ጥበበ ሲራክ 45

1ወሙሴኒ ፡ ዘቡሩክ ፡ ዝክሩ ፤2ወስብሐተ ፡ ቅዱሳን ፡ ዝክሩ ፡ ወአምሳሉ ፤ ወአዕበዮ ፡ ወግሩመ ፡ ኮነ ፡ ላዕለ ፡ ፀር ።3ወገብረ ፤ ተኣምረ ፡ በቃሉ ፤ ወወደሶ ፡ በቅድመ ፡ ነገሥት ፡ ወአዘዞ ፡ በእንተ ፡ ሕዝቡ ፤ ወአርአዮ ፡ ስብሐቲሁ ።4ወቀደሶ ፡ በበይነ ፡ ሃይማኖቱ ፡ ወየውሃቱ ፤ ወኪያሁ ፡ ኀረየ ፡ እምነ ፡ ኵሉ ፡ ሰብእ ።5ወአስምዖ ፡ ቃሎ ፤ ወአብኦ ፡ ውስተ ፡ ቆባር ፤ ወወሀቦ ፡ ትእዛዘ ፡ በቅድሜሁ ፤ ወመሀሮ ፡ ሕገ ፡ ሕይወት ፤ ከመ ፡ ይምሀሮ ፡ ለያዕቆብ ፡ ኪዳኖ ፤ ወኵነኔሁ ፡ ለእስራኤል ።6ወአሮንሂ ፡ ዐቢይ ፡ ከማሁ ፡ ቅዱስ ፤ ወእኁሁሰ ፡ አምሕዝበ ፡ ሌዊ ።7ወአቀመ ፡ ሎቱ ፡ ሕገ ፡ ዘለዓለም ፤ ወወሀቦ ፡ ቅድሳቶሙ ፡ ለሕዝብ ፤ ወአብፅዖ ፡ በሠናይ ፡ ሰርጕ ፤ ወአልበሶ ፡ ልብሰ ፡ ክብር ።8ወአልበሶ ፡ ወአስተመክሖ ፡ በኵሉ ፡ ወአጽንዖ ፡ በመዋዕለ ፡ ኀይል ፤ ወቆጶናቲሁኒ ፡ ወልብሰ ፡ ጶዴሬ ፡ ወልብሰ ፡ ዐጽፍ ።9ወእንተ ፡ ዐውዱ ፡ ጽጌያት ፤ ወጸናጽለ ፡ ወርቅ ፡ ብዙኅ ፡ ዐውዱ ፤ ወኀበኒ ፡ ኬደ ፤ ይደምፅ ፡ እግሩ ፡ በቃለ ፡ ፀዓዕ ፤ ወነገረ ፡ ይገብር ፡ ድምፀ ፡ ጽርሑ ፤ ወተዝካረ ፡ ለሕዝቡ ፡ወለውሉዶሙ ፤10ወአልባሰ ፡ ወርቅ ፡ ዘቅድሳት ፡ ወያክንት ፤ ወአልባስ ፡ ዘተገብረ ፡ በዐስቀ ፡ ሜላት ፤ ወአልባሰ ፡ ሎግዮን ፡ ዘበነገረ ፡ ጽድቅ ፡ ወርትዕ ፤11ልብስ ፡ በልብሰት ፡ እንተ ፡ ክዑብ ፡ ፈትላ ፡ ዘለይ ፡ ግብረ ፡ ኬንያ ፤ ወዕንቍ ፡ ዘዕጹብ ፡ ሤጡ ፡ ኅርው ፡ ዐይነ ፡ ማኅተም ፤ መቍጸሪቱ ፡ ወርቅ ፤ ወግቡር ፡ በ[ዕንቍ] ፤ ወጽሑፍ ፡ ተዝካር ፡ ውስቴቱ ፡ ወልኩእ ፤ በአምጣነ ፡ ኈልቆሙ ፡ ለደቂቀ ፡ እስራኤል ፡ በበሕዘቢሆሙ ።12ወቀጸላ ፡ ወርቅ ፡ መልዕልተ ፡ ቄዳራን ፡ በአምሳለ ፡ ዐይነ ፡ ማኅተም ፡ ቅድሳቱ ፡ ምክሐ ፡ ክብሩ ፡ ወግብረ ፡ ኀይሉ ፤ መፍትው ፡ ለዐይን ፡ ሰርጉ ፡ ወፈድፋደ ፡ ሥኑ ።13ወኢተገብረ ፡ እምቅድሜሁ ፡ ዘከማሁ ፤ ለዓለም ፡ አልቦ ፡ ዘለብሰ ፡ ከማሁ ፤ ዘእንበለ ፡ ደቂቁ ፡ ባሕቲቶሙ ፤ ወአዝማዲሁኒ ፡ ለዝላፉ ፤14ከመ ፡ ይሠዑ ፡ ሎቱ ፡ በመሥዋዕት ፤ ኵሎ ፡ አሚረ ፡ እንተ ፡ ጸብሐት ፡ ካዕበ ፡ ለዕለት ።15ወፈፀመ ፡ ሎሙ ፡ ሙሴ ፡ እደዊሆሙ ፤ ወቀብኦ ፡ ቅብአ ፡ ቅድሳት ። ወኮኖ ፡ ሕገ ፡ ዘለዓለም ፤ ወለውሉዱኒ ፡ በአምጣነ ፡ መዋዕለ ፡ ሰማይ ፤ ከመ ፡ ይትቀነዩ ፡ ሎቱ ፡ ወይኩንዎ ፡ ካህናቲሁ ፤ ወከመ ፡ ይባርክዎ ፡ ለሕዝቡ ፡ በስሙ ።16ወኪያሁ ፡ ኀረየ ፡ እምኵሉ ፡ ሕያዋን ፤ ከመ ፡ ያብእ ፤ መሥዋዕተ ፡ ለእግዚአብሔር ፤ ወዕጣነ ፡ ወተዝካረ ፡ መዐዛ ፡ ሠናይ ፤ ከመ ፡ ያስተስሪ ፡ ሎሙ ፡ ለሕዝቡ ።17ወወሀቦ ፡ ትእዛዞ ፤ ወሠርዖ ፡ ፍትሖ ፡ ወኵነኔሁ ፤ ከመ ፡ ይምሀሮ ፡ ለያዕቆብ ፡ ስምዖ ፤ ወከመ ፡ ያለብዎሙ ፡ ለእስራኤል ፡ ሕጎ ።18ወተቃወምዎ ፡ ነኪራን ፡ ወቀንኡ ፡ ላዕሌሁ ፡ በገዳም ፤ ዕደው ፡ እለ ፡ ዳታን ፡ ወአቤሮን ፤ ወትዕይንቶሙ ፡ ለእለ ፡ ቆሬ ፤ ወሞቱ ፡ በመቅሠፍት ፡ ወበመንሱት ።19ወርእዮሙ ፡ እግዚአብሔር ፡ ወኢያሥመርዎ ፤ ወአጥፍኦሙ ፡ በመዐቱ ፤ ወገብረ ፡ ዕጹበ ፡ በላዕሌሆሙ ፤ ወአኅለቆሙ ፡ በነደ ፡ እሳት ።20ወወሰኮ ፡ ክብረ ፡ ለአሮን ፤ ወወሀቦ ፡ መክፈልቶ ፡ ቀዳሜ ፡ እክሎሙ ፤ ወቅድመ ፡ ሠርዖሙ ፡ እክለ ፡ ዘያጸግቦሙ ፤21ከመ ፡ ይብልዑ ፡ መሥዋዕቶ ፡ ለእግዚአብሔር ፤ ዘወሀቦ ፡ ሎቱ ፡ ወለፍሬሁ ፤22ከመ ፡ ኢይትካፈሎሙ ፡ ምድሮሙ ፡ ለሕዝቡ ፤ ወኢይትዋረስ ፡ ምስለ ፡ ሕዝ[ብ] ፡ ርስ[ተ] ፤ እስመ ፡ ውእቱ ፡ ክፍልከ ፡ ወርስትከ ።23ወፊንሐስኒ ፡ ወልደ ፡ አልዐዛር ፡ ሣልስ ፡ ክብሩ ፤ እስመ ፡ ቀንአ ፡ ለፍርሀተ ፡ እግዚአብሔር ፤ ወአቀሞ ፡ ለገሥጾ ፡ ሕዝቡ ፤ በኂሩና ፡ ነፍሱ ፡ እምፈቃዱ ፡ አስተርአየ ፡ ለእስራኤል ።24ወእንበይነ ፡ ዝንቱ ፡ አቀመ ፡ ሎቱ ፡ ኪዳነ ፡ ሰላም ፤ ከመ ፡ ይምሀሮሙ ፡ ለሕዝቡ ፡ በሥርዐተ ፡ ቅዱሳን ፤ ወከመ ፡ ይኩኖ ፡ ሎቱ ፡ ወለዘርኡ ፡ ዐቢይ ፡ ክህነት ፡ ዘለዓለም ፤25ወትርሲተ ፡ ወልዱ ፡ ለዳዊት ፡ ዘእምነገደ ፡ ይሁዳ ፤ ወመክፈልተ ፡ መንግሥተ ፡ ውሉዱ ፡ ዘበሕጉ ፤ ወሎቱኒ ፡ ርስቱ ፡ ወለውሉዱ ።26ከመ ፡ የሀቦሙ ፡ ጥበበ ፡ ውስተ ፡ ልቦሙ ፤ ከመ ፡ ይኰንንዎሙ ፡ ለሕዝቡ ፡ በጽድቅ ፤ ከመ ፡ ኢያማስኖሙ ፡ በረከቶሙ ፡ ወክብሮሙ ፡ በኵሉ ፡ መዋዕሊሆሙ ።