ዘዘካርያስ ነቢይ 9

1 ተረፈ ፡ ቃለ ፡ እግዚአብሔር ፡ በምድረ ፡ ሴድራ ፡ ወደማስቆ ፡ መሥዋዕቱ ፡ ለእግዚአብሔር ፡ ወኵሉ ፡ ሕዝበ ፡ እስራኤል ። 2 ወአንትሙሂ ፡ በውስተ ፡ ደወለ ፡ ጢሮስ ፡ ወሲዶና ፡ እስመ ፡ ሐለዩ ፡ ፈድፋደ ። 3 ወሐነጸት ፡ ጢሮስ ፡ አጽዋኒሃ ፡ ወዘገበት ፡ ብሩረ ፡ ከመ ፡ መሬት ፡ ወአስተጋብአት ፡ ወርቀ ፡ ከመ ፡ ጽንጕነ ፡ ፍኖት ። 4 በእንተ ፡ ዝንቱ ፡ እግዚአብሔር ፡ ይወርስ ፡ ወይኤዝዝ ፡ ውስተ ፡ ባሕር ፡ ኀይላ ፡ ወይእቲኒ ፡ በእሳት ፡ ትጠፍእ ። 5 ወትሬኢ ፡ አስቃሎን ፡ ወትፈርህ ፡ ወጋዛሂ ፡ ትደነግፅ ፡ ፈድፋደ ፡ ወአቃሮንሂ ፡ እስመ ፡ ተኀፈረት ፡ በጌጋያ ፡ ወይትሀጐል ፡ ንጉሥ ፡ እምጋዛ ፡ ወአቃሮንሂ ፡ ኢትሄሉ ። 6 ወኢይነብሩ ፡ ካልኣን ፡ አሕዛብ ፡ ውስተ ፡ አዛጦን ፡ ወእስዕር ፡ ጽዕለተ ፡ ኢሎፍሊ ። 7 ወኣአትት ፡ ደሞሙ ፡ እምአፉሆሙ ፡ ወርኵሶሙ ፡ እማእከለ ፡ ስነኒሆሙ ፡ ወይተርፍ ፡ ውእቱ ፡ ለአምላክነ ፡ ወይከውኑ ፡ ከመ ፡ መሳፍንት ፡ ለይሁዳ ፡ ወአቃሮንሂ ፡ ከመ ፡ ኢያቡሴዎን ። 8 ወኣነሥእ ፡ ቤትየ ፡ ወኣቀውም ፡ ከመ ፡ ኢትሖሩ ፡ ወኢትግብኡ ፡ ወኢየኀልፉ ፡ እንከ ፡ ላዕሌሆሙ ፡ ዘይነድኦሙ ፡ እስመ ፡ ይእዜ ፡ ርኢኩ ፡ በአዕይንቲየ ። 9 ተፈሥሒ ፡ ወተሐሠዪ ፡ ፈድፋደ ፡ ወለተ ፡ ጽዮን ፡ ወስብኪ ፡ ወለተ ፡ ኤሩሳሌም ፤ ናሁ ፡ ይመጽእ ፡ ንጉሥኪ ፡ ጻድቅ ፡ ወመድኅን ፡ ወየዋህ ፡ ውእቱ ፡ ወይጼዐን ፡ ዲበ ፡ አድግ ፡ ወዲበ ፡ እጓለ ፡ አድግ ። 10 ወያጠፍእ ፡ ሰረገላ ፡ እምኤፍሬም ፡ ወአፍራሰ ፡ እምኤሩሳሌም ፡ ወየኀልቅ ፡ እንከ ፡ ቀስት ፡ ወቀትል ፡ ወይከውን ፡ ብዙኅ ፡ ሰላም ፡ እምአሕዛብ ፡ ወያወርድ ፡ ማየ ፡ እስከ ፡ ባሕር ፡ ወአፍላገ ፡ ወኄለ ፡ ምድር ። 11 ወእንተ ፡ በደም ፡ ሥርዐተ ፡ ፈነውኩ ፡ ሙቁሓኒኪ ፡ እምዐዘቃት ፡ ዘአልቦ ፡ ማየ ። 12 ወይነብሩ ፡ ውስተ ፡ አጽዋን ፡ ሙቁሓን ፡ ተዓይን ፡ ወህየንተ ፡ አሐቲ ፡ ዕለት ፡ ክዕበተ ፡ እፈድየከ ። 13 እስመ ፡ መሰኩከ ፡ መንገሌየ ፡ ይሁዳ ፡ ወከመ ፡ ቀስት ፡ መላእክዎ ፡ ለኤፍሬም ፡ ወኣነሥኦሙ ፡ ለደቂቅኪ ፡ ጽዮን ፡ ላዕለ ፡ ደቂቀ ፡ አረሚይ ፡ ወእገስሰኪ ፡ ከመ ፡ ኲናተ ፡ መስተቃትል ። 14 ወትወፅእ ፡ ማዕበልት ፡ ከመ ፡ መብረቅ ፤ እግዚአብሔር ፡ ዘኵሎ ፡ ይመልክ ፡ ይነፍኅ ፡ በቀርን ፡ ወየሐውር ፡ መዐቱ ፡ ላዕለ ፡ ሳሎ ። 15 ወእግዚአብሔር ፡ ዘኵሎ ፡ ይመልክ ፡ ይሰውቆሙ ፡ ወያኀልቅዎሙ ፡ ወይደፍንዎሙ ፡ በእብነ ፡ ሞፀፍ ፡ ወይሰትይዎሙ ፡ ከመ ፡ ወይን ፡ ወይመልኡ ፡ ምሥዋዐ ፡ ከመ ፡ ዘይት ። 16 ወያድኅኖሙ ፡ እግዚአብሔር ፡ ይእተ ፡ አሚረ ፡ ከመ ፡ አባግዐ ፡ ሕዝቡ ፡ እስመ ፡ እብን ፡ ቅዱሳት ፡ ያንኰረኵራ ፡ ውስተ ፡ ምድር ። 17 እስመ ፡ ዘሠናይኒ ፡ ሎቱ ፡ ወዘበረከትኒ ፡ ኀቤሁ ፡ እክለ ፡ ወራዙት ፡ ወወይነ ፡ መዐዛ ።