ጥበበ ሲራክ 19

1ሠያጢ ፡ ወሰካሪ ፡ ኢይብዕል ፤ ዘያሰትት ፡ ኅዳጠ ፡ ብዙኀ ፡ የሀጕል ።2ስታይ ፡ ወአንስት ፡ ያስሕቶ ፡ ለጠቢብ ፤ ወዘይተልዋ ፡ ለዘማ ፡ ጊጉይ ፡ ውእቱ ፤3ወለዝ ፡ ደኃሪቱ ፡ ዕፄ ፡ ወሙስና ፤ ነፍስ ፡ ዝልፍት ፡ ኢትዜውር ።4ዘፍጡነ ፡ የአምን ፡ ቀሊል ፡ ልቡ ፤ ወዘይገብር ፡ ኀጢአተ ፡ ላዕለ ፡ ነፍሱ ፡ ይኤብስ ።5ዘያስተፌግዕ ፡ ልቦ ፡ ይትነከር ፤ ወዘይጸልእ ፡ ብዙኀ ፡ ነቢበ ፡ ያሐጽጻ ፡ ለኀጢአቱ ።7ኢታውጽእ ፡ ቃለ ፡ ዘሰማዕከ ፡ ወኢትድግም ፤ ወለዝላፉ ፡ ኢይብእሰከ ።8በኀበ ፡ ዐርክ ፡ ወጸላኢ ፡ አልቦ ፡ ዘትትናገር ፤ ወኢታይድዕ ፡ አበሳከ ፡ ዘሰማዕከ ።9እስመ ፡ ለእመ ፡ ከመ ፡ ሰምዐ ፡ ኢየኀብእ ፡ ለከ ፡ ወያጸንሐከ ።10እስከ ፡ አመ ፡ ትመውት ፡ ኢታውጽእ ፡ ነገረ ፡ ዘሰማዕከ ፤ ወተአመን ፡ እንከ ፡ ከመ ፡ ሕሡም ፡ አልቦ ፡ ዘይረክበከ ።11የዐነብዝ ፡ አብድ ፡ እስከ ፡ ይነግር ፡ ቃለ ፡ ዘሰምዐ ፤ ወይትዌፃኅ ፡ ከመ ፡ ማሕምም ፡ እንተ ፡ ትወልድ ፡ ሕፃነ ።12ወከመ ፡ ይጔጕእ ፡ ዘተነድፈ ፡ ይምላኅ ፡ ሐጸ ፡ እምላዕሌሁ ፤ ከማሁ ፡ ይጔጕእ ፡ አብድ ፡ ያውጽእ ፡ ቃለ ፡ ዘሰምዐ ።13ገሥጾ ፡ ለዐርክከ ፡ ዮጊ ፡ ኢገብረ ፤ ወእመኒ ፡ ገብረ ፡ ከመ ፡ ኢይድግም ።14ገሥጾ ፡ ለዐርክከ ፡ ዮጊ ፡ ኢነበበ ፤ ወእመኒ ፡ ነበበ ፡ ከመ ፡ ኢይድግም ።15ገሥጾ ፡ ለዐርክከ ፡ ዮጊ ፡ በጽልእ ፡ አስተዋደይዎ ፤ ወኢትትአመን ፡ ኵሎ ፡ ቃለ ፡ ዘነገሩከ ።16እስመቦ ፡ ዘይስሕት ፡ እንዘ ፡ ኢይፈቅድ ፡ እምልቡ ፤ ወመኑ ፡ ውእቱ ፡ ዘኢይስሕት ፡ በአፉሁ ።17ገሥጾ ፡ ለዐርክከ ፡ እንበለ ፡ ይትነዋኅ ፡ መዐት ፤ አኅልፋ ፡ ለመዐት ፡ እኪት ፡ እንበይነ ፡ ሕገ ፡ እግዚአብሔር ።20እስመ ፡ ኵሉ ፡ ጥበብ ፡ ፈሪሀ ፡ እግዚአብሔር ፡ ይእቲ ፤ እስመ ፡ ኵሉ ፡ ጥበብ ፡ ትገብሮ ፡ ለሕጉ ።22ወአልቦ ፡ ጥበብ ፡ ዘእኩየ ፡ ይሜህር ፤ ወአልቦ ፡ ጥበብ ፡ ምክረ ፡ (ረሲዓን ፡ ወ)ኃጥኣን ።23ቦ ፡ እከይ ፡ እንተ ፡ እምኵሉ ፡ ትረኵስ ፤ ወሀለወ ፡ አብድ ፡ ሕጹጸ ፡ ልብ ።24ወይኄይስ ፡ ባሕቱ ፡ አብድ ፡ እንዘ ፡ ይፈርሆ ፡ ለእግዚአብሔር ፤ እምትጥበብ ፡ ወትክሐድ ፡ ሕጎ ፡ ለእግዚአብሔር ።25ሀለወ ፡ ዘይጠበብ ፡ ወይጠናቀቅ ፡ እንዘ ፡ ይዔምፅ ፤ ወሀለወ ፡ ዘይመይጣ ፡ ለምክር ፤ ወያስተርኢ ፡ ከመ ፡ ያድሉ ፡ ለቢጹ ፡ ወከመ ፡ ያስተራትዕ ፡ ፍትሐ ፡ ለማኅፈሩ ።26ወቦ ፡ ዘያደሉ ፡ ለእኩይ ፡ እንዘ ፡ ኢይንእድ ፤ ወልቡሰ ፡ ምሉእ ፡ ጕሕሉት ።27ወቦ ፡ ዘያደሉ ፡ ለገጽ ፡ እንዘ ፡ ካልእ ፡ ውስተ ፡ ልቡ ፤ ወእንተ ፡ ኀበ ፡ ኢሐዘብከ ፡ ይመጽአከ ።28ወእመኒ ፡ ደክመ ፡ ኀይሉ ፡ ወስእነ ፡ አሕሥሞ ፡ ላዕሌከ ፤ እንተ ፡ አመሰ ፡ ያስሕተከ ፡ ግብር ፡ ያሐምመከ ።29እስመ ፡ እምራእአዩ ፡ ይትዐወቅ ፡ ሰብእ ፤ ወእምገጹ ፡ ይትዐወቅ ፡ ጠቢብ ።30ወእምልብሰቱ ፡ ለሰብእ ፤ ወእምሑረቱ ፡ ወእምሠሐቁ ፡ ይትዐወቅ ፡ ግዕዙ ።