ዘዘካርያስ ነቢይ 5

1 ወካዕበ ፡ ተመየጥኩ ፡ ወርኢኩ ፡ ማዕፅደ ፡ ዘይሰርር ። 2 ወይቤለኒ ፤ ምንተ ፡ ትሬኢ ፤ ወእቤሎ ፤ እሬኢ ፡ ማዕፅደ ፡ ዘይሰርር ፡ ወኑኁ ፡ ዕሥራ ፡ በእመት ፡ ወጽፍሑ ፡ ዕሥር ፡ በእመት ። 3 ወይቤለኒ ፤ ዝንቱኬ ፡ ዘየሐውር ፡ ውስተ ፡ ኵሉ ፡ ገጸ ፡ ምድር ፡ ኵሎ ፡ ሰራቄ ፡ ወዘማዌ ፡ ዝንቱ ፡ ይትቤቀሎ ፡ ወይቀትሎ ፡ ወለኵሉ ፡ ዘይምሕል ፡ በሐሰት ፡ ዝንቱ ፡ ይትቤቀሎ ፡ በሞት ። 4 ወኣበውኦ ፡ ቤተ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወቤተ ፡ ኵሉ ፡ ዘይምሕል ፡ በስምየ ፡ በሐሰት ፡ ወየኀድር ፡ ማእከለ ፡ ቤቱ ፡ ወያኀልቆ ፡ ዕፀዊሁ ፡ ወእበኒሁ ። 5 ወወፅአ ፡ መልአክ ፡ ዝኩ ፡ ዘይትናገረኒ ፡ ወይቤለኒ ፤ ነጽር ፡ በአዕይንቲከ ፡ ወርኢ ፡ ዘንተ ፡ ዘየሐውር ። 6 ወእቤ ፤ ምንት ፡ ዝንቱ ፤ ወይቤለኒ ፤ ዝንቱ ፡ መስፈርት ፡ ዘየሐውር ፡ ኵላ ፡ ምድረ ፤ ዐመፃሆሙ ፡ ውእቱ ። 7 ወናሁ ፡ መክሊተ ፡ ዐረር ፡ ይትነሣእ ፡ ወብእሲት ፡ ትነብር ፡ ማእከለ ፡ መስፈርት ። 8 ወይቤለኒ ፤ ዛቲ ፡ ኀጢአት ፤ ወወረውዋ ፡ ማእከለ ፡ መስፈርት ፡ ወወረዉ ፡ እብነ ፡ ዐረር ፡ ውስተ ፡ አፉሃ ። 9 ወአንሣእኩ ፡ አዕይንትየ ፡ ወርኢኩ ፡ ክልኤቲ ፡ አንስት ፡ የሐውራ ፡ ወነፋስ ፡ ውስተ ፡ ክነፊሆን ፡ ወቦቱ ፡ ክነፈ ፡ ውስተ ፡ እገሪሆን ፡ ወነሥኣሃ ፡ ለዝኩ ፡ መስፈርት ፡ ማእከለ ፡ ሰማይ ፡ ወምድር ። 10 ወእቤሎ ፡ ለመልአክ ፡ ዘይትናገረኒ ፤ አይቴ ፡ ይወስዳ ፡ መስፈርተ ፡ እላንቱ ፡ አንስት ። 11 ወይቤለኒ ፤ የሐንጻ ፡ ቤተ ፡ በምድረ ፡ ባቢሎን ፡ ወያስተዳልዋ ፡ ወያነብራሃ ፡ ህየ ፡ አስተዳሊዎን ።