ጥበበ ሲራክ 8

1ወኢትትጋአዝ ፡ ምስለ ፡ ዐበይት ፡ ሰብእ ፤ ከመ ፡ ኢትደቅ ፡ ውስተ ፡ እዴሆሙ ።

2ወኢትትቃሐው ፡ ምስለ ፡ ዘይብዕለከ ፤ ከመ ፡ በብዕሉ ፡ ኢይማእከ ፤ እስመ ፡ ብዙኃን ፡ ተሀጕሉ ፡ በእንተ ፡ ወርቅ ፤ ወገመጾሙ ፡ ልቦሙ ፡ ለነገሥት ።

3ወኢትትላኰይ ፡ ምስለ ፡ ብእሲ ፡ ነባቢ ፤ ወእመ ፡ አኮሰ ፡ ወጣሕከ ፡ ዕፀወ ፡ ዲበ ፡ እሳት ።

4ኢትሳለቅ ፤ ምስለ ፡ አብድ ፤ ከመ ፡ ኢታኅስር ፡ አዝማዲከ ።

5ኢትትሀበቦ ፡ ለዘይትኃነይ ፡ በእንተ ፡ ጌጋዩ ፤ ተዘከር ፡ ከመ ፡ ኵልነ ፡ ኃጥኣን ፡ ንሕነ ።

6ኢታስተኣክዮ ፡ ለሰብአ ፡ በርሥአቱ ፤ እስመ ፡ እምውስቴትነሂ ፡ ቦ ፡ ዘይረሥእ ።

7ኢትትፈሣሕ ፡ ላዕለ ፡ ዘሞተ ፤ ተዘከር ፡ ከመ ፡ ኵልነ ፡ ንመውት ።

8ኢታስትት ፡ ነገረ ፤ ጠቢባን ፤ ወተመሀር ፡ አምሳሊሆሙ ፤ እስመ ፡ በኀቤሆሙ ፡ ትረክባ ፡ ለጥበብ ፤ ወተፀ[ምዶ ፡] መኳንንት ።

9ወዕቀብ ፡ ተግሣጾሙ ፡ ለአእሩግ ፤ እስመ ፡ እሙንቱሂ ፡ በኀበ ፡ አበዊሆሙ ፡ ተምህሩ ፤ ወአንተሂ ፡ በኀቤሆሙ ፡ ትጠብብ ፤ ወትረክብ ፡ ዘትነብብ ፡ በጊዜ ፡ ትካዝከ ፡ ወታአምር ፡ ዘታወሥእ ።

10ኢትሱጥ ፡ እሳቶሙ ፡ ለኃጥኣን ፤ ከመ ፡ ኢተዐይ ፡ በነዶሙ ።

11ኢትትዋሣእ ፡ በኀበ ፡ ጸዓሊ ፤ ከመ ፡ ኢያስሕትክ ፡ በቃለ ፡ አፉሁ ።

12ወኢትለቅሖ ፡ ለዘ ፡ ይብዕለከ ፤ ወለእመ ፡ ለቃሕካሁ ፡ ረሲ ፡ ከመ ፡ ዘሀጐልከ ።

13ኢትትሐበ[ይ ፡ በ] ዘይጸንዐከ ፤ ወለእመሰ ፡ ተሐበይከ ፡ ኀሊ ፡ እንከ ፡ ዘከመ ፡ ትፈዲ ፡ ለሊከ ።

14ኢትሳነን ፡ ምስለ ፡ መኰንን ፤ እስመ ፡ በከመ ፡ ክብሩ ፡ ያገብኡ ፡ ሎቱ ፡ ፍትሐ ።

15ምስለ ፡ መስተኀይል ፡ ኢትኅበር ፡ መንገደ ፤ ከመ ፡ ኢይትባዕ ፡ ላዕሌከ ፤ እስመ ፡ ውእቱሰ ፡ ዘፈቀደ ፡ በልቡ ፡ ይገብር ፤ ወትመውት ፡ አንተ ፡ በእበደ ፡ ዚአሁ ።

16ወኢትትጋአዝ ፡ ምስለ ፡ መዐትም ፤ ወኢትፃእ ፡ ሐቅለ ፡ ምስሌሁ ፤ እስመ ፡ ወኢከመ ፡ ምንትኒ ፡ ክዒወ ፡ ደም ፡ በኀቤሁ ፤ ወኀበ ፡ አልቦ ፡ ረድኤት ፡ ይወስደከ ።

17ወኢትትማከር ፡ ምስለ ፡ አብድ ፤ እስመ ፡ ኢይክል ፡ ዐቂበ ፡ ነገር ፡ ዘሰምዐ ።

18ኢትግበር ፡ ቅድመ ፡ ነኪር ፡ ትካዘከ ፤ እስመ ፡ ኢታአምር ፡ እፎ ፡ ይበጽሕ ።

19ኢትክሥት ፡ ለኵሉ ፡ ሰብእ ፡ ዘውስተ ፡ ልብከ ፤ ከመ ፡ ኢይኩንከ ፡ ህጉለ ፡ ዕሴትከ ።