ጥበበ ሲራክ 7

1ኢትግበራ ፡ ለእኪት ፤ ወኢይርከብከ ፡ እኩይ ።

2ተገሐሥ ፡ እምነ ፡ ዐመፃ ፤ ወትትገሐሥ ፡ እምኔከ ፡ ለሊሃ ።

3ኢትዝራእ ፡ ውስተ ፡ ትልመ ፡ ኀጢአት ፤ ክመ ፡ ኢትአእረራ ፡ ለከ ፡ ምስብዒተ ።

4ኢትስአል ፡ በኀበ ፡ እግዚአብሔር ፡ መንግሥተ ፡ > ወኢትስአል ፡ በኀበ ፡ ንጉሥ ፡ መንበረ ፡ ክብር ። <5 ወኢትጸደቅ ፡ ቅድመ ፡ እግዚአብሔር ፤ ወኢትጠበብ ፡ በኀበ ፡ ንጉሥ ።

6ወኢትፍቅድ ፡ ከዊነ ፡ መኰንን ፤ ዮጊ ፡ ኢትክል ፡ ተበቅሎቶ ፡ ለዘአበሰ ፤ ወዮጊ ፡ ታደሉ ፡ ለገጸ ፡ ዐቢይ ፤ ወታበውእ ፡ ኀጢአተ ፡ ማእከለ ፡ ጽድቅከ ።

7ወኢተእብስ ፡ ለሀገርከ ፤ ወኢታስሕት ፡ ርእሰከ ፡ በማእከለ ፡ ሕዝብከ ።

8ወኢትፀምር ፡ አሲረ ፡ ክልኤቲ ፡ ኀጣይእ ። (ኅቡረ ፡ ኢታድርግ ፤) እስመ ፡ እምውስተ ፡ አሐቲሰ ፡ ኢታመሥጥ ፡ (ግብር) ።

9ወኢትበል ፡ በብዝኀ ፡ መባእየ ፡ ይሰሪ ፡ ሊተ ፤ ወእምከመ ፡ አባእኩ ፡ ለእግዚአብሔር ፡ ልዑል ፡ ይሣሀለኒ ።

10ወኢትጐጕእ ፡ ሶበ ፡ ትጼሊ ፤ ወኢታስትት ፡ ገቢረ ፡ ምጽዋት ።

11ወኢትሥሐቅ ፡ ላዕለ ፡ ብእሲ ፡ ሕዙን ፤ እስመ ፡ ሀለወ ፡ ዘያሐምም ፡ ወያስተፌሥሕ ።

12ወኢትሕርስ ፡ ሐሰተ ፡ ላዕለ ፡ ቢጽከ ፤ ወኢትግበር ፡ ከመዝ ፡ ላዕለ ፡ (ቢጽከ ፡ ወ)ዐርክከ ።

13ወኢታፍቅር ፡ ሐሰተ ፡ ለዝሉፉ ፡ ወኢበምንትኒ ፤ እስመ ፡ ደኃሪታ ፡ ትብእሰከ ።

14ኢትዛለፍ ፡ በማእከለ ፡ ሊቃውንት ፤ ወኢትሚጥ ፡ ብጽዐቲከ ፡ ዘነበብከ ፡ (ወኢትወልጥ ፡ ቃለከ ።) ወኢታስትት ፡ ተግባረ ፡ እደዊከ ፤ ወዘርአከ ፡ ዘያበቍል ፡ ፈጣሪከ ፡

16ወኢትኅበር ፡ ምስለ ፡ ኃጥኣን ፡ ለእመ ፡ በዝኁ ፤

17ተዘከር ፡ ከመ ፡ ኢይጐነዲ ፡ መንሱት ። ፈድፋደ ፡ አትሕታ ፡ ለነፍስከ ፤ እስመ ፡ ፍዳሆሙ ፤ ለኃጥኣን ፤ ዕፄ ፤ ወእሳት ።

18እንተ ፡ ጸብሐት ፡ ኢትወልጥ ፡ ዐርከ ፤ ወኢትህጐል ፡ ዐርከከ ፡ በእንተ ፡ ወርቅ ፡ ቀይሕ ።

19ወኢትጽላእ ፡ ብእሲተ ፡ ጠባበ ፡ ወኄርተ ፡> እስመ ፡ ሞገሳ ፡ ይትበደር ፡ እምወርቅ ። <20 ወኢታሕሥም ፡ ላዕለ ፡ ነባሪከ ፡ ዘበጽድቅ ፡ ይትቀነይ ፡ ለከ ፤ ወኢላዕለ ፡ ገባኢከ ፡ ዘይሜጡ ፡ ነፍሶ ፡ በእንቲአከ ።

21አፍቅሮ ፡ እምነፍስከ ፡ ለጠቢብ ፡ ነባሪከ ፤ ወኢታህጕሎ ፡ ዕሴቶ ፡ ከመ ፡ ታግዕዞ ፡ (እንተ ፡ አሰፈውከ ።) 22 ወኢትኅድግ ፡ ዘልፈ ፡ ፈቂደ ፡ እንስሳከ ፤ ወዘይበቍዐከ ፡ እምውስቴቶሙ ፡ አንብር ፡ ኀቤክ ።

23ለእመ ፡ ብከ ፡ ውሉደ ፡ ገሥጸሙ ፡ ወመሀሮሙ ፤ እምንእሶሙ ፡ ግምጽ ፡ ክሳዶሙ ።

24ወለእመ ፡ ብከ ፡ አዋልደ ፡ ዕቀቦን ፡ ወኢታስሕቶን ፡ ወኢትሥሐቅ ፡ ሎን ፡ ወኢትትየውሆን ።

25አብጽሓ ፡ ለወለትከ ፡ በዐቅማ ፡ (ወዕቀባ ፡) ወዐቢየ ፡ ግብረ ፡ ፈጸምከ ፡ (ወአንፈስከ) ፤ ወለብእሲ ፡ ጠቢብ ፡ አስተዋስባ ።

26ወለእመ ፡ ብከ ፡ ብእሲተ ፡ ዘከመ ፡ ነፍስከ ፡ ኢታውፅኣ ።

27በኵሉ ፡ ልብከ ፡ አክብሮ ፡ ለአቡከ ፤ ወኢትርሳዕ ፡ ሕማማ ፡ ለእምከ ።

28ወተዘከር ፡ ከመ ፡ በእንቲአሆሙ ፡ ተወለድከ ፤ ወምንተ ፡ ተዐስዮሙ ፡ ህየንተ ፡ ዘገብሩ ፡ ለከ ።

29በኵሉ ፡ ነፍስከ ፡ ፍርሆ ፤ ለእግዚአብሔር ፤ ወአክብሮሙ ፡ ለካከሀናቲሁ ።

30ወበኵሉ ፡ ኀይልከ ፡ አክብሮ ፡ ለፈጣሪከ ፤ ወኢትኅድጎሙ ፡ ለእለ ፡ ይፀመድዎ ።

31ፍርሆ ፡ ለእግዚአብሔር ፡ ወአክብር ፡ ዘይፀመዶ ፤ ወሀቦ ፡ ክፍሎ ፡ ዘእዙዝ ፡ ለከ ፤ ቀዳሚያተ ፡ ወዘበእንተ ፡ ኀጢአት ፡ ወመዝራዕተ ፤ ወመሥዋዕተ ፡ ቅድሳት ፡ ወቀዳሜ ፡ ቅድሳት ።

32ለነዳይ ፡ ስፋሕ ፡ እዴከ ፤ ከመ ፡ ፍጽምተ ፡ ትኩን ፡ በረከትከ ።

33ዕሴተ ፡ ጸጋከ ፡ ትረክብ ፡ በእንተ ፡ ኵሉ ፡ ነፍስ ፤ ወለዘሞተሂ ፡ ኢትኅድግ ፡ ጸግዎ ።

34ወኢትኅድግ ፤ እምእለ ፡ ይበክዩ ፤ ወላሑ ፡ ምስለ ፡ ዘይላሑ ።

35ወኢትትሀከይ ፡ ሐውጾ ፡ ድዉይ ፤ ወበዝንቱ ፤ ያፈቅሩከ ።

36ውስተ ፡ ኵሉ ፡ ዘተናገርከ ፡ ተዘከራ ፡ ለደኃሪትከ ፤ ወኢተአብስ ፡ ለዝላፉ ።