ጥበበ ሲራክ 44

1ንወድሶሙ ፡ ለዕደው ፡ ክቡራን ፤ ለአበዊነ ፡ በመዋዕሊሆሙ ።

2እስመ ፡ ብዙኀ ፡ ክብረ ፡ ወሀቦሙ ፡ እግዚአብሔር ፤ ወዕበዩኒ ፡ እምፍጥረተ ፡ ዓለም ።

3ወኰነኑ ፡ በመንግሥቶሙ ፤ ዕደው ፡ እለ ፡ አስመዩ ፡ በኀይሎሙ ፤ ወመካርያን ፡ በጥበቢሆሙ ፤ ወይነግሩ ፡ በትንቢቶሙ ፤

4ነገሥተ ፡ አሕዛብሂኒ ፡ በአጽባኢሆሙ ፤ ወጸሐፍቶሙኒ ፡ ለሕዝብ ፡ በጥበቦሙ ፤ በጥበበ ፡ ቃሎሙ ፡ ዘውስተ ፡ ልቦሙ ፤

5ወእለሰ ፡ የኀሥሡ ፡ ሐውዘ ፡ መሰንቆ ፡ ወማሕሌት ፤ ወየሐልዩ ፡ ከመ ፡ ዘበመጽሐፍ ፤

6ወዕደውኒ ፡ ብዑላን ፡ እለ ፡ የአክሎሙ ፡ ኀይሎሙ ፤ እለ ፡ ዳኅነ ፡ ይነብሩ ፡ ውስተ ፡ አብያቲሆሙ ።

7ወእሉ ፡ ኵሎሙ ፡ እለ ፡ ከብሩ ፡ በመዋዕሊሆሙ ፤ ወተደለዉ ፡ በሕይወቶሙ ።

8ወቦ ፡ እምውስቴቶሙ ፡ እለ ፡ ኀደጉ ፡ ስመ ፤ ክብረ ፡ ዘይትናገሩ ፡ ቦቱ ።

9ወቦ ፡ እለ ፡ አልቦ ፡ ዘይዜከሮሙ ፤ ወእለኒ ፡ ጠፍኡ ፡ ወኮኑ ፡ ከመ ፡ ዘኢተፈጥሩ ፤ ወገብኡ ፡ ከመ ፡ ዘኢተወልዱ ፤ ወውሉዶሙሂ ፡ ከማሁ ፡ ምስሌሆሙ ።

10ወእሉሰ ፡ ዕደው ፡ ሥሁላን ፤ እለ ፡ ኢተረስዐት ፡ ሎሙ ፡ ጽድቆሙ ።

11ወትቀውም ፡ ምስለ ፡ ውሉዶሙ ፡ ለዝሉፉ ፤ ሠናይ ፡ ርስቶሙ ፡ በላዕለ ፡ ውሉይሙ ፤

12ወበሥርዐቶሙ ፡ ይነብሩ ፡ ውሉዶሙ ፤ . . . . ፤ 13 . . . . ፤ ወኢየኀልቅ ፡ ክብሮሙ ፤

14ወተቀብረ ፡ በሰላም ፡ ሥጋሆሙ ፤ ወለዓለም ፡ ትቀውም ፡ ስሞሙ ።

15ወይትናገሩ ፡ አሕዛብ ፡ በጥበቢሆሙ ፤ ወበማኅበረ ፡ አሕዛብ ፡ ይዌድስዎሙ ።

16ወሄኖክሰ ፡ አሥመሮ ፡ ለእግዚአብሔር ፡ ወኀብኦ ፤ ወኮነ ፡ አርአያ ፡ ለዓለም ፡ ከመ ፡ ይነስሑ ።

17ወኖኅኒ ፡ ተረክበ ፡ ፍጹመ ፡ ጻድቅ ፤ ወአመ ፡ መዋዕለ ፡ መንሱት ፡ ኮነ ፡ ውእቱ ፡ ሣህለ ፡ ለዓለም ፤ ወውእቱ ፡ ተረፈ ፡ ለብሔር ፡ አመ ፡ ኮነ ፡ ማየ ፡ አይኅ ።

18ተካየደ ፡ ምስሌሁ ፡ ለዓለም ፤ ከመ ፡ ኢያጥፍ[ኦ] ፡ ማየ ፡ አይኅ ፡ ለኵሉ ፡ [ዘ]ነፍስ ።

19አብርሃም ፡ ዐቢይ ፡ ውእቱ ፡ አቡሆሙ ፡ ለአሕዛብ ፡ ኵሎሙ ፤ ወኢተረክበ ፡ ከማሁ ፡ ክቡር ፤

20ዘዐቀበ ፡ ሕጎ ፡ ለልዑል ፤ ወተካየደ ፡ ምስሌሁ ፡ > በሥጋሁ ፡ < ግብረ ፡ ሕጉ ፤ ወአመኒ ፡ አመከሮ ፡ ተረክበ ፡ ምእመነ ።

21ወእንበይነ ፡ ዝንቱ ፡ በመሐላ ፡ አቀመ ፡ ሎቱ ፡ ኪዳነ ፤ ከመ ፡ ይትባረኩ ፡ አሕዛብ ፡ በዘርኡ ፤ ወከመ ፡ ያብዝኆ ፡ ከመ ፡ ኆጻ ፡ ምድር ፤ ወከመ ፡ ኮከብ ፡ ይትባዝኁ ፡ ዘርኡ ፤ ወከመ ፡ ያውርሶሙ ፡ እምባሕር ፡ እስከ ፡ ባሕር ፤ ወእምነ ፡ አፍላግ ፡ እስከ ፡ አጽናፈ ፡ ምድር ።

22ወለይስሐቅኒ ፡ ከማሁ ፡ አቀመ ፡ ሎቱ ፡ እንበይነ ፡ አብርሃም ፡ አቡሁ ፤ በረከተኒ ፡ ለኵሉ ፡ እጓለ ፡ እመሕያው ፡ ወሥርዐጉት ።

23ወአዕረፈት ፡ ላዕለ ፡ ያዕቆብ ፡ ዲበ ፡ ርእሱ ፤ ወአስተርአየት ፡ ሎቱ ፡ በበረከቱ ፤ ወወሀቦ ፡ ርስቶ ፡ ኪያሃ ፤ ወፈለጠ ፡ ሎሙ ፡ ርስቶሙ ፡ ዘዘዚአሆሙ ፤ ወከፈሎሙ ፡ ለዐሠርቱ ፡ ወክልኤቱ ፡ አሕዛብ ፤

24ወአውፅአ ፡ እምኔሆሙ ፡ ዕደወ ፡ ጻድቃነ ፡ እለ ፡ ከብሩ ፤ ወረከቡ ፡ ሞገሰ ፡ በኀበ ፡ ኵሉ ፡ እጓለ ፡ እመሕያው ፤ ወተፈቅሩ ፡ በኀበ ፡ እግዚአብሔር ፡ ወበኀበ ሰብእ ።