መጽሐፈ ነገሥት ፫ 9

1ወከመዝ ፡ ሰባ
፡ ፈጸመ ፡ ሰሎሞን ፡ ሐኒጸ ፡ ቤተ ፡ እግዚአብሔር
፡ ወቤተ ፡ ርእሱ ፡ እምድኅረ ፡ ፳ዓም ፡ ይእተ ፡ አሚረ ፡ አስተጋብኦሙ ፡
ለኵሎሙ ፡ ሊቃናተ
፡ እስራኤል ፡ በጽዮን ፡ ከመ ፡ ያምጽኣ ፡ ለታቦተ ፡ ሕጉ ፡ ለእግዚአብሔር ፡ እምነ ፡ ህገረ ፡ ዳዊት ፡ ውስተ ፡ ጽዮን ፤

2በወርኀ ፡ አታሚን ፤

3ወጾሩ ፡ ካህናት ፡ ታቦተ ፤

4ወደብተራ ፡
መርጡል ፡ ወኵሎሙ ፡ ንዋየ ፡ ቅድሳት ፡ ዘውስተ ፡ ድብተራ ፡ መርጡል ።

5ወንጉሥኒ ፡ ወኵሉ ፡ እስራኤል ፡ ቅድመ ፡ ታቦት ፡ ይጠብሑ ፡ አባግዐ ፡ ወአልህምተ ፡ ዘአልቦ ፡ ኊልቈ
፡ ።

6ወአብእዋ ፡ ካህናት ፡ ለታቦት ፡ ውስተ ፡ መካና ፡ ውስተ ፡ ዳቤር ፡ ዘውስተ ፡ ቤት ፡ ውስተ ፡ ቅድሳተ ፡ ዘቅዱሳን ፡ መትሕተ ፡ ክነፊሆሙ ፡ ለኪሩብ ።

7እስመ ፡ ኪሩብ
፡ ጸለሉ ፡ ክነፊሆሙ ፡ መልዕልተ ፡ መካና ፡ ለታቦት ፡ ወጸለልዋ ፡ ኪሩብ ፡ ለታቦት ፡ መልዕልተ ፡ ቅድሳቲሃ ፡ ዘእምላዕሉ ።

8ወተኣኀዛ ፡ በቅድሳት ፡ ወይኔጽራ
፡ አርእስተ ፡ ቅዱሳን
፡ እምነ ፡ ቅዱሳን ፡ ላዕለ ፡ ገጸ ፡ ዳቤር ፡ ወበአፍአሰ ፡ ኢያስተርኢ ።

9ወአልቦቱ ፡ ውስተ ፡ ታቦት ፡ ዘእንበለ ፡ ክልኤ ፡ ጽላት ፡ ዘእብን ፡ ጽላት ፡ ዘሕግ ፡ ዘሤመ ፡ ሙሴ ፡ ህየ ፡ በኮሬብ ፡ ዘተካየደ ፡ እግዚአብሔር
፡ ምስለ ፡ ደቂቀ ፡ እስራኤል ፡ አመ ፡ ወፅኡ ፡ እምነ ፡ ምድረ ፡ ግብጽ ።

10ወእምዝ ፡ ሶበ ፡ ወፅኡ ፡ ካህናት ፡ እምነ ፡ ቤተ ፡ መቅደስ ፡ መልአ ፡ ኵሎ ፡ ቤቶ ፡ ደመና ።

11ወስእኑ ፡ ቀዊመ ፡ ካህናት ፡ ወገቢረ ፡ ግብሮሙ ፡ እምቅድመ
፡ ደመና ፡ እስመ ፡ መልአ ፡ ስብሐተ ፡ እግዚአብሔር
፡ ውስተ ፡ ቤቱ ።

12ወሜጠ ፡ ንጉሥ ፡ ገጾ ፡ ወባረኮሙ ፡ ለኵሉ ፡ እስራኤል ፡ ወይቀውሙ ፡ ኵሎ ፡ ማኅበሮሙ ፡ ለእስራኤል ።

13ወይቤ ፡ ይትባረክ
፡ እግዚአብሔር ፡ አምላከ ፡ እስራኤል ፡ ዮም ፡ ዘነበበ ፡ በአፉሁ
፡ በእንተ ፡
ዳዊት ፡ አቡየ
፡ ወፈጸመ ፡
በእደዊሁ ፡ እንዘ ፡ ይብል ፤

14እምአመ ፡ አውፃእክዎሙ ፡ ለሕዝብየ ፡ እስራኤል ፡ እምነ
፡ ግብጽ ፡ ኢኀረይኩ ፡ ዘውስተ ፡ ሀገር
፡ እምነ ፡ አሐቲ ፡ በትረ
፡ እስራኤል ፡ ከመ ፡ ይትሐነጽ
፡ ቤተ ፡ ሊተ ፡ ዘይከውን ፡ ለስምየ ፡ በህየ ፡ ወኀረይኩ ፡ በኢየሩሳሌም ፡ ከመ ፡ ይኩን ፡ ለስምየ ፡ በህየ ፡ ወኀረይክዎ ፡
ለዳዊት ፡ ከመ ፡ ይኩን ፡ መስፍነ ፡ ለሕዝብየ
፡ እስራኤል ።

15ወፈቀደ ፡ ዳዊት
፡ አቡየ ፡ በልቡ ፡ ከመ
፡ ይሕንጽ ፡
ቤተ ፡ ለስመ ፡ እግዚአብሔር
፡ አምላከ ፡ እስራኤል ።

16ወይቤሎ ፡ እግዚአብሔር
፡ ለዳዊት ፡
አቡየ ፡ እስመ ፡ ፈቀድከ
፡ በልብከ ፡ ትሕንጽ ፡
ቤተ ፡ ለስምየ ፡ ሠናየ ፡ ገበርከ ፡ እስመ ፡ ፈቀድከ ፡ በልብከ ።

17ወአኮ ፡ አንተ
፡ ዘተሐንጽ ፡ ቤትየ ፡
አላ ፡ ወልድከ ፡ ዘወፅአ
፡ እምነ ፡ ገበዋቲከ ፡ ውእቱ ፡ የሐንጽ
፡ ቤተ ፡ ለስምየ ።

18ወአቀመ ፡ እግዚአብሔር
፡ ቃሎ ፡ ዘነበበ ፡ ወቆምከ
።

19ህየንተ ፡ ዳዊት
፡ አቡየ ፡ ወነበርኩ
፡ ላዕለ ፡ መንበረ
፡ እስራኤል ፡ በከመ ፡ ይቤ ፡ እግዚአብሔር
፡ ወሐነጽኩ ፡ ቤተ ፡ ለስመ ፡ እግዚአብሔር
፡ አምላከ ፡ እስራኤል ።

20ወገበርኩ ፡ በህየ ፡ መካነ ፡ ለታቦት ፡ እንተ ፡ ውስቴታ
፡ ሕገ ፡ እግዚአብሔር
፡ ዘተካየደ ፡ ምስለ ፡
አበዊነ ፡ አመ ፡ አውፅኦሙ ፡ እምነ ፡ ግብጽ ።

21ወቆመ ፡ ሰሎሞን ፡ ቅድመ ፡ ምሥዋዕ ፡ ዘእግዚአብሔር
፡ በቅድመ ፡
ኵሉ ፡ መኅበሮሙ ፡ ለእስራኤል ፡ ወአልዐለ ፡ እዴሁ
፡ ውስተ ፡ ሰማይ ።

22ወይቤ ፡ እግዚኦ
፡ አምላከ ፡ እስራኤል ፡ አልቦ ፡ ከማከ ፡ አምላክ ፡ በሰማይ
፡ በላዕሉ ፡ ወበምድር
፡ በታሕቱ ፡ ዘተዐቅብ ፡ ኪዳኖ ፡ ወምሕረቶ ፡ ለገብርከ ፡ ዘየሐውር
፡ በኵሉ ፡ ልቡ ፡ ቅድሜከ ።

23ዘዐቀብከ ፡ ለዳዊት ፡ ገብርከ ፡ አቡየ ፡ በከመ ፡ ነበብከ ፡ በአፉከ ፡ ወፈጸምከ ፡ በእደዊከ ፡ ዮም ፡ በዛቲ ፡ ዕለት ።

24ወይእዜኒ ፡ እግዚኦ ፡ አምላከ ፡ እስራኤል ፡ ዕቀብ ፡ ለገብርከ ፡ ዳዊት ፡ አቡየ ፡ ዘትቤሎ ፡ ኢይጠፍእ ፡ ብእሲ
፡ እምኔከ ፡
ዘይነብር ፡
ውስተ ፡ መንበረ ፡ እስራኤል
፡ እምቅድመ ፡ ገጽየ ፡ ወባሕቱ ፡ ለእመ ፡ ዐቀቡ ፡ ደቂቅከ ፡ ፍኖቶሙ ፡ ከመ
፡ ይሖሩ ፡ ቅድሜየ ፡ በከመ
፡ ሖርከ ፡ ቅድሜየ ።

25ወይእዜኒ ፡
እግዚኦ ፡ አምላከ
፡ እስራኤል ፡ እሙነ ፡ ይኩን ፡ ቃልከ ፡ ለዳዊት ፡ አቡየ ፡ ገብርከ ።

26ለእመ ፡ አማንኑ
፡ ይነብር ፡ እግዚአብሔር
፡ ምስለ ፡ እጓለ ፡ እመሕያው
፡ ውስተ ፡ ምድር ፡ ዘሰማይ ፡ ወሰማየ ፡ ሰማያት
፡ ኢየአክሎ ፡ ወባሕቱ ፡ ዝንቱኒ ፡ ቤት ፡
ዘሐነጽኩ ፡ ለስምከ ።

27ወርኢ ፡ ጸሎትየ ፡ እግዚኦ ፡ አምላከ ፡ እስራኤል ፡ ወስማዕ ፡ ጸሎትየ ፡ ለገብርከ ፡ ዘይስእለከ
፡ በቅድሜከ ፡ ዮም ፡ በኀቤከ ፤

28ከመ ፡ ይኩን ፡ ክሡተ ፡ አዕይንቲከ ፡ ውስተ ፡ ዝንቱ ፡ ቤት ፡ መዓልተ ፡ ወሌሊተ
፡ ውስተ ፡ መካን ፡ ዘትቤ ፡ ይሄሉ
፡ ስምየ ፡ ህየ ፡ ከመ ፡ ትስማዕ ፡ ጸሎተ ፡ እንተ ፡ ይጼሊ ፡ ገብርከ ፡ በዝንቱ ፡ መካን
፡ መዓልተ ፡ ወሌሊተ ።

29ወስማዕ ፡ ስአለቶ ፡ ለገብርከ ፡ ዘሕዝብከ ፡ እስራኤል ፡ ዘጸለዩ ፡ በዝንቱ
፡ መካን ፡ ወአንተ ፡ ስማዕ ፡ በውስተ ፡ መካነ
፡ መንበርከ ፡ በሰማይ ፡ ወግበር ፡ ወተሣሀሎሙ ፤

30ለኵሉ ፡ እለ ፡ ይኤብሱ ፡ ላዕለ
፡ ቢጾሙ ፡ ወለእመ ፡ ረገሙ ፡ መርገመ ፡ ወመጽኡ
፡ ወተጋነዩ ፡ በቅድመ ፡ ምሥዋዒከ ፡ በዝንቱ ፡ ቤት ።

31ወስማዕ ፡ አንተ ፡ በሰማይ ፡ ወግበር ፡ ወኰን ፡ ሕዝበከ ፡ እስራኤል ፡ በጌጋዩ ፡ ለጊጉይ ፡ ከመ ፡ ትግባእ ፡ ላዕለ ፡ ርእሱ ፡ ምግባሩ ፡ ወታጽድቆ ፡ ለጻድቅ ፡ ወትፈድዮ
፡ በከመ ፡ ጽድቁ ።

32ወእመኒ ፡ ወድቁ ፡ ሕዝብከ ፡ እስራኤል ፡ ቅድመ ፡ ፀሮሙ ፡ እስመ ፡ ይኤብሱ
።

33ለስምከ ፡ ወእምዝ ፡ ገብኡ ፡ ወተጋነዩ
፡ ለስምከ ፡
ወጸለዩ ፡ ወሰአሉ ፡ በዝንቱ ፡ በውስተ ፡ ዝንቱ ፡ ቤት ፤ ወስማዕ ፡ አንተ ፡ በሰማይ ፡ ወተሣሀል ፡ ኀጣውአ
፡ ሕዝብከ ፡
እስራኤል ፡
ወአግብኦሙ ፡ ውስተ ፡
ምድሮሙ ፡ እንተ ፡ ወሀብከ ፡ ለአበዊሆሙ ።

34ወእመኒ ፡ ተከልአ
፡ ዝናመ ፡ ሰማይ ፡ እስመ ፡ ይኤብሱ ፡ ለከ ፡ ወጸለዩ ፡ ውስተ
፡ ዝንቱ ፡ መካን ፡ ወገነዩ ፡ ለስምከ ፡ ወተመይጡ ፡ እምነ ፡ ኀጣውኢሆሙ ፡ ሶበ ፡ አሕመምኮሙ ፤

35ወስማዕ ፡ እምሰማይ ፡ ወተሣሀል ፡ ኀጣውኢሆሙ ፡ ለሕዝብከ ፡ እስራኤል
፡ እስመ ፡ [ታ]ርእዮሙ
፡ ፍኖተ ፡ ሠናይተ ፡ ከመ
፡ ይሖሩ ፡ ባቲ ፡ ወትሁብ
፡ ዝናመ ፡ ላዕለ ፡ ምድር
፡ እንተ ፡ ወሀብካሆሙ ፡ ለሕዝብከ ፡ ርስቶሙ ።

36ወረኃብኒ ፡
ለእመ ፡ ኮነ ፡ ወብድብድ
፡ ለእመ ፡ ኮነ ፡
እስመ ፡ ይክውን ፡ መንሱት ፡ ወአንበጣኒ ፡
ወአናኵዕኒ ፡ ለእመ ፡ መጽኡ ፡ ወእመኒ
፡ አመንደቦ ፡ ፀሩ ፡ በውስተ
፡ አሐቲ ፡ እምነ ፡ አህጉሪሃ ፡ ኵሎ ፡ መንሱተ ፡ ወኵሎ ፡ ሕማመ ፤

37ወበኵሉ ፡ ምሕልላ ፡ ወበኵሉ ፡ ጸሎት ፡ እመ ፡
ኮነ ፡ ለኵሉ
፡ ሰብእ ፡ ወእመኒ ፡ ዘአርሰሐስሖ ፡ ለለ ፡ ፩በልቡ ፡ ወአልዐለ ፡ እደዊሁ ፡ በውስተ
፡ ዝንቱ ፡ ቤት ፤

38ወስማዕ ፡ አንተ ፡ በሰማይ
፡ እምውስተ ፡ ድልው ፡ ማኅደሪከ ፡ ወተሣሀል
፡ ወግበር ፡ ወሀቦ ፡ ለሰብእ ፡ በከመ
፡ ፍኖቱ ፡ ወበከመ ፡ ታአምር ፡ ልቦ ፡ እስመ ፡ አንተ ፡ ባሕቲትከ ፡ ታአምር ፡ ልበ ፡ ኵሉ ፡ እጓለ ፡ እመሕያው ፤

39ከመ ፡ ይፍርሁ
፡ በኵሉ ፡ መዋዕል ፡ ዘቦቱ ፡ የሐይዉ ፡ እሙንቱ ፡ ላዕለ ፡ ምድር ፡ እንተ ፡ ወሀብከ ፡ ለአበዊነ ።

40ወከማሁ ፡ ለነኪርኒ
፡ ለዘ ፡ ኢኮነ ፡ እምውስተ ፡ ሕዝብከ ፤

41እምከመ ፡ መጽኡ ፡ ወጸለዩ ፡ ውስተ ፡ ዝንቱ ፡ መካን ፤

42ወስማዕ ፡ አንተ ፡ እምሰማይ ፡ እምነ ፡ ድልው ፡ ማኅደርከ
፡ ወግበር ፡
በእንተ ፡ ኵሉ ፡ ዘጸውዐከ
፡ ነኪርኒ ፡ ከመ ፡ ያእምሩ
፡ ኵሉ ፡ አሕዛበ ፡ ምድር ፡ ስመከ ፡ ወይፍርሁከ ፡ በከመ ፡ ሕዝብከ ፡ እስራኤል ፡ ወያእምሩ ፡ ከመ ፡ ተሰምየ ፡ ስምከ
፡ ውስተ ፡ ዝንቱ ፡ ቤት ፡ ዘሐነጽኩ ።

43ወእመሂ ፡ ወፅኡ
፡ ሕዝብከ ፡ ይፅብኡ ፡
ፀሮሙ ፡ በፍኖት ፡ እንተ
፡ ታገብኦሙ ፡ ወጸለዩ
፡ በስመ ፡ እግዚአብሔር
፡ (በ)እንተ ፡ ፍኖተ ፡ ሀገር
፡ እንተ ፡ ኀረይከ ፡ [ወ]እንተ ፡ ቤት ፡ ዘሐነጽኩ ፡ ለስምከ ፤

44ወስማዕ ፡ እምሰማይ
፡ ጸሎቶሙ ፡
ወስእለቶሙ ፡ ወግበር ፡ ሎሙ ፡
በከመ ፡ ጽድቆሙ ።

45እስመ ፡ ይኤብሱ
፡ ለከ ፡ እስመ ፡ አልቦ ፡ ሰብአ ፡ ዘኢይኤብስ ፡ ወታመጽእ ፡ ላዕሌሆሙ ፡ ወታገብኦሙ ፡ ቅድመ ፡ ፀሮሙ
፡ ወይፄውውዎሙ ፡ እለ ፡ ፄወውዎሙ ፡ ውስተ ፡ ምድር ፡ ርሕቅት ፡ ወእመኒ ፡ ውስተ
፡ ቅሩብ ፤

46ወሜጡ ፡ ልቦሙ
፡ በውእቱ ፡ ምድር ፡ ኀበ
፡ ወሰድዎሙ ፡ ህየ ፡ ወገብኡ ፡ ወተጋነዩ ፡ ለከ ፡ በውእቱ ፡ ብሔር ፡ ኀበ ፡ ፈለሱ ፡ ወይቤሉ
፡ አበስነ ፡ ወጌገይነ
፡ ወዐመፅነ ፤

47ወገብኡ ፡ ኀቤከ
፡ በኵሉ ፡ ልቦሙ ፡ ወበኵሉ
፡ ነፍሶሙ ፡ በምድረ ፡
ፀሮሙ ፡ ኀበ ፡ ወሰድኮሙ ፡ ወእመኒ ፡ ጸለዩ
፡ ኀቤከ ፡ [እንተ ፡] ምድሮሙ
፡ እንተ ፡ ወሀብከ ፡ ለአበዊሆሙ
፡ ወሀገር ፡ እንተ ፡ ኀረይከ
፡ ወቤት ፡ ዘሐነጽኩ ፡
ለስምከ ፤

48ወስማዕ ፡ እምነ
፡ ሰማይ ፡ እምድልው ፡ ማኀደርከ ፤

49ወተሣሀል ፡
ኀጢአቶሙ ፡ ዘአበሱ ፡
ለከ ፡ ወኵሎ ፡ ክሕደቶሙ ፡ ለእለ
፡ ክሕዱከ ፡ ወሀቦሙ ፡
ሣህለ ፡ በቅድመ ፡ እለ
፡ ፄወውዎሙ ፡ ወይሣሀልዎሙ ።

50እስመ ፡ ሕዝብከ ፡ ወርስትከ ፡ እሙንቱ ፡ እለ ፡ አውፃእከ ፡ እምነ ፡ ምድረ ፡ ግብጽ ፡ እምነ ፡ መሳብክተ
፡ ኀፂን ።

51ወይኩና ፡ አዕይንቲከ ፡ ወእዘኒከ ፡ ክሡታተ ፡ ለጸሎተ ፡ ገብርከ ፡ ወለጸሎተ ፡ ሕዝብከ ፡ እስራኤል ፡ ከመ ፡ ትስምዖሙ ፡ በኵሉ ፡ ዘጸውዑከ ።

52እስመ ፡ ለሊከ ፡ ፈጠርኮሙ ፡ ለርእስከ ፡ ርስተ
፡ እምነ ፡ ኵሉ ፡ አሕዛበ ፡ ምድር ፡ በከመ ፡
ነበብከ ፡ በእደ ፡ ገብርከ ፡ ሙሴ ፡ አመ ፡ አውፃእኮሙ ፡ ለአበዊነ ፡ እምነ ፡ ምድረ ፡ ግብጽ ፡
እግዚኦ ፡ እግዚኦ ።

53ወይእተ ፡ ጊዜ ፡ ነበበ ፡ ሰሎሞን ፡ በእንተ ፡ ውእቱ ፡ ቤት ፡ ሶበ ፡ ፈጸመ ፡ ሐኒጾቶ ፡ ፀሐየ ፡ አርአየ ፡ እግዚአብሔር
፡ በሰማይ ፡
ወይቤ ፡ ይኅድር
፡ እምአዜብ ፡ ወሐነጸ
፡ ቤትየ ፡ ቤት ፡
ዘድልው ፡ ለከ ፡ ለኀዲር
፡ በ[ሕዳሴ]ሁ ፡ ወአኮኑ
፡ ዛቲ ፡ እንተ
፡ ጽሕፍት ፡ ውስተ ፡ መጽሐፈ
፡ ማሕሌት ።

54ወእምዝ ፡ ሶበ ፡ ፈጸመ ፡ ሰሎሞን ፡ ጸልዮ
፡ ኀበ ፡ እግዚአብሔር
፡ ኵሎ ፡ ዛተ ፡
ጸሎተ ፡ ወዛተ ፡ ስእለተ
፡ ወተንሥአ ፡ እምቅድመ
፡ ምሥዋዑ ፡ ለእግዚአብሔር
፡ እምኀበ ፡
ሰገደ ፡ አስተብሪኮ ፡ በብረኪሁ ፡ ወእደዊሁሰ ፡ ያሌዕል ፡ ውስተ ፡ ሰማይ ።

55ወቆመ ፡ ወባረኮሙ ፡ ለኵሉ ፡ ማኅበረ ፡ እስራኤል ፡ በዐቢይ ፡ ቃል ፡ እንዘ ፡ ይብል ፤

56ይትባረከ ፡
እግዚአብሔር ፡ ዮም ፡
ዘወሀቦሙ ፡ ዕረፍተ ፡ ለሕዝቡ ፡ እስራኤል ፡ በከመ ፡ ኵሉ ፡ ዘነበበ ፡
ወአልቦ ፡ ዘአሕጸጸ ፡ ወኢአሐተኒ ፡
እምነ ፡ ኵሉ ፡ ቃሉ ፡ ሠናይ ፡ ዘነበበ ፡ በእደ
፡ ሙሴ ፡ ገብሩ ።

57ወይሄሉ ፡ እግዚአብሔር
፡ አምላክነ ፡ ምስሌነ
፡ በከመ ፡ ሀሎ ፡
ምስለ ፡ አበዊነ ፡ ወኢየኀድገነ ፡ ወኢይገድፈነ ፤

58ከመ ፡ ይሚጥ
፡ ልበነ ፡ ኀቤሁ ፡ ወንሖር
፡ በኵሉ ፡ ፍናዊሁ ፡ ወንዕቀብ
፡ ኵሎ ፡ ትእዛዞ
፡ ወሥርዐቶ ፡ ዘአዘዞሙ ፡ ለአበዊነ ።

59ወይኩን ፡ ዝንቱ
፡ ነገር ፡ ዘሰአልኩ
፡ ቅድመ ፡ እግዚአብሔር
፡ አምላክነ ፡ ዮም ፡ ከመ ፡ ይቅረብ ፡ ኀበ ፡ እግዚአብሔር
፡ አምላክነ ፡ መዓልተ ፡ ወሌሊተ ፡ ወትግበር ፡ ጽድቆ ፡ ለገብርከ ፡ ወጽድቆሙ ፡ ለሕዝብከ ፡ እስራኤል ፡ ለለ ፡ ቃሉ ፡ ወነገሩ ፡ ወበበ ፡ ዕለቱ ፤

60ከመ ፡ ያእምሩ
፡ ኵሎሙ ፡ አሕዛበ ፡ ምድር ፡ ከመ ፡ አንተ ፡ እግዚአብሔር ፡
አምላክነ ፡
ወአልቦ ፡ ባዕደ ፡ አምላከ ፡ ዘእንበቤከ ።

61ወይኩን ፡ ልብነ
፡ ፍጹመ ፡ ኀበ ፡ እግዚአብሔር ፡ አምላክነ ፡ ወበጽድቅ ፡ ከመ ፡ ንሖር ፡ በሥርዐቱ ፡ ወንግበር ፡ ትእዛዞ ፡ በከመ ፡ ዮም ።

62ወጠብሐ ፡ መሥዋዕተ ፡ ቅድመ ፡ እግዚአብሔር ፡
ንጉሥኒ ፡ ወኵሉ ፡ ደቂቀ ፡ እስራኤል
።

63ወጠብሐ ፡ ሰሎሞን
፡ ንጉሥ ፡ መሥዋዕተ ፡ ሰላም ፡ ወጠብሐ ፡ ለእግዚአብሔር
፡ አልህምተ ፡ ፪፼ወ፳፻ወአባግዐ ፡ [፲ወ፪፼] ወገብረ ፡ ንጉሥ ፡ መድቅሐ ፡ ለቤተ ፡ እግዚአብሔር ፡
ወኵሎሙ ፡ ደቂቀ
፡ እስራኤል ፡ ይእተ ፡ አሚረ ።

64ወቀደሰ ፡ ንጉሥ ፡ ማእከለ ፡ ዐጸድ
፡ ዘቅድመ ፡
ቤተ ፡ እግዚአብሔር ፡
እስመ ፡ ገብረ ፡ በህየ ፡ መሥዋዕተ ፡ ወቍርባነ
፡ ወሥብሐ ፡ መሥዋዕተ
፡ ሰላምኒ ፡ እስመ ፡ ምሥዋዕ ፡ ዘብርት ፡ ዘቅድመ ፡ እግዚአብሔር
፡ ንኡስ ፡ ውእቱ ፡ ወኢያገምር ፡
ቍርባነኒ ፡
ወመሥዋዕተ ፡ ሰላምኒ ።

65ወገብረ ፡ ሰሎሞን ፡ በዓለ ፡ ይእተ ፡ አሚረ ፡
ወኵሉ ፡ እስራኤል ፡ ምስሌሁ ፡ በዐቢይ ፡ ማኅበር ፡ ወለእለኒ ፡ እምፍኖተ ፡ ኤማት ፡ እስከ
፡ እለ ፡ ውስተ ፡ ፈለገ ፡ ግብጽ ፡ ቅድመ ፡ እግዚአብሔር
፡ አምላክነ ፡ በውስተ ፡ ቤት ፡ ዘሐነጸ ፡ ይበልዑ ፡ ወይሰትዩ ፡ (በውስተ ፡ ቤት ፡ ዘሐነጸ ፡) ቅድመ ፡ እግዚአብሔር ፡ አምላክነ ፡ ሰቡዐ ፡ መዋዕለ ፡ ወይትፌሥሑ ።

66ወበሳምንት ፡ ዕለት ፡ ፈነዎሙ ፡ ለሕዝብ ፡ ወባረኮሙ ፡ ወአተዉ ፡ ኵሎሙ ፡ ውስተ ፡ አብያቲሆሙ ፡ እንዘ ፡ ይትፌሥሑ ፡ በሠናይ
፡ ልብ ፡ በእንተ ፡ ሠናይት ፡ ዘገብረ ፡ እግዚአብሔር
፡ ላዕለ ፡ ዳዊት ፡ ገብሩ ፡ ወላዕለ ፡ እስራኤል
፡ ሕዝቡ ።