ጥበበ ሲራክ 43

1ላዕለ ፡ ጽንዓ ፡ ለሰማይ ፡ በንጽሕ ፤ ወርእየተ ፡ ሰማይኒ ፡ በስብሐቲሁ ።

2ወያሠርቅ ፡ ፀሓየ ፡ ከመ ፡ ያርኢ ፡ ብርሃኖ ፤ ወነኪር ፡ ሥርዐቱ ፡ ለግብረ ፡ ሰማይ ።

3ወበቀትሩሂ ፡ ያየብስ ፡ ብሔረ ፤ ወመኑ ፡ ይትቃወማ ፡ ለላህቡ ።

4ከመ ፡ እቶን ፡ ዘይነድድ ፡ ይሬሲ ፡ ላሀ[ቦ] ፤ ወመሥልስ[ተ] ፡ ፀሓይ ፡ ያውዕዮሙ ፡ ለአድባር ፤ ወላህበ ፡ እሳት ፡ ይነፍኅ ፡ እምኔሁ ፤ ወነጽሮ ፡ ብርሃኑ ፡ ያከፍእ ፡ ዐይነ ።

5ዐቢይ ፡ ውእቱ ፡ እግዚአብሔር ፡ ዘገብሮ ፤ ወበቃሉ ፡ ይፈጥን ፡ ሑረቱ ።

6ወወርኅኒ ፡ ዕድሜሁ ፡ ውእቱ ፡ ለኵሉ ፤ ወትእምርት ፡ ለብሔር ፡ ወባቲ ፡ ይትፈለጥ ፡ መዋዕል ፡

7እምነ ፡ ወርኅ ፡ ይትዐወቅ ፡ ትእምርተ ፡ በዓላት ፤ ብርሃን ፡ ዘየኀልቅ ፡ እንዘ ፡ የሐጽጽ ።

8ወወርኅሰ ፡ በከመ ፡ ስማ ፡ ይእቲ ፤ ወነኪር ፡ ከመ ፡ ተዐቢ ፡ ወዕጹብ ፡ ከመ ፡ ታስተባሪ ፤ በውስተ ፡ ሥርዐተ ፡ ትዕይንተ ፡ ሰማይ ፤ ወያበርህ ፡ በውስተ ፡ ኀይለ ፡ ሰማይ ።

9ስርጋዌሃ ፡ ለሰማይ ፡ ክብሮሙ ፡ ለከዋክብት ፤ ወያበርሁ ፡ ለብሔር ፡ በውስተ ፡ ሰማዩ ፡ ለአእግዚአብሔር ።

10ወበቃለ ፡ ቅድሳቲሁ ፡ የሐውሩ ፡ በበሥርዐቶሙ ፤ ወኢይስሕቱ ፡ ወኢይፈልሱ ፡ እምነ ፡ ዐቅሞሙ ።

11ወርኢ ፡ ቀስቶሂ ፡ ወባርኮ ፡ ለፈጣሪሁ ፤ እስመ ፡ ፈድፋደ ፡ ሠናይ ፡ ዋካሁ ።

12ወይቀምር ፡ ውስተ ፡ ሰማይ ፡ ወያዐውዶ ፡ ስከብሐቲሁ ፤ እደዊሁ ፡ ለልዑል ፡ ይቀምሮ ።

13በትእዛዘ ፡ ዚአሁ ፡ ይዘንም ፡ በረድ ፤ ወይፈጥን ፡ መብረቅ ፡ በፈቃዱ ።

14ወእንበይነ ፡ ዝንቱ ፡ ይከሥት ፡ መዛግብቲሁ ፤ ወይሰርራ ፡ ደመናት ፡ ከመ ፡ አዕዋፍ ።

15ወበዕበይሁ ፡ ያጸንዖሙ ፡ ለደመናት ፤ ወይትፈተት ፡ እብነ ፡ በረድ ።

16ወበሐውጾቱ ፡ ያድለቀልቁ ፡ አድባር ፤ ወበፈቃዱ ፡ ይነፍኅ ፡ ነፋስ ፡ ጽባሓዊ ።

17ወቃለ ፡ ፀዓዑ ፡ ያፈርሃ ፡ ለምድር ፤ ወዐውሎሁ ፡ ለነፋስ ፡ ዐረባዊ ፡ ያጠውያ ፡ ለመንፈስ ፤ ወከመ ፡ አዕዋፍ ፡ ዘይሰርር ፡ ይዘርዎ ፡ ለበረድ ፤ ወከመ ፡ ርደተ ፡ አንበጣ ፡ ርደቱ ።

18ወዕጹብ ፡ ለዐይን ፡ ሥነ ፡ ጽዕዱቱ ፤ ወነኪር ፡ ለልብ ፡ ዝናሙ ።

19እስመ ፡ ይሰውጣ ፡ ለበረዱ ፡ ከመ ፡ ጼው ፡ ውስተ ፡ ምድር ፡ ለጊሜሁ ፤ ወእምከመ ፡ ረግዐ ፡ አስሐትያ ፡ ይትፈለጽ ፡ ከመ ፡ ስባራተ ፡ ማህው ፡ በላኅት ።

20ቈሪረ ፡ ነፋስ ፡ ይነፍኅ ፡ ነፋስ ፡ ጽባሓዊ ፤ ወአስሐትያሂ ፡ ይረግዕ ፡ ዲበ ፡ ማይ ፤ ወይነብር ፡ ላዕለ ፡ ኵሉ ፡ ምቅዋመ ፡ ማይ ፤ ወከመ ፡ ልብሰ ፡ ኀጺን ፡ የኀድር ፡ ዲበ ፡ ማይ ፡ ወይገለብባ ።

21ወይበልዕ ፡ አድባረ ፡ ወያውዒ ፡ ገዳመ ፤ ወያሐርርሮ ፡ ለሣዕር ፡ ከመ ፡ እሳት ።

22ወፈወሰ ፡ ኵሎ ፡ ፍጡነ ፡ ጊሜ ፤ ዝናምኒ ፡ እምከመ ፡ ወረደ ፡ ውስተ ፡ [መርቄ ፡] ያስተፌሥሕ ።

23ወበምክረ ፡ ዚአሁ ፡ ይየብስ ፡ ቀላይ ፤ ወእምዝ ፡ ተከ[ላ] ፡ ዮሴዕ ።

24ወእለኒ ፡ ይነግድዋ ፡ ለባሕር ፡ ይነግሩ ፡ ሕማማ ፤ ወንሕነሰ ፡ ሰሚዐነ ፡ ናነክር ።

25ወህየ ፡ ዕጹብ ፡ ግብሩ ፡ ወነኪር ፤ ወአጥርዮ ፡ እንስሳሂ ፡ በበዘመዱ ።

26ወእምውስቴቱ ፡ ይትገበር ፡ ሎቱ ፡ ለሠናይ ፡ መዐዛ ፤ ወበቃሉ ፡ ይከውን ፡ ኵሉ ።

27ወብዙኀ ፡ ንነግር ፡ ወኢንክል ፡ ፈጽሞቶ ፤ ወማኅለቅቱ ፡ ለኵሉ ፡ ነገር ፤ ውእቱ ፡ ዳእሙ ፡ ባሕቲቱ ።

28ሚመጠነ ፡ ንክል ፡ አእኵቶቶ ፤ እስመ ፡ ውእቱ ፡ የዐቢ ፡ እምነ ፡ ኵሉ ፡ ግብሩ ።

29ወግሩም ፡ ውእቱ ፡ እግዚአብሑር ፡ ወፈድፋደ ፡ ዕበዩ ፤ ወዕጹብ ፡ ኀይሉ ።

30አእኵትዎ ፡ ለእግዚአብሔር ፡ ወአዕብይዎ ፡ በአምጣነ ፡ ትክሉ ፤ እስመ ፡ ኢታጠነቅቁ ፡ ፈጽሞ ፤ ዓዲ ፡ የዐቢ ፡ እምኵሉ ፡ ዝንቱ ፤ ወበኵሉ ፡ ኀይልክሙ ፡ አዕብይዎ ፤ ወኢትትሀከዩ ፡ እስመ ፡ ኢትበጽሕዎ ።

31መኑ ፡ ዘርእዮ ፡ ወይነግረነ ፤ ወመኑ ፡ ያዐብዮ ፡ በአምጣነ ፡ ዕበዩ ።

32ወብዙኅ ፡ ዘኢያስተርኢ ፡ የዐቢ ፡ እምነ ፡ ዝንቱ ፤ ውኁድ ፡ ዳእሙ ፡ ዝርኢነ ፡ ግብሩ ።

33እስመ ፡ ኵሎ ፡ እግዚአብሔር ፡ ገባሪ ፤ ወወሀቦሙ ፡ ጥበበ ፡ ለጻድቃን ።