ጥበበ ሲራክ 5

1ወኢትክዐው ፡ ንዋየከ ፡ በከንቱ ፤ ወኢትበል ፡ ኮንየ ፡ የአክ[ለ]ኒ ።

2ወኢትትሉ ፡ ግዕዘ ፡ ኀይለ ፡ ነፍስከ ፡

3ወኢትበል ፡ መኑ ፡ ይክለኒ ፤ እስመ ፡ እግዚአብሔር ፡ በቀለ ፡ ይትቤቀል ።

4ወኢትበል ፡ አበስኩሂ ፡ ወአልቦ ፡ ዘተፈደይኩ ፤ እስመ ፡ እግዚአብሔር ፡ ለጕንዱይ ፡ ይትዔገሥ ።

5ወኢትፍራህ ፡ ተጋንዮ ፡ በእንተ ፡ ኀጢአትከ ፤ ወኢትወስክ ፤ ኀጢአተ ፡ በዲበ ፡ ኀጢአትከ ፡

6እንዘ ፡ ትብል ፡ ብዙኅ ፡ ምሕረቱ ፤ ለእግዚአብሔር ። ምሕረትኒ ፡ ወመቅሠፍትሂ ፡ እምኀቤሁ ፤ ላዕለ ፡ ኃጥእ ፡ ይወርድ ፡ መቅሠፍቱ ።

7ኢታጐንዲ ፡ ተጋንዮ ፡ ለእግዚአብሔር ፤ ወኢታስተኃልፍ ፡ ዕለተ ፡ እምዕለት ፤ እስመ ፡ ግብተ ፡ ትመጽእ ፡ መንሱት ፤ ወትትመነደብ ፡ አመ ፡ ትመጽአከ ፡ ፍዳከ ፡ ወመቅሠፍትከ ።

8ኢትሰቄቍ ፡ ለንዋየ ፡ ዐመፃ ፤ እስመ ፡ ኢይክል ፡ አድኅኖተከ ፡ አመ ፡ ምንዳቤከ ።

9ወኢታብቁ ፡ ለኵሉ ፡ ነ[ፋስ] ፤ ወኢትትሉ ፡ ውስተ ፡ ኵሉ ፡ ዘፈተውከ ፤ ወኢትኩን ፡ ከመ ፡ ኃጥእ ፡ ዘ፪ልሳኑ ።

10አስምክ ፡ ላዕለ ፡ ጥበብከ ፤ ወአሐደ ፡ ይኩን ፡ ቃልከ ።

11ወኩን ፡ ፍጡነ ፡ ለሰሚዕ ፤ ወመስተዐግሠ ፡ ለአውሥኦ ፡ ቃልከ ።

12እመ ፡ ብከ ፡ ዘታየድዖ ፡ ንግሮ ፡ ለቢጽከ ፤ ወእመ ፡ አኮሰ ፡ ደይ ፡ እዴከ ፡ ላዕለ ፡ አፉከ ። <13 ኀሳርከኒ ፡ ወክብርከኒ ፡ እምቃልከ ፤ ወእምልሳኑ ፡ ለሰብእ ፡ ድቀቱ ።

14ኢትኩን ፡ ሐማዬ ፤ ወኢዝሉፈ ፡ በልሳንከ ።> እስመ ፡ ኀፍረት ፡ ለሰራቂ ፡ <ወእኪት ፡ ኀሳሩ ፡ ለዘክልኤቱ ፡ ቃሉ ።

15በኀበ ፡ ዐቢይኒ ፡ ወበኀበ ፡ ንኡስኒ ፡ አስተርኢ ።