ጥበበ ሲራክ 42

1እንበይነ ፡ ዝንቱሰ ፡ ባሕቱ ፡ ኢትኅፈር ፤ ወኢታድሉ ፡ ለገጸ ፡ ሰብእ ፡ ከመ ፡ ጌጋየ ፡ ኢይኩንከ ፤2በእንተ ፡ ሕጉ ፡ ለልዑል ፡ ወበእንተ ፡ ሕርመትከ ፤ ወበእንተ ፡ ፍትሕኒ ፡ ከመ ፡ ኢታንጽሖ ፡ ለጊጉይ ፤3ወሶበሂኒ ፡ ትትሓሰብ ፡ ምስለ ፡ ሱታፌከ ፡ በእንተ ፡ ተግባርከ ፤ በእንተኒ ፡ ሤጥ ፡ ወበእንተኒ ፡ ርስትከ ፤4በእንተ ፡ መዳልውኒ ፡ ወበእንተ ፡ መስፈርት ፤ ወእንበይነ ፡ ጥሪትከኒ ፡ እመኒ ፡ ውኁድ ፡ ወእመሂ ፡ ብዙኅ ፤5በእንተ ፡ ኵሉ ፡ ዘይረብሐከ ፡ ወዘይበቍዐከ ፤ ወበእንተ ፡ ምህሮቶሙ ፡ ለውሉድከ ፤ ለገብር ፡ እኩይ ፡ ሥትሮ ፡ ገበዋቲሁ ።6ሠናይ ፡ ኀቲም ፡ ላዕለ ፡ ብእሲት ፡ እኪት ፤ ወኀበ ፡ ብዙኅ ፡ በዋኢቱ ፡ በመዝግሕ ፡ አንብር ።7ኵሎ ፡ ዘገበርከ ፡ በኈልቍ ፡ ወበመስፈርት ፡ ወበመዳልው ፡ ግበር ፤ ወኵሉ ፡ ዘአባእከ ፡ ወአውፃእከ ፡ ወዘወሀብከ ፡ ወነሣእከ ፡ በመጽሐፍ ፡ ይኩንከ ።8ወበእንተ ፡ ገሥጾቱ ፡ ለአብድ ፡ ወለዘ ፡ አልቦ ፡ ልበ ፤ ወለአረጋዊኒ ፡ ዘበርሥአቱ ፡ ይተሉ ፡ ዝሙተ ፤ ወትከውን ፡ በአማን ፡ ጠቢበ ፡ ወማእምረ ፡ በኀበ ፡ ኵሉ ፡ ሰብእ ።9ወለትሰ ፡ ትጋህ ፡ ኅቡእ ፡ ይእቲ ፡ ለአቡሃ ፤ ወኀልዮታ ፡ ያሰርሮ ፡ ለንዋሙ ፤ እምንእሳ ፡ እስከ ፡ አመ ፡ ትልህቅ ፡ እንበለ ፡ ትፍተው ፡ 10 . . . . . ወእምድኅረኒ ፡ አውሰበት ፡ ከመ ፡ ኢትምክን ።11ለወለት ፡ እንተ ፡ ኢተኀፍር ፡ አጽንዕ ፡ ዐቂቦታ ፤ ከመ ፡ ኢትረሲከ ፡ ስላተ ፡ ጸላኢከ ፡ ወ[ነገረ] ፡ ለማኅፈርከ ፡ ወለማኅበረ ፡ ሕዝብከ ፤ ከመ ፡ ኢታስተኀፍርከ ፡ በማእከለ ፡ ብዙኃን ።12ኢታድሉ ፡ ለኵሉ ፡ ሰብእ ፡ እንበይነ ፡ ላሕዩ ፤ ወኢትባእ ፡ ማእከለ ፡ አንስት ።13እምነ ፡ ልብስ ፡ ይወፅእ ፡ ቍንቍኔ ፤ ወእምነ ፡ አንስት ፡ ኵሉ ፡ እኪት ።14ይኄይስ ፡ እከይሁ ፡ ለብእሲ ፡ እምነ ፡ ኂሩታ ፡ ለብእሲት ፤ ብእሲትኒ ፡ እንተ ፡ ታስተቃንእ ፡ ኀፍረት ፡ ይእቲ ።15ወእዜከር ፡ ግብሮ ፡ ለእግዚአብሔር ፡ ወእነግር ፡ ዘርኢኩ ፤ እስመ ፡ በቃሉ ፡ ለእግዚአብሔር ፡ ኵሉ ፡ ግብሩ ።16ፀሓይኒ ፡ ያበርህ ፡ ወያርኢ ፡ ላዕለ ፡ ኵሉ ፤ ወስብሐቲሁ ፡ ለእግዚአብሔር ፡ > ምሉእ ፡ < ላዕለ ፡ ኵሉ ፡ ግብሩ ።17ወኢገብረኑ ፡ እግዚአብሔር ፡ ለቅዱሳኑ ፡ ከመ ፡ ይንግሩ ፡ ኵሎ ፡ ስብሐቲሁ ፤ ዘአጽንዐ ፡ እግዚአብሔር ፡ ዘኵሎ ፡ ይመልክ ፤ ወኵሉ ፡ ጽኑዕ ፡ በስብሐቲሁ ።18ለቀላይኒ ፡ ወለልብኒ ፡ ይረክቦሙ ፡ አሠሮሙ ፤ ወያአምሮሙ ፡ ምክሮሙ ፤ ወያአምር ፡ እግዚአብሔር ፡ ኵሎ ፡ ኅሊና ፡ ልብ ፤ ወርእየ ፡ ትእምርቶ ፡ ለዓለም ።19ወዘኒ ፡ ኀለፈ ፡ ወዘኒ ፡ ይመጽእ ፡ ውእቱ ፡ ይዜኑ ፤ ወይከሥት ፡ አሠረ ፡ ዘኅቡእ ።20ወአልቦ ፡ ዘያመሥ[ጦ] ፡ እምነ ፡ ኵሉ ፡ ምክር ፤ ወአልቦ ፡ ዘይሴወሮ ፡ እምነ ፡ ኵሉ ፡ ወኢአሐ[ቲ]ኒ ፡ > ቃል ፡ < 21 ወአሰርገ[ወ] ፡ ዕበ[ያ] ፡ ለጥበቢሁ ፤ እንተ ፡ ይእቲ ፡ ዘእንበለ ፡ ይትፈጠር ፡ ዓለም ፡ ወለዓለምኒ ፡ ትሄሉ ፤ ኢሂ ፡ ትትዌሰክ ፡ ወኢሂ ፡ ተሐጽጽ ፤ ወኢፈቀደ ፡ ወኢአሐደ ፡ መምክረ ።22ወኵሉ ፡ ግብሩ ፡ ሠናይ ፡ ወመፍትው ፤ ወከመ ፡ ብርሃን ፡ ውእቱ ፡ ለርእይ ።23ወኵሉ ፡ ዝንቱ ፡ ሕያው ፡ ወይሄሉ ፡ ለዓለም ፤ ወይሰምዕ ፡ በኵሉ ፡ ዘፈቀዱ ።24ወኵሉ ፡ ምክዕቢተ ፡ ፩፩ቅድመ ፡ ካልኡ ፤ ወአልቦ ፡ ዘገብረ ፡ ወኢምንተኒ ፡ ዘሕጹጽ ።25ምስለ ፡ ካልኡ ፡ አስተጻንዖሙ ፡ ለሠናይ ፤ ወመኑ ፡ ዘይጸግብ ፡ እምርእየ ፡ ሠናይቱ ።