ጥበበ ሲራክ 6

1ኩን
፡ ዐርከ ፡ እምትኩን ፡ ጻላኤ ፤ እስመ ፡ ደኃሪቱ ፡ ለስም ፡ እኩይ ፡ ኀሳር ፡ ወጽዕለት ፤ ወከማሁ ፡ ኃጥእኒ ፡ ዘክልኤ ፡ ልሳኑ ።

2ወኢታዕቢ ፡ ርእሰከ ፡ በምክረ ፡ ነፍስክ ፡ ከመ ፡ ኢይምሥጡካሃ ፡ ከመ ፡ ላሀም ፡ ለነፍስከ ።

3ወቈጽለከኒ ፡ ይበልዐከ ፡ ወተሀጕል ፡ ፍሬከ ፤ ወከመ ፡ ዕፅ ፡ ይቡስ ፡ የኀድገከ ።

4ነፍስ ፡ ፀዋግ ፡ ታሀጕሎ ፡ ለዘአጥረያ ፤ ወትሬስዮ ፡ ጥቡዐ ፡ ለጸላኢሁ ።

5ልሳን ፡ ጥዑም ፡ ያበዝኅ ፡ ታእኃሁ ፤ ወአፍ ፡ ጥዑም ፡ ያበዝኅ ፡ ማእምረ ።

6ብዙኃን ፡ ይ[ኩ]ኑከ ፡ አዕርክተ ፤ ወአሐዱ ፡ እምእልፍ ፡ መማክርቲከ ።

7ወእመ ፡ ትትዓረክ ፡ ዐርከ ፡ በመዋዕለ ፡ ተጽናስከ ፡ ተዓረክ ፤ ወኢትትአመኖ ፡ ብዙኀ ።

8እስመ ፡ ዐርክ ፡ ኀላፊ ፡ ወለኅዳጥ ፡ መዋዕል ፡ ውእቱ ፤ ወኢይትዔገሥ ፡ ምስሌከ ፡ በዕለተ ፡ ምንዳቤከ ።

9ቦ ፡ ዐርከ ፡ ዘጸላኤ ፡ ይከውነከ ፤ ወይዘረክየከ ፡ ወይከሥት ፡ ለከ ፡ ኅቡኣቲከ ።

10ወቦ ፡ ዐርከ ፡ ዘበእንተ ፡ ማእድከ ፡ ይትዓረከከ ፤ ወውአቱኒ ፡ ኢይሄሉ ፡ ምስሌከ ፡ ወበተጽናስከ ፡ የኀድገከ ።

11ወእመ ፡ ትዴሎ ፡ ይከውን ፡ ከማከ ፤ ወይኴንን ፡ ለከ ፤ ነባሬከ ።

12ወአመሰ ፡ ተጸነስከ ፡ ውእቱ ፡ ይከውነከ ፡ ዕድወ ፤ ወከመ ፡ ኢትርአዮ ፡ ይትኀብአከ ።

13ተገሐሥ ፡ እምጸላእትከ ፤ ወተዐቀቦሙ ፡ ለአዕርክቲከ ።

14ዐርክ ፡ ምእመን ፡ ከመ ፡ ወልታ ፡ ጽኑዕ ፤ ወዘረከቦ ፡ ረከበ ፡ መዝገበ ፡

15ለዐርክ ፡ ምእመን ፡ አልቦ ፡ ተውላጠ ፤ ወለሥኑ ፡ አልቦ ፡ መድሎተ ።

16ዐርክ ፡ ምእመን ፡ ሥራየ ፡ ሕይወት ፤ ወእለ ፡ ይፈርህዎ ፡ ለእግዚአብሔር ፡ ይረክብዎ ።

17ዘይፈርህ ፡ እግዚአብሔር ፡ ያረትዕ ፡ ታእኃሁ ፤ እስመ ፡ ከማሁ ፡ ይከውንዎ ፡ ቢጹሂ ።

18ወልድየ ፡ እምን ፡ እስከ ፡ ኅረያ ፡ (ለከ ፡) ለጥበብ ፤ ወእስከ ፡ ትረሥእ ፡ ትረክባ ።

19ወፈር ፡ ኀቤሃ ፡ ከመ ፡ ዘየሐርስ ፡ ወከመ ፡ ዘይዘርአ ፤ ወጽናሕ ፡ ፍሬሃ ፡ ቡሩከ ። እስመ ፡ ኅዳጥ ፡ ትጻሙ ፡ በቅኔሃ ፤ ወፍጡነ ፡ ትበልዕ ፡ ቀምሓ ።

20ፈድፋደ ፡ መብእስ ፡ ይእቲ ፡ በኀበ ፡ አብዳን ፤ ወኀበ ፡ ዘአልቦ ፡ ልበ ፡ ኢትጐነዲ ።

21ከመ ፡ እብነ ፡ መከራ ፡ ሶበ ፡ ያነሥእዎ ፡ ከማሁ ፡ ትከብዶ ፤ ወፍጡነ ፡ ይገድፋ ።

22ወጥበብሰ ፡ በከመ ፡ ስማ ፡ ይእቲ ፤ ወአኮ ፡ ብዙኃን ፡ እለ ፡ ያአምርዋ ።

23ስምዐኒ ፡ ወልድየ ፡ ወተዐገሥ ፡ በምክርየ ፤ ወኢታስትት ፡ ተግሣጽየ ።

24አብእ ፡ እገሪከ ፡ ውስተ ፡ አርዑታ ፤ ዕንቅ ፡ ውስተ ፡ ክሣድከ ፡ ጋጋ ።

25አትሕት ፤ መታክፍቲከ ፡ ወተሰከማ ፤ ወኢትትዩቄጣዕ ፡ መዋቅሕቲሃ ፡

26በኵሉ ፡ ነፍስከ ፡ ፈር ፡ ኀቤሃ ፤ ወበኵሉ ፡ ኀይልከ ፡ ዕቀብ ፡ ፍናዊሃ ።

27ትሉ ፡ አሠራ ፡ ወኅሥሣ ፡ ወትረክባ ፤ ወአኀዛ ፡ ወኢትኅድጋ ።

28ወበደኃሪትከ ፡ ትረክብ ፡ ዕረፍታ ፤ ወትፍሥሕተ ፡ ይከውነከ ።

29ወመዋቅሕቲሃኒ ፡ ወልታ ፡ ጽኑዐ ፡ ይከውነከ ፡ ወጋጋሂ ፡ አልባሰ ፡ ክብር ፡ ይገብአከ ።

30እስመ ፡ ዓለመ ፡ ወርቅ ፡ ኀቤሃ ፡ ሀሎ ፤ ወመኣስርቲሃኒ ፡ ሰርጐ ፡ ያክንት ፡ ይከውነከ ።

31ከመ ፡ ልብሰ ፡ ክብር ፡ ትለብሳ ፤ ወአክሊለ ፡ ትፍሥሕት ፡ ታስተቄጽለከ ።

32ለእመ ፡ ትፈቅድ ፡ ወልድየ ፡ [ትጠብብ ፤] ወለእመ ፡ አጥባዕከ ፡ አምነፍስከ ፡ (ከመ ፡)ትት[ሜ]ሀር ፤

33ወለእመ ፡ ትፈቅድ ፡ ትስማዕ ፡ ተዐገሥ ፤ ወለእመ ፡ አፅማእክ ፡ እዝነክ ፡ ትጠበብ ።

34ኀበ ፡ ብዙኃን ፡ አእሩግ ፡ ቁም ፤ ወዘርኢከ ፡ እምውስቴቶሙ ፡ ጠቢበ ፡ ትልዎ ።

35ወኵሎ ፡ ነገረ ፡ መጽሐፍ ፡ አፍቅር ፡ ለሰሚዕ ፤ ወአምሳለ ፡ ጥበብኒ ፡ ኢይትረሳዕከ ።

36ወለእመ ፡ ርኢከ ፡ ጠቢበ ፡ ጊስ ፡ ኀቤሁ ፤ ወመድረከ ፡ ኆኅቱ ፡ ያንሳሕልል ፡ ሰኰናከ ።

37ኀሊ ፡ ትእዛዞ ፡ ለእግዚአብሔር ፡ ወአንብብ ፡ መጽሐፎ ፡ በኵሉ ፡ ጊዜ ፤ ወውእቱ ፡ ያጸንዐከ ፡ ልበከ ፤ ወይሁበከ ፡ ታፍቅራ ፡ ለጥበብ ።