተ ፡ ለእመ ፡ ተዐቀብከ ፡ አማን ፡ ኀፋረ ፡ ትከውን ፤ ወትረክብ ፡ በኀበ ፡ ኵሉ ፡ ሰብእ ፡ ሞገሰ ።