ጥበበ ሲራክ 33

1ተሣሀለነ ፡ እግዚኦ ፡ አምላከ ፡ ኵሉ ፡ ኀይል ፡ ወተመየጠነ ፤

2ፈኑ ፡ ፍርሀተከ ፡ ላዕለ ፡ ኵሉ ፡ አሕዛብ ።

3ወአንሥእ ፡ እዴከ ፡ ላዕለ ፡ ሕዝብ ፡ ነኪር ፡ ወይርአዩ ፡ ኀይለከ ።

4በከመ ፡ እንዘ ፡ ይሬእዩ ፡ እሙንቱ ፡ ተቀደስከ ፡ በኀቤነ ፤ ከማሁ ፡ እንዘ ፡ ንሕነሂ ፡ ንሬኢ ፡ ተሰባሕ ፡ በኀቤሆሙ ።

5ወያእምሩከ ፡ እሙንቱኒ ፡ በከመ ፡ አእመርናከ ፡ ንሕነ ፤ እስመ ፡ አልቦ ፡ አምላክ ፡ ዘእንበሌከ ፡ እግዚኦ ።

6አርኢ ፡ ተኣምሪከ ፡ ወክሥት ፡ ስብሐቲከ ።

7በኀይለ ፡ እዴከ ፡ ወበክብረ ፡ የማንከ ፡

8አምጽእ ፡ መንሱተ ፡ ወፈኑ ፡ መቅሠፍተ ፤

9ወሠርዎ ፡ ለዐማፂ ፡ ወቀጥቅጦ ፡ ለፀራዊ ።

10ተዘከር ፡ መሐላሆሙ ፡ ወአፍጥና ፡ ለዕለቶሙ ፤ . . . . ።

11ወቅሥፎሙ ፡ በመዐት ፡ ወበእሳት ፡ ወአጥፍኦሙ ፡ ለእለ ፡ አምሠጡ ፡ እምውስቴቶሙ ፤ ወእለ ፡ አሕሠሙ ፡ ላዕለ ፡ ሕዝብከ ፡ ይርከቦሙ ፡ ሞቶሙ ።

12ወስብሮሙ ፡ አርእስቲሆሙ ፡ ለመላእክተ ፡ ፀር ፤ እለ ፡ ይብሉ ፡ አልቦ ፡ ባዕደ ፡ ዘእንበሌነ ።

13ወአስተጋብኦሙ ፡ ለኵሎሙ ፡ ዘርአ ፡ ያዕቆብ ።