ጥበበ ሲራክ 32

1ዘየዐቅብ ፡ ሕጎ ፡ ያበውእ ፡ መባአ ፤

2ወዘያፀምእ ፡ ትእዛዞ ፡ ይሠውዕ ፡ ለመድኀኒቱ ።

3ዕሴቶ ፡ ያገብእ ፡ ዘያበውእ ፡ ስንዳሌ ፤

4ወዘገብረ ፡ ምጽዋተ ፡ ሦዐ ፡ መሥዋዕተ ፡ ስብሐት ።

5ፈቃዱ ፡ ለእግዚአብሔር ፡ ከመ ፡ ኢትግበር ፡ እኩየ ፤ ወሥምረቱ ፡ ከመ ፡ ትትገሐሥ ፡ እምዐመፃ ።

6ኢትባእ ፡ ቅድመ ፡ እግዚአብሔር ፡ ዕራቅከ ፤

7ወግበር ፡ ዘኵሎ ፡ በእንተ ፡ ትእዛዙ ።

8መሥዋዕቱ ፡ ለጻድቅ ፡ ያጠልሎ ፡ ለምሥዋዕ ፤ ወመዐዛሁ ፡ ይበጽሕ ፡ ቅድመ ፡ ልዑል ።

9ወመሥዋዕቱ ፡ ለብእሲ ፡ ጻድቅ ፡ ቅዱስ ፡ ውእቱ ፤ ወኢይትረሳዕ ፡ ዝክሩ ፡ ሎቱ ።

10በፍኡሕ ፡ ዐይን ፡ አእኵቶ ፡ ለእግዚአብሔር ፤ ወኢትኅድግ ፡ አብኦ ፡ እምውስተ ፡ ቀዳሚ ፡ ተግባርከ ።

11እንዘ ፡ ፍሡሕ ፡ ገጽከ ፡ መጥዎ ፡ ለኵሉ ፡ ዘጸገውከ ፤ ወእንዘ ፡ ትትሐሠይ ፡ አብእ ፡ ዓሥራቲሁ ፡ ለተግባርከ ።

12ወአብእ ፡ ለእግዚአብሔር ፡ በከመ ፡ አኰቴቱ ፤ ወእምዘ ፡ ረከብከ ፡ ውስተ ፡ እዴከ ፡ አብእ ፡ ሎቱ ፡ በሠናይ ፡ ዐይን ።

13እስመ ፡ እግዚአብሔር ፡ ያገብእ ፡ ዕስየተ ፡ ወየዐስየከ ፡ ምስብዒተ ።

14ኢታብእ ፡ ሎቱ ፡ ሕልያነ ፡ እስመ ፡ ኢይትወከፍ ፡ ለከ ፤

15ወኢይምሰልከ ፡ ዘይሰጠወከ ፡ በአብኦ ፡ ዐመፃ ፤ እስመ ፡ እግዚአብሔር ፡ መኰንነ ፡ ጽድቅ ፡ ውእቱ ፤ ወኢያደሉ ፡ ለገጽ ።

16ወኢይሠዚ ፡ እንበይነ ፡ ነዳይ ፤ ወይሰምዖ ፡ ዐውያቶ ፡ ለግፉዕ ።

17ወኢይጸመም ፡ ጸሎቶ ፡ ለእጓለ ፡ ማውታ ፤ ወእቤረ ፡ ብእሲተኒ ፡ ለእመቦ ፡ ዘአግዐራ ።

18ወአውረደት ፡ አንብዐ ፡ ዲበ ፡ መላትሒሃ ፡

19ከማሁ ፡ ያወርድ ፡ ዐውያተ ፡ ዲበ ፡ ዘአግዐራ ።

20ለዘይፀመዶ ፡ በጽድቅ ፡ ይትወከፎ ፡ ሎቱ ፤ ወተዐርግ ፡ እስከ ፡ ደመና ፡ ጸሎቱ ።

21ወጸሎተ ፡ ነዳይሰ ፡ ትትዐዶ ፡ እምደመና ፤ ወኢትትመየጥ ፡ እስከ ፡ ትበጽሕ ፡ ኀቤሁ ፤ ወኢትገብእ ፡ እስከ ፡ ይሬእያ ፡ እግዚአብሔር ።

22ወይፈትሕ ፡ ሎሙ ፡ ለጻድቃን ፡ ወይትቤቀል ፡ ሎሙ ፤ ወኢይጐነዲ ፡ እግዚአብሔር ፡ ላዕሌሆሙ ፤ ወኢይትዔገሥ ፡ በእንቲአሆሙ ፤ እስከ ፡ ይቀጠቅጦሙ ፡ ሐቌሆሙ ።

23ወይትቤቀሎሙ ፡ ለአሕዛብ ፤ ወይሤርዎሙ ፡ ለኵሎሙ ፡ ዐማፅያን ፤ ወይሰብራ ፡ ለበትረ ፡ ኃጥኣን ።

24ለኵሉ ፤ ሰብእ ፡ ይፈድዮ ፡ በከመ ፡ ምግባሩ ፤ ወለኵሉ ፡ እጓለ ፡ እመሕያው ፡ በበ ፡ ምግባሮሙ ፡ ወበበ ፡ ፍኖቶሙ ፤

25እስከ ፡ ይትቤቀል ፡ በቀለ ፡ ሕዝቡ ፤ ወያስተፌሥሖሙ ፡ በምሕረቱ ።

26ብፁዕ ፡ ዘይረክብ ፡ ሣህለ ፡ በመዋዕለ ፡ ሕማሙ ፤ ከመ ፡ ደመና ፡ ዝናም ፡ ውስተ ፡ ብሔረ ፡ መርቄ ።