ጥበበ ሲራክ 34

1ለሠናይ ፡ ልብ ፡ ወለጥዑም ፡ እክል ፡ ኢይሜንንዎ ። ትጋሁ ፡ ለብዕል ፡ ያቌቍዕ ፡ አዕፅምተ ፡ ወነፍስተ ፤ ወኀልዮ ፡ ንዋይ ፡ ያሰርር ፡ ንዋመ ።2ወኀልዎ ፡ ዘይትሐዘብ ፡ ያኀልቅ ፡ ንዋመ ፡ በድቃስ ፤ ክቡድ ፡ ሕማም ፡ ያተግህ ፡ ወአልቦ ፡ ንዋም ።3የዐውድ ፡ ባዕል ፡ ከመ ፡ ይዝግብ ፡ ንዋየ ፤ ወእንተ ፡ ጊዜ ፡ ያዐርፍኒ ፡ ይፈግዕ ፡ በጽጋብ ።4ይሰርሕ ፡ ነዳይ ፡ በኀጢአ ፡ ንዋይ ፤ ወሶበ ፡ እምአዕረፈኒ ፡ ይገብእ ፡ ውስተ ፡ [ስኢ]ል ።5ኢይጸድቅ ፡ ዘያፈቅር ፡ ንዋየ ፤ ወዘያፈቅራ ፡ ለኀጠ.አት ፡ ይተልዋ ።6ብዙኃን ፡ እለ ፡ ወድቁ ፡ እንበይነ ፡ ንዋይ ፤ ወርእይዎ ፡ ለሞቶሙ ፡ ቅድመ ፡ ገጾሙ ።7ዕፀ ፡ ዕቅፍት ፡ ይእቲ ፡ ለኵሎሙ ፡ እለ ፡ የኀሥሥዋ ፤ ወኵሉ ፡ አብድ ፡ ይትዐቀፍ ፡ ቦቱ ።8ብፁዕ ፡ ባዕል ፡ ዘንጹሕ ፡ እምኀጢአት ፤ ወዘኢያትለወ ፡ ልቦ ፡ ድኅረ ፡ ንዋይ ።9መኑ ፡ እንጋ ፡ ውእቱ ፡ ወናስተበፅዖ ፤ ዘገብረ ፡ ሠናየ ፡ ላዕለ ፡ ሕዝቡ ።10መኑ ፡ እንጋ ፡ ዘተመከረ ፡ ቦቱ ፡ ወኢስሕተ ፤ ወውእቱ ፡ ኮኖ ፡ ምክሐ ፤ መኑ ፡ እንጋ ፡ እንዘ ፡ ይክል ፡ አሕሥሞ ፡ ዘኢያሐሥም ፤ ወመኑ ፡ እንዘ ፡ ይክል ፡ ገቢረ ፡ ኀጢአት ፡ ወኢይገብር ።11ለትጽናዕ ፡ በረከቱ ፡ ወይሰማዕ ፡ ምጽዋቲሁ ፡ በውስተ ፡ ሕዝብ ።12ወእምከመ ፡ ነበርከ ፡ ውስተ ፡ ማእድ ፡ ዐቢይ ፤ ኢታርኁ ፡ ጕርዔከ ፡ ላዕሌሁ ፡ ወኢትበል ፡ ብዙኀ ፡ ሠርዑ ፡ ውስቴቱ ።13ተዘከር ፡ ከመ ፡ እኩይ ፡ ዐይነ ፡ ሰብእ ፤ ምንት ፡ የአኪ ፡ እምነ ፡ ዐይነ ፡ እጓለ ፡ እመሕያው ፤ ወእንበይነዝ ፡ ታነብዕ ፡ ዐይን ።14ኢትሠሥዕ ፡ ውስተ ፡ ኵሉ ፡ ዘርኢከ ፡ ወኢትጥማዕ ፡ እዴከ ፤ ወኢትኅሥሥ ፡ አጽሕልተ ፡ ወኢትልሐስ ፡ መጻብኅተ ።15አእምር ፡ ዘአምስሐከ ፡ ቢጽከ ፤ ወጠይቅ ፡ ኵሎ ፡ ዘአቅረበ ፡ ለከ ።16ወብላዕ ፡ ከመ ፡ ብእሲ ፡ ጠቢብ ፡ ዘሠርዑ ፡ ለከ ፤ ወኢትልሳሕ ፡ እንዘ ፡ ትመጽር ፡ ከመ ፡ ኢታጽልኦ ፡ ለቢጽክ ።17ቅድም ፡ እምኵሉ ፡ ኀዲገ ፡ ከመ ፡ ጠቢብ ፤ ወኢተሐሲ ፡ ወኢትኩን ፡ ከመ ፡ ዘኢይጸግብ ።18እመኒ ፡ ማእከለ ፡ ብዙኃን ፡ ነበርከ ፤ ኢትቅድም ፡ አውርዶ ፡ እዴከ ።19በዐቅሙ ፡ ብላዕ ፡ ከመ ፡ ብእሲ ፡ > ጠቢብ ፡ < ዘኅዳጥ ፡ የአክሎ ፤ ወኢይክበድከ ፡ ነፍስትክ ፡ በውስተ ፡ ምስካብከ ።20ጥዑይ ፡ ንዋሙ ፡ ለዘይዔቅማ ፡ ለነፍሱ ፤ ሶበኒ ፡ ይነቅህ ፡ በጽባሕ ፡ ኢይደበድብ ፡ ነፍስቱ ፤ ለብእሲሰ ፡ ሥሡዕ ፡ ዘኢይጸግብ ፡ ደዌሁ ፡ ቅንጣዌ ፡ ወገብጥ ፡ ወጥዋይ ።21እመኒ ፡ አገበሩከ ፡ ትብላዕ ፡ ብድሮሙ ፡ ተንሥእ ፡ ወአዕርፍ ።22አፅምአኒ ፡ ወልድየ ፡ ወኢታስትት ፡ ተግሣጽየ ፤ ወድኅረ ፡ ትረክቦ ፡ ለነገርየ ። ኢትኩን ፡ ፅቡሰ ፡ በኵሉ ፡ ዘገበርከ ፤ ከመ ፡ ኢትኅጣእ ፡ ወኢምንተኒ ።23ለጸጋዊሰ ፡ ይድኅርዎ ፡ በሥነ ፡ ምግባሩ ፤ . . . . ።24ወለደንጻዊ ፡ ይረግምዎ ፡ በእከየ ፡ ግዕዙ ፤ . . . . ።25እምከመ ፡ ሰተይከ ፡ ኢትዘኀር ፤ እስመ ፡ ለብዙኃን ፡ አስሐቶሙ ፡ ስታይ ።26በምንሃብ ፡ ያሜክርዎ ፡ ለኀጺን ፡ ጽኑዕ ፤ ከማሁ ፡ ወይንሂ ፡ በውስተ ፡ ልቦሙ ፡ ለዕቡያን ።27ሕይወቱ ፡ ለሰብእ ፡ ሰትየ ፡ ወይን ፤ ወትፍሥሕት ፡ ውእቱ ፡ ለዘይሰትዮ ፡ በዐቅሙ ፤ ምንትኑ ፡ ሕይወቱ ፡ ለዘኢይሰቲ ፡ ወይነ ፤ እስመ ፡ ውእቱ ፡ ለትፍሥሕተ ፡ እጓለ ፡ እመሕያው ፡ ተፈጥረ ።28ትፍሥሕትኒ ፡ ውእቱ ፡ ለልብ ፡ ወሐሤት ፡ ውእቱ ፡ ለነፍስ ፤ ሠናይ ፡ ሰትየ ፡ ወይን ፡ በዐቅሙ ፡ ወበጊዜሁ ።29ሐዘና ፡ ለልብ ፡ ያረስዕ ፡ ወይን ፤ ለዘይላሑ ፡ ወለዘይቴክዝ ፡ አስትዮ ፡ ወይነ ።30ወአብድሰ ፡ እምከመ ፡ ሰትየ ፡ ያበዝኅ ፡ ላኳ ፡ ወይስሕት ፡ ወይጌጊ ፤ ብዙኀ ፡ ሰትይ ፡ ኢያረክብ ፡ ኀይለ ፡ ወኢያኅጥእ ፡ ቍስለ ።31ወኢትገሥጽ ፡ ቢጸከ ፡ እንዘ ፡ ስቱይ ፡ ወይነ ፤ ወኢታተክዞ ፡ እንዘ ፡ ፍሡሕ ፡ ውእቱ ፡ ልቡ ፤ ወኢትንግሮ ፡ ዘተሐይሶ ፡ ወኢታጽሕቦ ፤ ወኢትስአሎ ፡ ትካዘከ ፡ እንዘ ፡ ስኩር ፡ ውእቱ ።