ጥበበ ሲራክ 46

1ጽኑዕ ፡ ውእቱ ፡ በውስተ ፡ ቀትል ፡ ኢያሱ ፡ ወልደ ፡ ነዌ ፤ ወተለዎ ፡ እምነ ፡ ሙሴ ፡ ተነብዮት ፤ ወኮነ ፡ በከመ ፡ ስሙ ፡ ዐቢየ ፡ ወአድኀኖሙ ፡ ለኅሩያኒሁ ፤ ወተበቀለ ፡ ፀሮሙ ፡ ከመ ፡ ያውርሶሙ ፡ ለእስራኤል ፡ ምድሮሙ ።

2ወተሰብሐ ፡ ሶበ ፡ አንሥአ ፡ እዴሁ ፤ ወሶበ ፡ ቈልቈለ ፡ ኲናተ ፡ ላዕለ ፡ አህጉሪሆሙ ።

3መኑ ፡ እምቅድሜሁ ፡ ዘኮነ ፡ ከማሁ ፤ ወለሊሁ ፡ እግዚአብሔር ፡ ጸብአ ፡ ሎሙ ፡ ፀሮሙ ።

4አኮኑ ፡ በእዴሁ ፡ ቆመት ፡ ፀሓይ ፤ ወአሐቲ ፡ ዕለት ፡ ሰኑየ ፡ መዋዕለ ፡ ኮነት ።

5ወጸውዖ ፡ ለልዑል ፡ ወኀያል ፤ ሶበ ፡ አመንደብዎ ፡ ፀሩ ፡ እምዐውዱ ፤ ወ[አውሥኦ] ፡ እግዚአብሔር ፡ ዐቢይ ፤ በእብነ ፡ በረድ ፡ ወበኀይል ፡ ጽኑዕ ፤

6ወአዝነመ ፡ ላዕለ ፡ ሕዝብ ፡ እለ ፡ ጸብእዎሙ ፤ በውስተ ፡ ጸድፍ ፡ አጥፍኦሙ ፡ ለእለ ፡ ተቃተልዎሙ ፤ ከመ ፡ ያእምሩ ፡ ሕዝብ ፡ ኀይሎ ፤ እስመ ፡ እግዚአብሔር ፡ ውእቱ ፡ ዘይጸብኦሙ ፤ ወአትለወ ፡ ምስሌሆሙ ፡ ኀይሎ ።

7ወበመዋዕለ ፡ ሙሴኒ ፡ ገብረ ፡ ሣሀሎ ፡ ምስሌሆሙ ፤ ውእቱ ፡ ወካሌብ ፡ ወልደ ፡ ዮፎኒ ፤ ወተቃወሙ ፡ ቅድመ ፡ ፀር ፡ ወከልእዎሙ ፡ ለሕዝብ ፡ ጌጋየ ፤ ወአኅደግዎሙ ፡ እኩየ ፡ ነጐርጓረ ።

8ወእሙንቱ ፡ ዳእሙ ፡ ክልኤሆሙ ፡ እለ ፡ ድኅኑ ፤ እምነ ፡ ስሳ ፡ እልፍ ፡ አጋራን ፤ ወቦኡ ፡ ምድረ ፡ እንተ ፡ ትውሕዝ ፡ ሐሊበ ፡ ወመዓረ ።

9ወወሀቦ ፡ እግዚአብሔር ፡ ኀይለ ፡ ለካሌብ ፤ ወነበረ ፡ ምስሌሁ ፡ እስከ ፡ አመ ፡ ይልህቅ ፤ ወአዕረጎ ፡ ውስተ ፡ መልዕልተ ፡ ምድር ፤ ወውሉዱ ፡ ተካፈሉ ፡ ርስቶሙ ፤

10ከመ ፡ ይርአዩ ፡ ኵሎሙ ፡ ደቂቀ ፡ እስራኤል ፤ ከመ ፡ ሠናይ ፡ ተሊዎቱ ፡ ለእግዚአብሔር ።

11ወመኳንንቲሆሙኒ ፡ ኵሎሙ ፡ በበአስማቲሆሙ ፤ ወኵሎሙ ፡ እለ ፡ ኢዘመወ ፤ ልቦሙ ፤ ወኵሎሙ ፡ እለ ፡ ኢኅደግዎ ፡ ለእግዚአብሔር ፡ ቡሩክ ፡ ለይኩን ፡ ዝክሮሙ ።

12ወይትፈሣሕ ፡ አዕጽምቲሆሙ ፡ በኀበ ፡ ሀለዉ ፤ ወይትባረኩ ፡ ውሉዶሙ ፡ ወይክበሩ ።

13ሳሙኤልኒ ፡ ፍቁር ፡ ውእቱ ፡ በኀበ ፡ እግዚአብሔር ፡ ወነቢይ ፡ ውእቱ ፡ በኀበ ፡ እግዚአብሔር ፡ ወያነግሥ ፡ ንጉሠ ፤ ወይቀብእ ፡ ንጉሠ ፡ ለሕዝቡ ።

14ወበሕገ ፡ እግዚአብሔር ፡ [ኰነነ ፡] ትዕይንተ ፤ ወተሣሀሎ ፡ እግዚአብሔር ፡ ለያዕቆብ ።

15ወበሃይማኖቱ ፡ ጸንዐ ፡ ተነብዮ ፡ ነቢይ ፤ ወአስተርአየ ፡ በቃሉ ፡ ራእየ ፡ ምእመን ።

16ወጸውዖ ፡ ለእግዚአብሔር ፡ ኀያል ፤ ሶበ ፡ አመንደብዎ ፡ ፀሩ ፡ ወዐገትዎ ፤ በመሥዋዕተ ፡ ማሕስዐ ፡ በግዕ ።

17ወአንጐድጐደ ፡ እግዚአብሔር ፡ በሰማይ ፤ ወበዐቢይ ፡ ፀዓዕ ፡ ገብረ ፡ ድምፀ ፤ ቃሉ ።

18ወቀጥቀጦሙ ፡ ለነገሥተ ፡ ጢሮስ ፤ ወለኵሎሙ ፡ ነገሥተ ፡ ፍልስጥኤም ።

19ወእንበለ ፡ ይብጻሕ ፡ ዕለተ ፡ ሞቱ ፤ አስምዖ ፡ ለእግዚአብሔር ፡ ወለመሲሑ ፤ እምንዋዮሙ ፡ እስከ ፡ አሣእኒሆሙ ፡ ከመ ፡ ኢነሥአ ፡ እምኔሆሙ ፡ አምኵሎሙ ፤ ወአልቦዐ ፡ እምውስቴቶሙ ፡ ዘግእዞ ።

20ወተነበየ ፡ እምድኅረ ፡ ሞተ ፤ ወነገረ ፡ ሞቶ ፡ ለንጉሥ ፤ ወአ[ን]ሥአ ፡ ቃሎ ፡ እምውስተ ፡ ምድር ፤ ወበተነብዮቱ ፡ አደምሰሰ ፡ ጌጋዮሙ ፡ ለሕዝብ ።