ጥበበ ሲራክ 25

1በእላ ፡ ሠለስቱ ፡ ሠነይኩ ፡ ወቆምኩ ፡ ሠናየ ፡ ቅድመ ፡ እግዚአብሔር ፡ ወቅድመ ፡ እጓለ ፡ እመሕያው ፤ አኀው ፡ እለ ፡ የኀብሩ ፡ ልበ ፤ ወታእኃሆሙ ፡ ለአዕርክት ፤ ወብእሲ ፡ ምስለ ፡ ብእሲቱ ፡ እለ ፡ የኀብሩ ፡ ግዕዘ ።

2ወሠለስቲሆሙ ፡ ከንቶ ፡ መነነት ፡ ነፍስየ ፡ ወጸልአቶሙ ፤ ወፈዴፋደ ፡ አስተቈጥዐኒ ፡ ሕይወቶሙ ፡ ነዳየ ፡ ዕቡየ ፡ ወባዕለ ፡ ደንጻዌ ፡ ወአረጋዌ ፡ ዘማዌ ፡ ዘአልቦ ፡ ልበ ።

3ዘእምንእስከ ፡ ኢተገሠጽከ ፤ እፎ ፡ ትጠብብ ፡ በርሥኣኒከ ።

4ይደልዎን ፡ ኰንኖ ፡ ለሢበት ፤ ወይደልዎሙ ፡ ምክር ፡ ለሊቃውንት ፤

5ወይደልዎሙ ፡ ጥበብ ፡ ለአእሩግ ፤ ወትደልዎሙ ፡ ትምህርተ ፡ ጥበብ ፡ ለዐበይት ።

6አክሊሎሙ ፡ ለአእሩግ ፡ ብዝኀ ፡ ትምህርት ፤ ወምክሖሙ ፡ ፈሪሀ ፡ እግዚአብሔር ።

7ተስዐቱ ፡ እሙንቱ ፡ እለ ፡ አስተብፃእክዎሙ ፡ በልብየ ፤ ወዓሥሮሙሰ ፡ እነግር ፡ በቃልየ ፤ ብእሲ ፡ ዘይትፌሣሕ ፡ በውሉዱ ፤ ወእንዘ ፡ ሕያው ፡ ውእቱ ፡ ይሬኢ ፡ ድቀተ ፡ ጸላኢሁ ።

8ብፁዕ ፡ ዘአውሰበ ፡ ብእሲተ ፡ ጠባበ ፤ ወብፁዕ ፡ ዘኢስሕተ ፡ በቃሉ ፤ ወዘኢገብአ ፡ ታሕተ ፡ ዘየአክዮ ።

9ብፁዕ ፡ ዘረከባ ፡ ለጥበብ ፤ ወዘረከበ ፡ ዘይትኤዘዝ ፡ ሎቱ ።

10ዐቢይ ፡ ውእቱ ፡ ዘረከባ ፡ ለጥበብ ፤ ወየዐብዮ ፡ ፈራሄ ፡ እግዚአብሔር ።

11ፈሪሀ ፡ እግዚአብሔር ፡ እምኵሉ ፡ ትኄይስ ፤ ወዘኪያሃ ፡ ዐቀበ ፡ አልቦ ፡ ዘይመስሎ ።

13እምኵሉ ፡ ቍስል ፡ የአኪ ፡ ቍስለ ፡ ልብ ፤ ወእምኵሉ ፡ አኪት ፡ ተአኪ ፡ እኪት ፤ ብእሲት ።

14ወለእመ ፡ በኵሉ ፡ ወደቀ ፡ ኢትደቅ ፡ ውስተ ፡ እደ ፡ ጸላኢክ ፤ ወለእመ ፤ ኵሉ ፡ ተበቀለከ ፡ ጸላኢከ ፡ ኢይትበቀልከ ።

15አልቦ ፡ ርእስ ፡ ዘየአኪ ፡ እምርእሰ ፡ አርዌ ፡ ምድር ፤ ወአልቦ ፡ ቂም ፡ ዘየአኪ ፡ እምቂመ ፡ ጸላኢ ።

16ይኄይስ ፡ ትንበር ፡ ምስለ ፡ ዐናብስት ፡ ወምስለ ፡ አራዊተ ፡ ምድር ፤ እምትንበር ፡ ምስለ ፡ እኪት ፡ ብእሲት ።

17እከይሃ ፡ ያዐልዎ ፡ ለራእያ ፤ ወያጸልሞ ፡ ከመ ፡ ርእየተ ፡ ድብ ፡ ለገጻ ።

18ወበማእከለ ፡ ቢጹ ፡ ይትሀበብዎ ፡ ለምታ ፤ ወመሪረ ፡ ሐዘነ ፡ ያቴክዝዎ ፡ ወያመነዝዝዎ ።

19ኵሉ ፡ እኪት ፡ ትንእስ ፡ እምእኪት ፡ ብእሲት ፤ ውስተ ፡ መክፈልተ ፡ ኀጢአት ፡ ታበጽሕ ፡ ይእቲ ።

20ከመ ፡ ያደክሞሙ ፡ ዐቀበ ፡ ኆጻ ፡ እገሪሆሙ ፡ ለአእሩግ ፤ ከማሁ ፡ ታደክሞ ፡ ብእሲት ፡ ነባቢት ፡ ለብእሲ ፡ የዋህ ።

21ኢያስሕትከ ፡ ላሕያ ፡ ለብእሲት ፡ > ወኢያፍቱከ ፡ ላሕያ ፡ ለብእሲት ፤ < 22 እስመ ፡ (መቅሠፍት ፡ ወ)መንሱት ፡ ወዐቢይ ፡ ኀሳር ፡ ይእቲ ፤ ወኀፍረትሂ ፡ ለእመ ፡ ሴሰየቶ ፡ ለምታ ፡ ብእሲት ።

23ቍስል ፡ (ይእቲ ፡) ለልብ ፡ ወጽልመት ፡ (ይእቲ ፡) ለገጽ ፤ ወሐዘን ፡ (ይእቲ ፡) ለነፍስ ፡ ብእሲት ፡ እኪት ። ከመ ፡ እድ ፡ ፅቡስ ፡ ወከመ ፡ እግር ፡ ፅዉስ ፤ ከማሁ ፡ ብእሲት ፡ እንተ ፡ ኢታአኵቶ ፡ ለምታ ።

24ቀዳሚሁኒ ፡ እምላዕለ ፡ ብእሲት ፡ ወጽአት ፡ ኀጢአት ፤ ወበእንቲአሃ ፡ ኵልነ ፡ ንመውት ።

25ኢትግበር ፡ ሎቱ ፡ ሙሐዘ ፡ ለማይ ፤ ወኢታርእያ ፡ ዘውስተ ፡ ልብከ ፡ ለብእሲት ።

26ለእመ ፡ ኢኮነት ፡ ከመ ፡ ግዕዝከ ፤ ምትራ ፡ እምኔከ ፡ ወአውፅኣ ፡ እምሥጋከ ።