ዘዘካርያስ ነቢይ 2

1 ወካዕበ ፡ አንሣእኩ ፡ አዕይንትየ ፡ ወርኢኩ ፡ ወነዋ ፡ ብእሲ ፡ ወውስተ ፡ እዴሁ ፡ ሐብለ ፡ መስፈርት ። 2 ወእቤሎ ፤ አይቴ ፡ ተሐውር ፤ ወይቤለኒ ፤ ከመ ፡ እስፍራ ፡ ለኤሩሳሌም ፡ ወኣእምራ ፡ ሚመጠን ፡ ኑኃ ፡ ወሚመጠን ፡ ርሕባ ። 3 ወእንዘ ፡ ይቀውም ፡ ዝኩ ፡ መልአክ ፡ ዘይትናገረኒ ፡ ወፅአ ፡ ካልእ ፡ መልአክ ፡ ወተቀበሎ ። 4 ወይቤሎ ፤ ሩጽ ፡ ወበሎ ፡ ለዝኩ ፡ ወሬዛ ፤ ዘእንበለ ፡ ፍሬአ ፡ ትነብር ፡ ኤሩሳሌም ፡ እምብዙኅአ ፡ ሰብእ ፡ ወእንስሳ ፡ ዘማእከላ ። 5 ወአነአ ፡ እከውና ፡ ጥቅመ ፡ እሳት ፡ ዐውዳ ፤ ይቤ ፡ እግዚአብሔር ፤ ወእከውና ፡ ክብራ ፡ በማእከላ ። 6 ኦኦጕዩ ፡ እምብሔረ ፡ ደቡብ ፤ ይቤ ፡ እግዚአብሔር ፤ እስመ ፡ እምአርባዕቱ ፡ ነፋሳተ ፡ ሰማይ ፡ አስተጋባእክዎሙ ፤ ይቤ ፡ እግዚአብሔር ። 7 ውስተ ፡ ጽዮን ፤ ወይድኅኑ ፡ እለ ፡ ይነብሩ ፡ ለወለተ ፡ ባቢሎን ። 8 እስመ ፡ ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ፈነወኒ ፡ በድኅረ ፡ ስብሐቲሁ ፡ ወላዕለ ፡ አሕዛብ ፡ እለ ፡ ሐብለዩክሙ ፡ ከመ ፡ ዘገሰሰ ፡ ብንተ ፡ ዐይን ። 9 ወናሁ ፡ አነ ፡ ኣመጽእ ፡ እዴየ ፡ ላዕሌሆሙ ፡ ወይከውኑ ፡ ሐብለ ፡ ለእለ ፡ ይትቀነዩ ፡ ሎሙ ፡ ወያአምሩ ፡ ከመ ፡ ፈነወኒ ፡ እግዚአብሔር ፡ ዘኵሎ ፡ ይመልክ ። 10 ተፈሥሒ ፡ ወተሐሠዪ ፡ ወለተ ፡ ጽዮን ፡ እስመ ፡ አነ ፡ እመጽእ ፡ ወአኀድር ፡ ማእከሌኪ ፤ ይቤ ፡ እግዚአብሔር ። 11 ወይጐይዩ ፡ ብዙኃን ፡ አሕዛብ ፡ ኀበ ፡ እግዚአብሔር ፡ [ወ]ይእተ ፡ አሚረ ፡ ወይከውንዎ ፡ ሕዝቦ ፡ ወይነብሩ ፡ ማእከሌኪ ፡ ወታአምሪ ፡ ከመ ፡ ፈነወኒ ፡ ኀቤኪ ፡ እግዚአብሔር ፡ ዘኵሎ ፡ ይመልክ ። 12 ወይወርሶ ፡ እግዚአብሔር ፡ ለይሁዳ ፡ መክፈልቶ ፡ በምድረ ፡ ቅድስት ፡ ወዓዲ ፡ የኀርያ ፡ እግዚአብሔር ፡ ለኤሩሳሌም ። 13 ወይፈርህ ፡ ኵሉ ፡ ዘነፍስ ፡ እምቅድመ ፡ ገጹ ፡ ለእግዚአብሔር ፡ እስመ ፡ ተንሥአ ፡ እምነ ፡ ደመና ፡ ቅዱሳኒሁ ።