ዘዘካርያስ ነቢይ 6

1 ወተመየጥኩ ፡ ወአንሣእኩ ፡ አዕ<ይ>ንትየ ፡ ወርኢኩ ፡ አርባዕተ ፡ ሰረገላ ፡ እንዘ ፡ የሐውሩ ፡ ማእከለ ፡ ክልኤቱ ፡ አድባር ፡ ወአድባሪሃ ፡ ዘበረድ ። 2 ወውስተ ፡ ሰረገላ ፡ ቀዳማዊ ፡ አፍራስ ፡ ቀይሓን ፡ ወውስተ ፡ ካልእ ፡ ሰረገላ ፡ አፍራስ ፡ ጸሊማን ። 3 ወውስተ ፡ ሣልስ ፡ ሰረገላ ፡ አፍራስ ፡ ጸዐደው ፡ ወውስተ ፡ ሰረገላ ፡ ራብዕ ፡ አፍራስ ፡ ኰሠኰሥ ፡ ወሐመዳዊያን ። 4 ወእቤሎ ፡ ለመልአክ ፡ ዘይትናገረኒ ፤ ምንትኑ ፡ ዝንቱ ፡ እግዚኦ ። 5 ወይቤለኒ ፡ ዝኩ ፡ መልአክ ፡ ዘይትናገረኒ ፤ እሉ ፡ እሙንቱ ፡ ነፋሳተ ፡ ሰማይ ፡ አርባዕቱ ፡ ወየሐውሩ ፡ ያቅሙ ፡ ኵላ ፡ ምድረ ፡ ለእግዚአብሔር ። 6 ወዘኀበ ፡ ጸሊማን ፡ አፍራስ ፡ የሐውሩ ፡ ድኅሬሆሙ ፡ ደቡበ ፡ ወእሉ ፡ አፍራስ ፡ ጸዓድው ፡ የሐውሩ ፡ ድኅሬሆሙ ፡ ወየሐውሩ ፡ ቀይሓን ፡ ምድረ ፡ ሰሜን ። 7 ወኰሠኰሣንሰ ፡ ይወፅኡ ፡ ወያነጽሩ ፡ ይሖሩ ፡ ወይዑድዋ ፡ ለምድር ፡ ወዖድዋ ፡ ለምድር ። 8 ወከልሐ ፡ ወይቤለኒ ፤ ናሁ ፡ እሉ ፡ የሐውሩ ፡ ምድረ ፡ ደቡብ ፡ ያዐርፍዋ ፡ ለመዐትየ ፡ በምድረ ፡ ደቡብ ። 9 ወኮነ ፡ ቃለ ፡ እግዚአብሔር ፡ ኀቤየ ፡ ወይቤለኒ ። 10 ንሣእ ፡ እምፄዋ ፡ በኀበ ፡ መላእክት ፡ ወበኀበ ፡ በቍዓኒሃ ፡ ያአምርዋ ፡ ወትበውእ ፡ አንተ ፡ ይእተ ፡ አሚረ ፡ ቤተ ፡ ዮስያስ ፡ ወልደ ፡ ሰፎንያስ ፡ ዘመጽአ ፡ እምባቢሎን ። 11 ወትነሥእ ፡ ወርቀ ፡ ወብሩረ ፡ ወትገብሮ ፡ አክሊላተ ፡ ወታስተቄጽሎ ፡ ለዮሴዕ ፡ ወልደ ፡ ዮሴዴቅ ፡ ካህን ፡ ዐቢይ ። 12 ወበሎ ፤ ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ናሁ ፡ ብእሲ ፡ ሠርቃዊ ፡ ስሙ ፡ ወይሠርቅ ፡ በመትሕቱ ፡ ወያነጽሕ ፡ ቤተ ፡ እግዚአብሔር ። 13 ወውእቱ ፡ ይነሥእ ፡ ትርሲቶ ፡ ወይነብር ፡ ዲበ ፡ መንበሩ ፡ ወይኴንን ፡ ወካህን ፡ በየማኑ ፡ ወምክረ ፡ ሰላም ፡ ማእከለ ፡ ክልኤሆሙ ። 14 ወአክሊልሰ ፡ ለእለ ፡ ይትዔገሥዎ ፡ ወለበቍዓኒሃ ፡ ወለእለ ፡ ያአምርዋ ፡ ወለትርሲቶሙ ፡ ለደቂቀ ፡ ሰፎንያስ ፡ ወለመዝሙር ፡ ውስተ ፡ ቤተ ፡ እግዚአብሔር ። 15 ወይመጽኡ ፡ እለሂ ፡ እምርሑቃን ፡ እምኔሆሙ ፡ ወየሐንጹ ፡ ቤተ ፡ እግዚአብሔር ፡ ወታአምሩ ፡ ከመ ፡ ፈነወኒ ፡ ኀቤክሙ ፡ እግዚአብሔር ፡ ዘኵሎ ፡ ይመልክ ፡ ወይከውኑ ፡ እምሰሚዕ ፡ ስምዑ ፡ ቃለ ፡ እግዚአብሔር ፡ አምላክነ ።