ጥበበ ሲራክ 18

1ዘሕያው ፡ ለዓለም ፡ ፈጠረ ፡ ኵሎ ፡ ኅቡረ ፤

2እግዚአብሔር ፡ ባሕቲቱ ፡ ጻድቅ ።

4ወኢያብሐ ፡ መኑሂ ፡ የአምር ፡ ግብሮ ፤ ወመኑ ፡ ያአምር ፡ አሠረ ፡ ዕበዩ ።

5ወመኑ ፡ ኈለቈ ፡ ጽንዐ ፡ ኀይሉ ፤ ወመኑ ፤ ይክል ፡ ነጊረ ፡ ምሕረቱ ፡ ጥንቁቀ ።

6አልቦ ፡ ከመ ፡ ይወስኩ ፡ ወአልቦ ፡ ከመ ፡ ያንትጉ ፤ ወአልቦ ፡ ዘይረክብ ፡ አሠረ ፡ ስብሐቲሁ ፡ ለእግዚአብሔር ።

7አመ ፡ ይፈጥሮ ፡ ለእጓለ ፡ እመሕያው ፤ ይእተ ፡ አሚረ ፡ ይኤዝዞ ፤ ወአመ ፡ ያሰልጦ ፡ ይእተ ፡ አሚረ ፡ ያዐርፎ ።

8ምንት ፡ ውእቱ ፡ እጓለ ፡ እመሕያው ፡ ወምንት ፡ በቍዑ ፤ ምንትኑ ፡ ሠናይቱ ፡ ወምንትኑ ፡ እኪቱ ።

9ኈልቈ ፡ መዋዕሊሁ ፡ ምእት ፡ ክረምቱ ፤

10ከመ ፡ አሐቲ ፡ ነጠብጣበ ፡ ማይ ፡ ውስተ ፡ ኵሉ ፡ ማየ ፡ባሕር ፤ ወከመ ፡ አሐቲ ፡ ኅጠተ ፡ ኆጻ ፡ እምውስተ ፡ ኵሉ ፡ ኆጻ ፤ ከማሁ ፡ ኅዳጥ ፡ ዓመቲሁ ፡ እምውስተ ፡ ኵሉ ፡ መዋዕለ ፡ ዓለም ።

11እንበይነዝ ፡ ይትዔገሦሙ ፡ እግዚአብሔር ፤ ወሶጠ ፡ ምሕረቶ ፡ ላዕሌሆሙ ።

12ርእዮሙ ፡ ወአእመሮሙ ፡ ከመ ፡ እኪት ፡ ደኃሪቶሙ ፤ እስመ ፡ ከማሁ ፡ አብዝኀ ፡ ምሕረቶ ።

13ሰብእሰ ፡ ይምሕር ፡ ቢጾ ፤ ወእግዚአብሔር ፡ ባሕ(ቲ)ቱ ፡ ይሣሀል ፡ ለኵሉ ፡ ዘነፍስ ፤ ወይጌሥጽሂ ፡ ወይሜህርሂ ፤ ወይመይጥ ፡ ከመ ፡ ኖላዊ ፡ መርዔቶ ።

14ወይሣሀሎሙ ፡ ለእለ ፡ ይትዔገሡ ፡ በተግሣጹ ፤ ወለእለ ፡ ይተልዉ ፡ ሕጎ ።

15ወልድየ ፡ ውስተ ፡ ትፍሥሕት ፡ ኢታምጽእ ፡ ሐዘነ ፤ ወበኵሉ ፡ ዘትሁብ ፡ ኢታሕሥም ፡ ቃለ ።

16አኮኑ ፡ ዝናም ፡ ያቈርሮ ፡ ለመርቄ ፤ ከማሁ ፡ ቃል ፡ ሠናይ ፡ ይኄይስ ፡ እምውሂብ ።

17ናሁኬ ፡ እንከ ፡ ይትበደር ፡ ቃል ፡ ሠናይ ፡ እምውሂብ ፤ ወክልኤሆሙ ፡ በኀበ ፡ ብእሲ ፡ ጻድቅ ፡ ይትረከቡ ። 18 (ወ)ይሁብ ፡ ደንጻዊ ፡ እንዘ ፡ ኢይሔውዞ ፡ ለልብ ፤ ወአብድኒ ፡ ይዘረኪ ፡ ወኢያአኵት ።

19እንበለ ፡ ትንብብ ፡ ጠይቅ ፤ ወእንበለ ፡ ትሕምም ፡ ተፈወስ ።

20ወእንበለ ፡ ትትኰነን ፡ ተሐተት ፤ ወትረክብ ፡ ሣህለ ፡ ለጊዜ ፡ ምንዳቤከ ።

21ዘእንበለ ፡ ትድክም ፡ አትሕት ፡ ርእሰከ ፤ ወተጋነይ ፡ ሶበ ፡ ትኤብስ ።

22ወኢትጐንዲ ፡ ውሂበ ፡ ብፅዓቲከ ፤ ወግበራ ፡ ለጽድቅ ፤ እንበለ ፡ ትሙት ።

23ወእንበለ ፡ ትብፃዕ ፡ አስተዳሉ ፡ ብፅዓቲከ ፤ ወኢትኩን ፡ ከመ ፡ ዘያሜክሮ ፡ ለእግዚአብሔር ።

24ሶበ ፡ ትትመዓዕ ፡ ተዘከር ፡ ዕለተ ፡ ሞት ፤ ወተዘከር ፡ ዕለተ ፡ ፍዳከ ፡ ወነስሕ ፡ ወተጋነይ ።

25ወተዘከር ፡ መዋዕለ ፡ ረኃብ ፡ አመ ፡ መዋዕለ ፡ ጽጋብ ፤ ወተዘከር ፡ መዋዕለ ፡ ተጽናስ ፡ አመ ፡ መዋዕለ ፡ ትዴሎ ።

26እስመ ፡ እምነግህ ፡ እስከ ፡ ሰርክ ፡ ትትዐለው ፡ መንበርት ፤ ወኵሉ ፡ ፍጡን ፡ በኀበ ፡ እግዚአብሔር ፡ (ለእንተ ፡ ምዕር) ።

27ወብእሲሰ ፡ ጠቢብ ፡ ይፈርህ ፡ በኵሉ ፡ ወይትዐቀብ ፤ ወበመዋዕለ ፡ ትኤብስ ፡ ተነሳሕ ።

28ወኵሉ ፡ ለባዊ ፡ ይረክባ ፡ ለጥበብ ፡ ወለዘ ፡ ረከባሂ ፡ ታአምኖ ፡ ወታፈርሆ ።

29ማእምራነ ፡ ቃል ፡ ይጠብቡ ፡ ለሊሆሙ ፡ በልቦሙ ፤ ወይነግሩ ፡ አምሳለ ፡ ጥንቁቀ ።

30ኢትሖር ፡ ወኢትትሉ ፡ ፈቃዳ ፡ ለኀጢአት ፤ ወተዐገሥ ፡ እምፍትወተ ፡ እኩይ ።

31ወእመሰ ፡ ወሀብካሃ ፡ ዘትፈቱ ፡ ለነፍስከ ፤ ትሬስየከ ፡ ጥቡዐ ፡ ለጸላኢክ ። 32 . . . . . ፤ ኢትስአል ፡ ከመ ፡ ትትፈጋዕ ፡ ምስሌሃ ።

33ኢትትለቃሕ ፡ እንዘ ፡ ነዳይ ፡ አንተ ፡ ከመ ፡ ኢትሠገር ፤ እንዘ ፡ አልብከ ፡ ወኢምንተኒ ፡ ውስተ ፡ ቍናማቲከ ።