ጥበበ ሲራክ 26

1ለብእሲት ፡ ኄርት ፡ ያበጽዕ ፡ ምታ ፤ ወይትመክዐብ ፡ መዋዕለ ፡ ሕይወቱ ።2ብእሲት ፡ ዕብራዊት ፡ ታስተፌሥሖ ፡ ለምታ ፤ ወይፌጽም ፡ መዋዕሊሁ ፡ በሰላም ።3ብእሲት ፡ ኄርት ፡ ሠናይ ፡ መክፈል[ት] ፤ ወ[ት]በጽሖ ፡ ለፈራሄ ፡ እግዚአብሔር ፡ ውስተ ፡ መክፈልቱ ።4ለባዕልኒ ፡ ወለነዳይኒ ፡ ልቡ ፡ ይሠኒ ፤ ወለዝሉፉ ፡ ብሩሀ ፡ ይኩን ፡ ገጽከ ።5እምእሉ ፡ ሠለስቱ ፡ ደንገጸኒ ፡ ልብየ ፤ ወራብዕሰ ፡ አፍርሀኒ ፡ ገጽየ ፤ ማዕሌተ ፡ ሀገር ፤ ወእንግልጋ ፡ አሕዛብ ፤ ወስምዐ ፡ ሐሰት ፡ ላዕለ ፡ ነፍስ ፡ ዘያበጽሕ ፡ ለሞት ።6ቍስል ፡ ይእቲ ፡ ለልብ ፡ ወላሕ ፡ ይእቲ ፡ ለነፍስ ፡ ብእሲት ፡ እንተ ፡ ታስተቃንእ ፤ ከመ ፡ መቅሠፍተ ፡ ልሳን ፡ ትዔሪ ፡ በኵሉ ፡ እኩይ ።7ከመ ፡ አርዑተ ፡ ብዕራ ፡ ዝያንቀለቅል ፡ ከማሁ ፡ ብእሲት ፡ እኪት ፤ ወዘይነብር ፡ ምስሌሃ ፡ ከመ ፡ ዘይፀብጥ ፡ ዐቅረበ ።8ዐቢይ ፡ መንሱት ፡ ይእቲ ፡ ብእሲት ፡ ሰካሪት ፤ እንተ ፡ ኢትክል ፡ ኀፍረታ ፡ ከዲነ ።9ዝሙታ ፡ ለብእሲት ፡ ይትዐወቅ ፡ እምአዕይንቲሃ ፤ ወይትአመር ፡ በቀራንብቲሃ ።10ወለወለትከኒ ፡ አጽንዓ ፡ ዐቂቦታ ፤ ለእመ ፡ ሥኅተት ፡ ከመ ፡ ኢታማስን ፡ ርእሳ ።11ወተዐቀብ ፡ እምነ ፡ ዐይነ ፡ [መ]ታሂ ፤ ከመ ፡ ኢትግባእ ፡ ትነስሕ ፡ ለእመቦ ፡ ዘብእሰከ ።12ከመ ፡ ይልሕስ ፤ ጽሙእ ፡ ወይሰቲ ፡ እምኵሉ ፡ ማይ ፡ ዘቀርበ ፤ ወያጸልል ፡ ታሕተ ፡ ኵሉ ፡ ዕፀው ፤ ወከመ ፡ ዘያወጽእ ፡ አሕጻሁ ፡ እምጕንጳሁ ።13ሞገሳ ፡ ለብእሲት ፡ ያስተፌሥሖ ፡ ለዎታ ፤ ወጥበቢሃ ፡ ያጠልሎ ፡ ለአዕፅምቲጊሁ ።14ፍቱ ፡ ለእግዚአብሔር ፡ ብእሲት ፡ የዋህ ፤ ወአልባቲ ፡ መድሎተ ፡ ነፍስ ፡ ጠባብ ።15ሠናይት ፡ በዲበ ፡ በረከት ፡ ብእሲት ፡ ኀፋሪት ፤ ወአልባቲ ፡ ተውላጠ ፡ ነፍስ ፡ መስተዓግሥት ።16ከመ ፡ ፀሓይ ፡ በውስተ ፡ ሰማዩ ፡ ለእግዚአብሔር ፤ ከማሁ ፡ ላሕየ ፡ ሥና ፡ ለብእሲት ፡ ኄርት ፡ በውስተ ፡ ትርሲተ ፡ ቤታ ።17ከመ ፡ ማኅቶተ ፡ ቅድሳት ፡ እንተ ፡ ታበርሀ ፡ በዲበ ፡ ተቅዋማ ፤ ከማሁ ፡ ላሕየ ፡ ገጹ ፡ ለጠቢብ ፡ በሥነ ፡ ግዕዙ ።18ከመ ፡ አዕማደ ፡ ወርቅ ፡ እለ ፡ ይቅውሙ ፡ ዲበ ፡ ምክያደ ፡ ብሩር ፤ ከማሁ ፡ በአተ ፡ እገሪሁ ፡ ለኄር ፡ ዘይቀውም ፡ በሠናይ ።28በእሉ ፡ ሠለስቱ ፡ ተከዘኒ ፡ ልብየ ፤ ወራብዖሙሰ ፡ መዐተ ፡ አምጽአ ፡ ላዕሴየ ፤ ብእሲ ፡ መስተቃትል ፡ (ወተባዕ ፡) ሶበ ፡ የኀጥእ ፡ ወይጼነስ ፤ ዕደው ፡ ጠቢባን ፡ ለእመ ፡ ስሕቱ ፤ ወዘየኀድጋ ፡ ለጽድቅ ፡ ወይገብእ ፡ ውስተ ፡ ኀጢአት ፤ እግዚአብሔር ፡ ያወድቆ ፡ በኲናት ።29እምዕጹብ ፡ ይድኅን ፡ ሠያጢ ፤ እምኀጢአት ፤ ወኢይጸድቅ ፡ መያሲ ፡ እምዐምፆት ።